ବୋଲଗଡ଼: ବୋଲଗଡ଼ ବ୍ଲକ ଜାତୀୟ ରାଜପଥ ୫୭ ହଡାନଈ ବ୍ରିଜ ନିକଟରେ ମଙ୍ଗଳବାର ଏକ ଟ୍ରକ ଓ ପିକପ ମୁହାଁମୁହିଁ ଧକ୍କାରେ ୧୦୭ପିକପ ଚାଳକଙ୍କ ସମେତ ୨ଜଣ ଯୁବତୀ ଗୁରୁତର ହୋଇଛନ୍ତି । ସୂଚନା ଅନୁଯାୟୀ ଦଶପଲାରୁ ଏକ ପିକପ କିଛି ଟେଣ୍ଟ ହାଉସ ସାମଗ୍ରୀ ଧରି ରାଜସୁନାଖଳା ନିକଟ କୋଟଗଡକୁ ବାହାରୁଥିବା ବେଳେ ୨ଜଣ ଯୁବତୀ ଲିଲି ନିହାଣ (୩୨) ଓ କାଜଲ ନାୟକ(୨୩) ସେହି ଠାରେ ନିଜ ଗ୍ରାମ ଖୋର୍ଦ୍ଧା ମେଣ୍ଢାଶାଳ ଆସିବା ପାଇଁ ବସକୁ ଅପେକ୍ଷା କରିଥିଲେ। ପୂର୍ବରୁ ପରିଚୟ ଥିବା ଦଶପଲାର ଚାଳକ ବାବୁଲ ସାହୁ ତାଙ୍କୁ ଆଗରେ ବସାଇ ରାଜସୁନାଖଳା ବସଷ୍ଟାଣ୍ଡ ଯାଏଁ ଛାଡିବାକୁ କହି ବସେଇଥିଲେ ।
ତେବେ ବସଷ୍ଟାଣ୍ଡ ଠାରୁ ମାତ୍ର ଦେଢ଼ କିମି ପୂର୍ବରୁ ଏହି ଦୃଘଟଣା ଘଟିଛି । ବିପରୀତ ଦିଗରୁ ଆସୁଥିବା ଏକ ସିମେଣ୍ଟ ବୋଝେଇ ସହ ଏହି ପିକପର ମୁହାଁମୁହିଁ ଧକ୍କା ହୋଇଥିଲା । ଫଳରେ ୧୦୭ ପିକପରେ ଆଗରେ ବସିଥିବା ଚାଳକ ଓ ୨ଜଣ ଯୁବତୀ ଗୁରୁତର ଭାବେ ଚାପି ହୋଇ ରହିଥିଲେ । ସ୍ଥାନୀୟ ଲୋକେ ସେମାନଙ୍କୁ ଉଦ୍ଧାର କରି ପ୍ରଥମେ ବୋଲଗଡ଼ ଓ ପରେ ଖୋର୍ଦ୍ଧା ଜିଲା ସ୍ୱାସ୍ଥ୍ୟକେନ୍ଦ୍ରକୁ ପଠାଇଛନ୍ତି। ବୋଲଗଡ଼ ପୁଲିସ ପହଁଚି ଗାଡିକୁ ଜବତ କରି ତଦନ୍ତ ଚଳାଇ ଥିବା ବେଳେ ୩ଜଣଙ୍କର ଗୋଡ଼ ଭାଙ୍ଗି ଥିବା ଡାକ୍ତର ସୂଚନା ଦେଇଛନ୍ତି।
