ବୌଦ୍ଧ: ବୌଦ୍ଧ ଜିଲା ପାଣ-ଗଣ୍ଡା ବିକାଶ ପରିଷଦ ପକ୍ଷରୁ ସଂଗଠନର ସଂପାଦକ ସୁଧାଂଶୁ ଡାଙ୍ଗଙ୍କ ନେତୃତ୍ୱରେ ଏକ ପ୍ରତିନିଧି ମଣ୍ଡଳି ବୁଧବାର ଅତିରିକ୍ତ ତହସିଲଦାରଙ୍କୁ ସାକ୍ଷାତ କରିଥିବା ଜଣାପଡ଼ିଛି। ପାଣ-ଗଣ୍ଡା ବିକାଶ ପରିଷଦ ପକ୍ଷରୁ ଗତ ବର୍ଷ ଜୁଲାଇ ମାସରେ ଭୂମିହୀନକୁ ୨ ଏକର ଚାଷ ଜମି, ୧୦ ଡେସିମିଲ ଘରଡିହ ଓ ସମସ୍ତ ବସ୍ତିକୁ ରାସ୍ତା ଯୋଗାଇ ଦେବା ଦାବିରେ ବୌଦ୍ଧ ତହସିଲ କାର୍ଯ୍ୟାଳୟ ଘେରାଉ କରିବା ସହିତ ଏକ ଦାବିପତ୍ର ପ୍ରଦାନ କରିଥିଲେ। କିନ୍ତୁ ଆଜି ପର୍ଯ୍ୟନ୍ତ ଦାବିଗୁଡିକ ପ୍ରଶାସନ ପକ୍ଷରୁ ପୂରଣ କରାଯାଇ ନ ଥିବାରୁ ସଂଗଠନ ପକ୍ଷରୁ ବୁଧବାର ତହସିଲ କାର୍ଯ୍ୟାଳୟରେ ଅତିରିକ୍ତ ତହସିଲଦାର ମନୋରଂଜନ ସୁନାଙ୍କ ସହିତ ଆଲୋଚନା କରିଥିଲେ। ଚଳିତ ଏପ୍ରିଲ ମାସ ସୁଦ୍ଧା ଯୋଗ୍ୟ ହିତାଧିକାରୀଙ୍କୁ ଆଇନ ଅନୁଯାୟୀ ପଟ୍ଟା ପ୍ରଦାନ କରାଯିବାକୁ ଅତିରିକ୍ତ ତହସିଲଦାର ସଂଗଠନର କର୍ମକର୍ତ୍ତାଙ୍କୁ ସୂଚନା ଦେଇଥିବା ସଂଗଠନ ପକ୍ଷରୁ କୁହାଯାଇଛି। ଯଦି ପ୍ରଶାସନ ପକ୍ଷରୁ ପଦକ୍ଷେପ ନିଆନଯାଏ। ସଂଗଠନ ପକ୍ଷରୁ ଜିଲାର ସମସ୍ତ ଆରଆଇ ଅଫିସ ଘେରାଉ କରିବା ସହିତ ଆନ୍ଦୋଳନ କରାଯିବ ବୋଲି ସଂଗଠନର ସଂପାଦକ ପ୍ରକାଶ କରିଛନ୍ତି। ଆଲୋଚନା ବୈଠକରେ ସଂଘର ସଭାପତି ରୋହିତ କହଁର, ଉପସଭାପତି ମକରଧ୍ୱଜ ମହାନନ୍ଦିଆ, ଦଶରଥ ବେହେରା, କହ୍ନେଇ ବାଦୀ, ସେବତୀ ବେହେରା, ରାମଚନ୍ଦ୍ର ତାଣ୍ଡେ, ମହାଦେବ କଲତାଙ୍କ ସମେତ ସଂଘର କର୍ମକର୍ତ୍ତାମାନେ ସାମିଲ ଥିଲେ।
Comments are closed.