ମୁମ୍ବାଇ: ଆଜି ସାରା ଦେଶ ୭୪ତମ ସ୍ବାଧୀନତା ଦିବସ ପାଳନ କରୁଛି । ଅନ୍ୟପକ୍ଷରେ ସୋସିଆଲ ମିଡ଼ିଆ ଓ ଜାତୀୟ ଗଣମାଧ୍ୟମରେ ସ୍ବର୍ଗତ ଅଭିନେତା ସୁଶାନ୍ତ ସିଂହ ରାଜପୁତଙ୍କ ନିମନ୍ତେ ସାମୁହିକ ପ୍ରାର୍ଥନା (ଗ୍ଲୋବାଲ ପ୍ରେୟାର) କରାଯାଉଛି । କେବଳ ଦେଶ ନୁହେଁ, ବିଦେଶରେ ମଧ୍ୟ ସୁଶାନ୍ତଙ୍କର ବହୁ ପ୍ରଶଂସକ ଅଛନ୍ତି । ସେମାନେ ଏଥିରେ ସାମିଲ ହୋଇଛନ୍ତି । ଯେଉଁ ବିଦେଶୀ ଲୋକମାନେ ସୁଶାନ୍ତଙ୍କୁ ଜାଣି ନାହାନ୍ତି ସେମାନେ ଇଣ୍ଟରନେଟରୁ ସୁଶାନ୍ତଙ୍କ ସମ୍ପର୍କରେ ତଥ୍ୟ ସଂଗ୍ରହ କରୁଛନ୍ତି, ତାଙ୍କ ମୃତ୍ୟୁର କାରଣ ଜାଣିବାକୁ ଚାହୁଁଛନ୍ତି । ଏହିସବୁ ଭିତରେ କାଲିଫର୍ଣିଆ ଷ୍ଟେଟ ଆସେମ୍ଲି ସୁଶାନ୍ତ ସିଂହ ରାଜପୁତଙ୍କୁ ସମ୍ମାନିତ କରିଛି । ସୁଶାନ୍ତଙ୍କୁ ଦିଆଯାଇଥିବା ଏହି ସମ୍ମାନ ତାଙ୍କ ଭଉଣୀ ଶ୍ଵେତାସିଂହ କିର୍ତୀ ଗ୍ରହଣ କରିଛନ୍ତି ।
ସିନେମା ଓ ସମାଜରେ ତାଙ୍କର ଯୋଗଦାନ ନିମନ୍ତେ ସୁଶାନ୍ତ ସିଂହ ରାଜପୁତଙ୍କୁ କାଲିଫର୍ଣିଆ ଷ୍ଟେଟ ଆସେମ୍ଲି ସମ୍ମାନିତ କରିଥିବା ସୂଚନା ଦିଆଯାଇଛି । ଭଉଣୀ ଶ୍ଵେତା ଏ ସମ୍ପର୍କରେ ନିଜ ଇନଷ୍ଟାଗ୍ରାମ ପୋଷ୍ଟରେ ସେୟାର କରିଛନ୍ତି । ଭାରତର ସ୍ବାଧୀନତା ଦିବସରେ କାଲିଫର୍ଣିଆରେ ମୋର ଭାଇଙ୍କୁ ସମ୍ମାନିତ କରାଯାଇଛି ବୋଲି ଉଲ୍ଲେଖ କରି କାଲିଫର୍ଣିଆ ଆମ ସହ ଠିଆ ହୋଇଛି ବୋଲି କହିଛନ୍ତି । ଏଥିପାଇଁ କାଲିଫର୍ଣିଆକୁ ସେ ଧନ୍ୟବାଦ ମଧ୍ୟ ଜଣାଇଛନ୍ତି ।
