ଆଠଗଡ : ଆଠଗଡ ବ୍ଲକ ଅନ୍ତର୍ଗତ ମେଘାଠାରେ ସ୍ୱର୍ଗତ ଡାକ୍ତର ଅନ୍ତର୍ଯ୍ୟାମୀ ପାତ୍ରଙ୍କ ଜମିରେ ଥିବା ଏକ ପରିତ୍ୟକ୍ତ ଖୋଲା କୂଅରେ ପଡିଯାଇଥିବା ୨ଟି ଷଣ୍ଢଙ୍କୁ ଉଦ୍ଧାର କରାଯାଇଛି । ଅପରାହ୍ନରେ ୨ଟି ଷଣ୍ଢ ପରସ୍ପର ମଧ୍ୟରେ ଲଢେଇ କରୁଥିବାବେଳେ ସେହି କୂଅରେ ପଡିଯାଇଥିବା କିଛି ଗ୍ରାମବାସୀ ଦେଖିଥିଲେ। ଗ୍ରାମର ବହୁ ସ୍ୱେଚ୍ଛାସେବୀ ଯୁବକ ଏକତ୍ରିତ ହୋଇ ରସି ଓ ବାଉଁଶ ଆଦି ଯୋଗାଡ କରି ଷଣ୍ଢ ଦୁଇଟିଙ୍କୁ ଉଦ୍ଧାର କରିବା ପାଇଁ ଆପ୍ରାଣ ଚେଷ୍ଟା କରିଥିଲେ ମଧ୍ୟ ସକ୍ଷମ ହୋଇ ନଥିଲେ। ଖବର ପାଇ ଆଠଗଡ ଦମକଳ ବାହିନୀ ମୁଖ୍ୟ ଆଗ୍ନିକ ସୁଶାନ୍ତ କୁମାର ସାମଲଙ୍କ ନେତୃତ୍ୱରେ ଗ୍ରାମର ସ୍ୱେଚ୍ଛାସେବୀଙ୍କ ସହାୟତାରେ ଗୋଟିଏ ପରେ ଗୋଟିଏ ଦୁଇଟିଯାକ ଷଣ୍ଢଙ୍କୁ ସୁରକ୍ଷିତ ଭାବେ ଉଦ୍ଧାର କରିଥିଲେ। ତେବେ ସଂପୃକ୍ତ ଖୋଲା କୂଅଟିର ଚତୁଃପାଶ୍ୱର୍ରେ ପଥର ବାଡ ଦିଆଯାଉ ନଚେତ ତାକୁ ସଂପୂର୍ଣ୍ଣ ପୋତି ଦିଆଯାଉ ବୋଲି ସାମାଜିକ କର୍ମୀ ଅରୁପାନନ୍ଦ ମଲ୍ଲିକ ଓ ଅନ୍ୟ ଗ୍ରାମବାସୀ ଦାବି କରିଛନ୍ତି ।
Comments are closed.