ଲଣ୍ଡନ: ବ୍ରିଟେନ ସଂସଦରେ ବୁଧବାର ଭାରତରେ ଚାଲିଥିବା କୃଷି ଆନ୍ଦୋଳନ ପ୍ରସଙ୍ଗ ଉଠିଥିଲା। ତେବେ ଏହି ଅବସରରେ ପ୍ରଧାନମନ୍ତ୍ରୀ ବୋରିସ୍ ଜନସନଙ୍କ ମନ୍ତବ୍ୟ ଗୃହର ସଦସ୍ୟମାନଙ୍କୁ ଆଶ୍ଚର୍ଯ୍ୟ କରିଥିଲା। ବ୍ରିଟେନ୍ର ହାଉସ୍ ଅଫ୍ କମନ୍ସରେ କୃଷି ଆନ୍ଦୋଳନ ଉଠିବା କ୍ଷଣି ପ୍ରଧାନମନ୍ତ୍ରୀ ଜନ୍ସନ୍ ଏହାକୁ ଭାରତ ଏବଂ ପାକିସ୍ତାନ ପ୍ରସଙ୍ଗ ବୋଲି କହିଥିଲେ। ଏହି ପ୍ରସଙ୍ଗକୁ ଦୁଇ ସରକାରଙ୍କୁ ସମାଧାନ କରିବାକୁ ପଡ଼ିବ ବୋଲି ଜନ୍ସନ କହିଥିଲେ।
ସୂଚନା ଅନୁସାରେ, ଲେବର ପାର୍ଟିର ବ୍ରିଟିଶ ସିଖ୍ ସାଂସଦ ତନମନଜିତ୍ ସିଂହ ଘେସୀ ଭାରତରେ କୃଷକମାନଙ୍କ ଦ୍ବାରା କରାଯାଉଥିବା ବିକ୍ଷୋଭ ସମ୍ପର୍କରେ ପ୍ରଧାନମନ୍ତ୍ରୀ ଜନ୍ସନଙ୍କୁ ପ୍ରଶ୍ନ କରିଥିଲେ। ଘେସୀ କହିଥିଲେ, ଭାରତରେ ପଞ୍ଜାବ ଏବଂ ଅନ୍ୟାନ୍ୟ ପ୍ରାନ୍ତର କୃଷକମାନେ ଶାନ୍ତିରେ ବିକ୍ଷୋଭ ପ୍ରଦର୍ଶନ କରୁଥିବାବେଳେ ସେମାନଙ୍କ ଉପରକୁ ଲୁହବୁହା ଗ୍ୟାସ ଏବଂ ପାଣି ମାଡ଼ କରିବାକୁ ଯବାନମାନଙ୍କୁ ଆଦେଶ ଦିଆଯାଉଛି।
ଯେଉଁ ଯବାନଙ୍କୁ କୃଷକମାନେ ଖାଦ୍ୟ ଖୁଆଉଛନ୍ତି, ସେମାନଙ୍କୁ ମାଡ଼ ମରାଯାଉଛି। ଏହାର ଭିଡିଓ ଦେଖି ମୁଁ ଭୟଭୀତ ହୋଇପଡ଼ିଛି। ଆମର ଚିନ୍ତା ବିଷୟରେ ଆପଣ ଭାରତୀୟ ପ୍ରଧାନମନ୍ତ୍ରୀଙ୍କୁ ଅବଗତ କରାଇବେ କି ବୋଲି ଘେଷୀ ଜନ୍ସନଙ୍କୁ ପ୍ରଶ୍ନ କରିଥିଲେ।
ଏହି ପ୍ରଶ୍ନର ଉତ୍ତର ଦେଇ ଜନ୍ସନ କହିଥିଲେ, ଗୃହର ଅଧ୍ୟକ୍ଷ ଏବଂ ମାନନୀୟ ସମସ୍ୟମାନେ ଆମ ବିଚାରକୁ ଭଲ ଭାବେ ଜାଣିଛନ୍ତି। ଭାରତ ଏବଂ ପାକିସ୍ତାନ ମଧ୍ୟରେ ଯାହା କିଛି ବି ହେଉଛି, ତାହାକୁ ନେଇ ଆମର ଗମ୍ଭୀର ଚିନ୍ତା ରହିଛି। କିନ୍ତୁ ଏହି ସମସ୍ୟା ଉକ୍ତ ଦୁଇ ଦେଶର ସରକାରଙ୍କ ମଧ୍ୟରେ ଦ୍ବିପାକ୍ଷିକ ଆଲୋଚନା ଜରିଆରେ ସମାଧାନ ହୋଇପାରିବ।
ଜନ୍ସନଙ୍କ ଏହି ଉତ୍ତରରେ ଘେସୀଙ୍କ ସମେତ ଅନ୍ୟ ସଦସ୍ୟମାନେ ଆଚମ୍ବିତ ହୋଇଥିଲେ। ଘେସୀ ତତ୍କାଳ ଏକ ଟ୍ବିଟ୍ କରିଥିଲେ। ଟ୍ବିଟ୍ରେ ସେ ଆଶ୍ଚର୍ଯ୍ୟ ପ୍ରକାଶ କରି ପ୍ରଧାନମନ୍ତ୍ରୀ ଜନ୍ସନ୍ଙ୍କୁ ଏହା ବି ଜଣାନାହିଁ ଯେ ସେ କେଉଁ ବିଷୟରେ ଉତ୍ତର ଦେଉଛନ୍ତି ବୋଲି ଲେଖିଥିଲେ।
