ସମାଜ ଡିଜିଟାଲ ଡେସ୍କ: ହୋଲିରେ ମୁସଲମାନମାନଙ୍କୁ ଘର ଭିତରେ ରହିବାକୁ ପରାମର୍ଶ ଦେଇ ବିବାଦ ଘେରକୁ ଆସିଛନ୍ତି ବିହାରର ବିଜେପି ବିଧାୟକ ହରିଭୂଷଣ ଠାକୁର ବାଚୋଲ। ହୋଲି ଶୁକ୍ରବାର ପଡ଼ୁଥିବାରୁ କୌଣସି ପ୍ରକାର ବିଶୃଙ୍ଖଳା ନ ହେବାକୁ ଦୃଷ୍ଟିରେ ରଖି ହିନ୍ଦୁମାନଙ୍କୁ ସେମାନଙ୍କୁ ଉତ୍ସବ ପାଳନ କରିବାକୁ ଦିଆଯାଉ ବୋଲି ବାଚୋଲ କହିବା ପରେ ଏହାକୁ ନେଇ ବିବାଦ ସୃଷ୍ଟି ହୋଇଛି। ବିଧାନସଭା ପରିସରରେ ସାମ୍ବାଦିକମାନଙ୍କୁ ମନ୍ତବ୍ୟ ଦେବା ଅବସରରେ ସେ ଏହା କହିଛନ୍ତି।
ବାଚୋଲ କହିଥିଲେ, ମୁଁ ମୁସଲମାନମାନଙ୍କୁ ଅନୁରୋଧ କରୁଛି ଯେ, ବର୍ଷକରେ ୫୨ଟି ଶୁକ୍ରବାର ରହିଛି। ସେଥିରୁ ଗୋଟିଏ ଶୁକ୍ରବାର ଦିନରେ ହୋଲି ପଡୁଛି। ତେଣୁ ସେମାନେ ହିନ୍ଦୁମାନଙ୍କୁ ଏହି ଉତ୍ସବ ପାଳନ କରିବାକୁ ଦିଅନ୍ତୁ ଏବଂ ଯଦି ଭୁଲବଶତଃ ସେମାନଙ୍କ ଦେହରେ ରଙ୍ଗ ପଡ଼ିଯାଉଛି, ତେବେ ତାହାକୁ ଅପରାଧ ବୋଲି ବିଚାର କରନ୍ତୁ ନାହିଁ। ଯଦି ହୋଲିର ରଙ୍ଗ ସେମାନଙ୍କ ପାଇଁ ସମସ୍ୟା ସୃଷ୍ଟି କରୁଛି, ତେବେ ସେମାନେ ଘର ଭିତରେ ରୁହନ୍ତୁ। ସାମ୍ପ୍ରଦାୟିକ ସଦଭାବନା ବଜାୟ ରଖିବା ଲାଗି ଏହା ନିତାନ୍ତ ଆବଶ୍ୟକ ବୋଲି ବାଚୋଲ କହିଥିଲେ।
ବାଚୋଲଙ୍କ ଏପରି ମନ୍ତବ୍ୟକୁ ନେଇ ପ୍ରଶ୍ନ ଉଠାଇଛନ୍ତି ଆରଜେଡି ବିଧାୟକ ତଥା ପୂର୍ବତନ ମନ୍ତ୍ରୀ ଇସ୍ରେଲ ମନସୁରୀ। ସେ କହିଛନ୍ତି, ଯେତେବେଳେ ଉତ୍ସବ କଥା ଉଠେ, ସେତେବେଳେ ହିନ୍ଦୁ ଓ ମୁସଲମାନଙ୍କ ମଧ୍ୟରେ କେବେଳ ସମସ୍ୟା ଉପୁଜେନାହିଁ। ହିନ୍ଦୁମାନେ ଆମ ଇଫତାର ପାର୍ଟିରେ ଯୋଗଦିଅନ୍ତି। ତେବେ ବିଜେପି ବିଧାୟକ କାହିଁକି ହୋଲିକୁ ନେଇ ଚିନ୍ତା କରୁଛନ୍ତି। ଏଭଳି ବ୍ୟକ୍ତିବିଶେଷ ରାଜନୈତିକ ସମସ୍ୟା ସୃଷ୍ଟି କରିବା ଲାଗି ସମ୍ପ୍ରଦାୟକୁ ନେଇ ଉତ୍ତେଜିତ ମନ୍ତବ୍ୟ ଦିଅନ୍ତି ଏବଂ ନିଜକୁ ସନାତନୀ ବୋଲି ପରିଚୟ ଦେଇଥାଆନ୍ତି। ତେବେ ଜେଡିୟୁ ନେତା ତଥା ସଂଖ୍ୟାଲଘୁ ବ୍ୟାପାର ମନ୍ତ୍ରୀ ଜାମା ଖାନ ଏପରି କୌଣସି ଅପ୍ରୀତିକର ପରିସ୍ଥିତି ସୃଷ୍ଟି ହେବ ନାହିଁ ବୋଲି କହିଛନ୍ତି।
Comments are closed.