ବୌଦ୍ଧ: ବୌଦ୍ଧ ଜିଲା ଖୋର୍ଦ୍ଧା-ବଲାଙ୍ଗିର ୫୭ନଂ ଜାତୀୟ ରାଜପଥର ହରେକୃଷ୍ଣପୁର ମନ୍ଦିର ଛକ ନିକଟରେ ଗୁରୁବାର ଦିନ ଏକ ମର୍ମନ୍ତୁଦ ସଡକ ଦୁର୍ଘଟଣା ହୋଇଛି । ଦୁର୍ଘଟଣାସ୍ଥଳରେ ସ୍ୱାମୀର ମୃତ୍ୟୁ ହୋଇଥିବା ବେଳେ ଗାଡିରେ ଥିବା ଦୁଇ ଛୁଆଙ୍କ ସହିତ ସ୍ତ୍ରୀ ଗୁରୁତର ଭାବେ ଆହତ ହୋଇଥିବା ଜଣାପଡିଛି । ମିଳିଥିବା ସୂଚନା ମୁତାବକ ବୌଦ୍ଧ ପଟୁ ଚାରିଛକ ଆଡକୁ ଯାଉଥିବା ଏକ କାର (ସିଜି- ୦୪- ଏଚ୍ଡି – ୯୯୯୧) ଭାରସାମ୍ୟ ହରାଇ ରାସ୍ତାକଡ ଏକ ଲିମ୍ବ ଗଛ ସହିତ ଧକ୍କା ହୋଇଥିଲା । ଛତିଶଗଡ ରାୟପୁରର ବାସିନ୍ଦା ଦୀପକ ଭାଡେର ତାଙ୍କ ସ୍ତ୍ରୀ ସୀମା ଭାଡେର ଓ ୨ ଛୋଟ ଝିଅ ପାଲକ ଓ ଖୁସିଙ୍କୁ ଧରି ପୁରୀକୁ ନିଜେ ଗାଡି ଚଳାଇ ଯାତ୍ରା କରୁଥିବା ବେଳେ ବୌଦ୍ଧଜିଲାର ହରେକୃଷ୍ଣପୁର ଠାରେ ଏହି ସଡକ ଦୁର୍ଘଟଣା ଘଟିଥିବା ଜଣାପଡିଛି । ଦୁର୍ଘଟଣାରେ ଦୀପକଙ୍କ ଘଟଣାସ୍ଥଳରେ ହିଁ ମୃତ୍ୟୁ ହୋଇଛି । ସ୍ତ୍ରୀ ସୀମା ଓ ୨ ଛୋଟ ଝିଅ ପାଲକ ଓ ଖୁସି ଗୁରୁତର ଆହତ ହୋଇଥିବା ବେଳେ ସେମାନଙ୍କୁ ସ୍ଥାନୀୟ ଲୋକେ ଉଦ୍ଧାର କରି ୧୦୮ ଆମ୍ବୁଲାନସ ଯୋଗେ ପୁରୁଣାକଟକ ଡାକ୍ତରଖାନାରେ ଭର୍ତ୍ତି କରିଛନ୍ତି । ଗୁରୁତର ମହିଳାଙ୍କ ଅବସ୍ଥା ଗୁରୁତର ରହିଛି । ୨ ଛୋଟ ଝିଅ ପାଲକ ଓ ଖୁସି ସୁସ୍ଥ ଥିବା କହିଛନ୍ତି ଡାକ୍ତର । ଦୁର୍ଘଟଣାସ୍ଥଳରେ ବୌଦ୍ଧ ପୁଲିସ ଘଟଣାସ୍ଥଳରେ ପହଞ୍ଚି ମୃତଦେହକୁ ଉଦ୍ଧାର କରିବା ସହ ଶବବ୍ୟବଚ୍ଛେଦ ପାଇଁ ବୌଦ୍ଧ ମୁଖ୍ୟ ଚିକିତ୍ସାଳୟକୁ ପଠାଇଛି । ଏନେଇ ଏକ ମାମଲା ରୁଜ କରି ପୁଲିସ ଘଟଣାର ତଦନ୍ତ ଚଳାଇଛି ।
Comments are closed.