ବୌଦ୍ଧ : ବୌଦ୍ଧ ଜିଲାରେ ବର୍ତ୍ତମାନ ପାରଦ ୪୨ ଡିଗ୍ରୀ ଉପରେ ଥିବାବେଳେ ପ୍ରବଳ ଗ୍ରୀଷ୍ମ ପ୍ରବାହ ଯୋଗୁଁ ଜନଜୀବନ ଅସ୍ତବ୍ୟସ୍ତ ହୋଇପଡିଛି । ଏଭଳି ସ୍ଥିତିରେ ଅଘୋଷିତ ବିଦ୍ୟୁତ କାଟ ଲୋକଙ୍କ ଦୁଃଖକୁ ଦ୍ବିଗୁଣିତ କରିଛି । ଜିଲାରେ ବାରମ୍ବାର ଅଘୋଷିତ ବିଦ୍ୟୁତ କାଟକୁ ନେଇ ସାଧାରଣରେ ଉଦବେଗ ପ୍ରକାଶ ପାଇଛି । ବୌଦ୍ଧ ସହର ଅପେକ୍ଷା ଜିଲାର ଗ୍ରାମାଞ୍ଚଳ ଗୁଡିକରେ ଅଧିକ ବିଦ୍ୟୁତ କାଟ ହେଉଛି ।
ସାରା ରାଜ୍ୟରେ ପ୍ରଚଣ୍ଡ ଗ୍ରୀଷ୍ମ ପ୍ରବାହ ବୃଦ୍ଧି ପାଇଥିବାବେଳେ ବୌଦ୍ଧ ଜିଲାରେ ମଧ୍ୟ ତାପମାତ୍ରା ପ୍ରଚଣ୍ଡ ଭାବେ ବୃଦ୍ଧି ପାଇଛି । ଜିଲାରେ ପ୍ରଚଣ୍ଡ ଖରା ସହ ପ୍ରବଳ ଝାଞ୍ଜି ପବନ ବହିବା ଯୋଗୁଁ ଜନଜୀବନ ସମ୍ପୂର୍ଣ୍ଣ ଅସ୍ତବ୍ୟସ୍ତ ହୋଇପଡିଛି । ବୌଦ୍ଧ ଜିଲାରେ ତାପମାତ୍ରା ୪୨ ଡିଗ୍ରୀ ଉପରେ ଅତିକ୍ରମ କରିଥିବା ଜଣାପଡିଛି । ଆଗକୁ ତପମାତ୍ରା ଆହୁରି ବଢିବା ନେଇ ପାଣିପାଗ ବିଭାଗ ପକ୍ଷରୁ ଜଣାପଡିବା ପରେ ସତର୍କ ରହିବାକୁ ପ୍ରଶାସନ ପକ୍ଷରୁ ପରାମର୍ଶ ଦିଆଯାଇଛି । ଖରାକୁ ଦୃଷ୍ଟିରେ ରଖି ଘରୁ ନିହାତି ଦରକାର ନଥିଲେ ଘରୁ ନ ବାହରିବାକୁ ପରାମର୍ଶ ଦେବା ସହ ଗାମୁଛା, ଛତା ଓ ପାଣି ସାଙ୍ଗରେ ନେଇ ଯିବାକୁ ସୁଚନା ଦିଆଯାଇଛି । ଖରାଯୋଗୁଁ ସକାଳ ୭ଟାରୁ ଦିନ ୧୨ ଟା ପର୍ଯ୍ୟନ୍ତ ଗୋଟିଏ ଓଳି ଦୋକାନ ବଜାର ଗୁଡିକ ଖୋଲା ରହୁଥିବାବେଳେ ଲୋକମାନେ ସକାଳୁ ସକାଳୁ ନିଜର ଦୈନନ୍ଦିନ ସାମଗ୍ରୀ କିଣିବା ପାଇଁ ଘରୁ ବାହାରୁଛନ୍ତି । କିନ୍ତୁ ସକାଳ ୯ ଟା ହେବା କ୍ଷଣି ମୁଣ୍ଡ ଉପରେ ସୂର୍ଯ୍ୟ ଦେବଙ୍କ ପ୍ରଚଣ୍ଡ ରୂପ ସାଧାରଣଲୋକଙ୍କୁ ପ୍ରଭାବିତ କରୁଛି ।
ବ୍ୟାପକମାତ୍ରାରେ ଜଙ୍ଗଲ ନଷ୍ଟ ଓ ମହାନଦୀର ଉତ୍ତପ୍ତ ବାଲି ଯୋଗୁଁ ସୁର୍ଯ୍ୟଙ୍କ ତାପମାତ୍ରା ଜିଲାରେ ବହୁ ମାତ୍ରାରେ ବୃଦ୍ଧି ହେଉଥିବା ପରିବେଶବିତମାନେ ମତପ୍ରକାଶ କରୁଛନ୍ତି । ସହରରେ ରାସ୍ତା ପ୍ରଶସ୍ତିକରଣ ପାଇଁ ବଡ ବଡ ଗଛ ଗୁଡିକ କାଟି ଦେବା ଯୋଗୁଁ ମଧ୍ୟ ଖରାର ପରିମାଣ ବୃଦ୍ଧି ପାଇଛି । ଜିଲାରେ ପ୍ରବଳ ଗ୍ରୀଷ୍ମପ୍ରବାହ ଯୋଗୁଁ ରାସ୍ତାଘାଟ, ଦୋକାନ ବଜାର, ବସଷ୍ଟାଣ୍ଡ ଚାରିଆଡ ଜନଶୁନ୍ୟ ହୋଇପଡୁଛି । ଆଗକୁ ଗ୍ରୀଷ୍ମପ୍ରବାହ ଆହୁରି ବୃଦ୍ଧି ପାଇବା ଆଶଙ୍କା ମଧ୍ୟରେ ବାରମ୍ବାର ଅଘୋଷିତ ବିଜୁଳି କାଟ ବୌଦ୍ଧ ସହରବାସୀଙ୍କୁ ଚିନ୍ତାରେ ପକାଇଛି ।
