ବାଉଁଶବୁଦା ଉହାଡରୁ ଯୁବକଙ୍କ ମୃତଦେହ ଉଦ୍ଧାର; ହତ୍ୟା ଅଭିଯୋଗ ଆଣିଲେ ପରିବାର ଲୋକେ

ରେଙ୍ଗାଲି: ଶାସନ ଥାନା ଅନ୍ତର୍ଗତ କୁମ୍ଭାରକଟା ଚାରପଡ଼ାର ଅନତି ଦୂରରେ ଏକ ବାଉଁଶବୁଦା ଉହାଡରେ ଜନୈକ ଯୁବକଙ୍କ ମୃତଦେହ ଶାସନ ପୁଲିସ ଉଦ୍ଧାର କରିଛି। ମୃତ ଯୁବକ ଜଣକ ଭାଲୁବାହଲ ଗ୍ରାମର ପଦ୍ମଲୋଚନ ପ୍ରଧାନ(୩୨) ବୋଲି ଜଣାପଡ଼ିଛି।

ବାଉଁଶ ବୁଦା ପାଖରେ ଏକ ମୃତଦେହ ପଡ଼ିଥିବାର ଦେଖି ସ୍ଥାନୀୟ ଲୋକେ ପୁଲିସକୁ ସୂଚନା ଦେଲାପରେ ଆଇଆଇସି ଲୋକନାଥ ସାହୁ ସଦଳବଳେ ଘଟଣା ସ୍ଥଳରେ ପହଞ୍ଚି ମୃତଦେହ ଉଦ୍ଧାର କରାଇ ପଞ୍ଚନାମା କଲାପରେ ବ୍ୟବଚ୍ଛେଦ ପାଇଁ ପଠାଇଥିବାର ପ୍ରକାଶ। ସଦର ଏସଡିପିଓ ପ୍ରଦୀପ କୁମାର ସାହୁ ମଧ୍ୟ ସାଇଣ୍ଟିଫିକ୍‍ ଟିମ୍‍ ସହ ଘଟଣା ସ୍ଥଳରେ ପହଞ୍ଚି ସରଜମିନ ଅନୁଧ୍ୟାନ କରିଥିବା ଜଣାପଡ଼ିଛି। ଅପରପକ୍ଷେ ପଦ୍ମଲୋଚନଙ୍କୁ ହତ୍ୟା କରାଯାଇଛି ବୋଲି ପରିବାର ଲୋକେ ଥାନାରେ ଅଭିଯୋଗ କରିଛନ୍ତି ବୋଲି ଆଇଆଇସି ଲୋକନାଥ ସାହୁଙ୍କ ସୂତ୍ରରୁ ପ୍ରାପ୍ତ ସୂଚନାରୁ ଜଣାପଡ଼ିଛି। ମୃତ ପଦ୍ମଲୋଚନ ରେଳବିଭାଗର ଗେଟ୍‍ ମ୍ୟାନ୍‍ କାମ କରୁଥିଲେ। ଝାରସୁଗୁଡାରେ ସେ ଅବସ୍ଥାପିତ ଥିଲେ ବୋଲି ଜଣାପଡ଼ିଛି। ଏସଂକ୍ରାନ୍ତରେ ଏକ ମାମଲା ରୁଜ୍ଜୁ କରାଯାଇ ତଦନ୍ତ ଜାରି ରହିଛି ବୋଲି ଆଇଆଇସି ଶ୍ରୀ ସାହୁ କହିଛନ୍ତି।