ନୂଆଦିଲ୍ଲୀ : କାମଚଳା ଅର୍ଥମନ୍ତ୍ରୀ ପୀୟୂଷ ଗୋଏଲଙ୍କ ଦ୍ୱାରା ଉପସ୍ଥାପିତ ଅନ୍ତରୀଣ ବଜେଟକୁ କଂଗ୍ରେସ ଅଧ୍ୟକ୍ଷ ରାହୁଲ ଗାନ୍ଧୀ, ପୂର୍ବତନ ପ୍ରଧାନମନ୍ତ୍ରୀ ମନମୋହନ ସିଂହ, ପୂର୍ବତନ ଅର୍ଥମନ୍ତ୍ରୀ ପି.ଚିଦମ୍ବରମଙ୍କ ସମେତ କଂଗ୍ରେସ ନେତାମାନେ କଡ଼ା ସମାଲୋଚନା କରିଛନ୍ତି। ନିର୍ବାଚନକୁ ଦୃଷ୍ଟିରେ ରଖି ଭୋଟ ପାଇଁ ଏହି ବଜେଟ ପ୍ରସ୍ତୁତ କରାଯାଇଛି ବୋଲି ସେମାନେ ଅଭିଯୋଗ କରିଛନ୍ତି। ଶାସନକୁ ଫେରିବା ଆଶାରେ ବିଜେପି ନେତୃତ୍ୱାଧୀନ ଏନ୍ଡିଏ ସରକାର ଏହି ବଜେଟ ପ୍ରସ୍ତୁତ କରିଛନ୍ତି ବୋଲି ଚିଦମ୍ବରମ କହିଛନ୍ତି। ଏହାଦ୍ୱାରା ଆର୍ଥିକ ସ୍ଥିରତା ନଷ୍ଟ ହେବ ଓ ଅର୍ଥନୀତି ଅଧିକ ଦୁର୍ବଳ ହେବ ବୋଲି ସେ ଚେତାବନୀ ଦେଇଛନ୍ତି। ସେ କହିଛନ୍ତି ଯେ କ୍ରମାଗତ ଭାବେ ଦ୍ୱିତୀୟ ଥର ସରକାର ଆର୍ଥିକ ନିଅଣ୍ଟ ଲକ୍ଷ୍ୟଠୁ ବଳିଯାଇଛନ୍ତି। ତେଣୁ ସରକାର ଏଫଆରବିଏମ୍ ଆଇନକୁ ଖୋଲାଖୋଲି ଅବମାନନା କରିଥିବା ସ୍ପଷ୍ଟ ହୋଇଛି। ମନମୋହନ ସିଂହ କହିଛନ୍ତି ଏହା ଭୋଟ ପାଇଁ ବଜେଟ। ଲୋକସଭା ନିର୍ବାଚନକୁ ଦୃଷ୍ଟିରେ ରଖି ଏହି ବଜେଟ ପ୍ରସ୍ତୁତ କରାଯାଇଛି। ସେହିପରି କଂଗ୍ରେସ ଅଧ୍ୟକ୍ଷ ରାହୁଲ ଗାନ୍ଧୀ, କଂଗ୍ରେସ ବରିଷ୍ଠ ସାଂସଦ ଶଶୀ ଥରୁର, ଲୋକସଭାରେ ବିରୋଧୀ ଦଳ ନେତା ମଲ୍ଲିକାର୍ଜୁନ ଖଡଗେ ମଧ୍ୟ ଏହି ବଜେଟକୁ ସମାଲୋଚନା କରିଛନ୍ତି। ପ୍ରଧାନମନ୍ତ୍ରୀ କୃଷକ ସମ୍ମାନ ନିଧି ଯୋଜନାକୁ ନେଇ କଂଗ୍ରେସ ଅଧ୍ୟକ୍ଷ ରାହୁଲ ଗାନ୍ଧୀ ମୋଦୀଙ୍କ ଉପରେ ବର୍ଷିଛନ୍ତି। ଏହି ଯୋଜନାରେ କୃଷକଙ୍କୁ ମାତ୍ର ୧୭ ଟଙ୍କା ଦେବାର ପ୍ରାବଧାନ କୃଷକଙ୍କୁ ଅପମାନ ବୋଲି ସେ କହିଛନ୍ତି। ଶଶୀ ଥରୁର କହିଛନ୍ତି ମଧ୍ୟବର୍ଗର ଲୋକଙ୍କୁ ଆୟକର ଛାଡ଼ ବ୍ୟତୀୟ ଏହି ବଜେଟରେ କିଛି ନାହିଁ। କୃଷକଙ୍କୁ ମିଳୁଥିବା ଆୟ ସହାୟତାକୁ ୬ ହଜାର ଟଙ୍କାରୁ କମାଇ ମାସକୁ ୫୦୦ ଟଙ୍କା କରିଦଆଯାଇଛି।
