ବୌଦ୍ଧ: ବୌଦ୍ଧଜିଲ୍ଲା ହରଭଙ୍ଗା ଥାନା ଅନ୍ତର୍ଗତ ହାତୀଗଡ ଗ୍ରାମରେ ଜଣେ ନାବାଳିକାକୁ ଦୁଷ୍କର୍ମ କରାଯାଇଥିବା ଅଭିଯୋଗ ହୋଇଥିବାବେଳେ ପୋଲିସ ଅଭିଯୁକ୍ତମାନଙ୍କ ବିରୁଦ୍ଧରେ କାର୍ଯ୍ୟାନୁଷ୍ଠାନ ଗ୍ରହଣ କରିନ ଥିବାରୁ ଏହାର ପ୍ରତିବାଦରେ ନାବାଳିକାର ପରିବାର ଲୋକ ଏସପି ଅଫିସ ଆଗରେ ଅନଶନରେ ବସିଥିଲେ। ଖବର ପାଇ ବୌଦ୍ଧ ଥାନା ଅଧିକାରୀ ତପସ୍ୱିନୀ କହଁର ଘଟଣାସ୍ଥଳରେ ପହଂଚି ସେମାନଙ୍କୁ ଅନଶନରୁ ହଟିବା ପାଇଁ ବୁଝାସୁଝା କରିଥିଲେ।
ଅଭିଯୋଗରୁ ଜଣାଯାଏ ଯେ, ୨୦୨୦ ଅକ୍ଟୋବର ମାସରେ ଜଣେ ନାବାଳିକାକୁ ରମେଶ ପାତ୍ର ଓ ଘାସି ବେହେରା ଦୁଷ୍କର୍ମ କରିଥିବା ଅଭିଯୋଗ ହୋଇଥିଲା। ଏନେଇ ହରଭଙ୍ଗା ଥାନାରେ ଅଭିଯୋଗ ପରେ ପୋଲିସ ଏକ ମକଦ୍ଦମା ରୁଜୁ କରିଥିଲା। ହେଲେ ଅଭିଯୁକ୍ତମାନେ ଗିରଫ ନ ହେବାରୁ ପିଡିତାଙ୍କ ପରିବାର ଉପରେ ଅତ୍ୟାଚାର ଓ ଧମକ ଚମକ ଦେଇ ଭୟଭୀତ କରୁଥିବା ନେଇ ଅଭିଯୋଗ ହୋଇଛି। ଅଭିଯୁକ୍ତମାନେ ରାତିରେ ଅଚାନକ ମଦ୍ୟପାନ କରି ପିଡିତାଙ୍କ ଘରକୁ ଆସୁଛନ୍ତି। ବାଉଁଶ ଠେଙ୍ଗା, ଲୁହାରଡ, ଟର୍ଚ୍ଚ ଲାଇଟ ଧରି ଉଗ୍ରରୂପ ଦେଖାଇ ଡରାଉଛନ୍ତି। କେସ ସମାଧାନ ନ କଲେ ଘରପୋଡି ଦେବା, ଆଣ୍ଠୁ ତଳକୁ ବାଡେଇ ଗୋଡ ଭାଙ୍ଗି ଦେବାକୁ ଧମକ ଦେଉଛନ୍ତି।
ଅଭିଯୁକ୍ତ ରମେଶ କେତେଜଣ ଯୁବକଙ୍କୁ ରଖି ଅପରାଧିକ କାର୍ଯ୍ୟକଳାପ ଚଳାଉଛି। ସେଥିପାଇଁ କେତେବେଳେ କଣ ଯେ ଘଟାଇବ ସେ ଭୟରେ ପିଡିତାଙ୍କ ପରିବାର ଲୋକ ମାନସିକ ଚାପରେ ଦିନ କାଟୁଛନ୍ତି। ଦିନ ବେଳା ସତର୍କରେ ଘରେ ଓ ରାତିରେ ସାଇ ପଡିଶାଙ୍କ ଅଗଣାରେ, ପିଣ୍ଡାରେ ଶୋଇ ଦିନ କାଟୁଛନ୍ତି ବୋଲି ଅଭିଯୋଗ କରିଛନ୍ତି। ଗତ ୩୧.୫.୨୧ ତାରିଖରେ ପିଡିତାଙ୍କ ପରିବାରର ଜଣେ ସଦସ୍ୟଙ୍କୁ ମାଡ ମରାଯାଇଥିଲା। ହେଲେ ଅଭିଯୋଗ ପରେ ଅଭିଯୁକ୍ତ ବିରୁଦ୍ଧରେ କାର୍ଯ୍ୟାନୁଷ୍ଠାନ ଗ୍ରହଣ କରାଗଲା ନାହିଁ। ଫଳରେ ସେହିଦିନ ଠାରୁ ଅଭିଯୁକ୍ତ ସେମାନଙ୍କ ଉପରେ ଅତ୍ୟାଚାର ଚଳାଇ ଆସୁଛନ୍ତି। ମାର୍କେଟକୁ ଯିବାକୁ ଥିବା ଏକମାତ୍ର ରାସ୍ତା ଉପରେ ଚେୟାର ପକାଇ ବସିବା ଫଳରେ ସେମାନେ ବଜାରକୁ ସାମଗ୍ରୀ ଆଣିବା ପାଇଁ ଯାଇପାରୁ ନାହାନ୍ତି। ଫଳରେ ୫ ଛୋଟ ପିଲାଙ୍କ ସମେତ ୯ ଜଣ ପରିବାର ଲୋକ ଅସହାୟ ଅବସ୍ଥାରେ ଦିନ କାଟୁଥିବା ନେଇ ଅଭିଯୋଗ କରିଛନ୍ତି।
