ଚୌଦ୍ୱାର : ଚୌଦ୍ୱାର-କଟକ ବିଜୁ ଜନତା ଦଳ ତରଫରୁ ଚୌଦ୍ୱାର ସହରରେ ଜନସମ୍ପର୍କ ପଦଯାତ୍ରା ଅନୁଷ୍ଠିତ ହୋଇ ଯାଇଛି। ପୂର୍ବତନ ବିଧାୟକ ପ୍ରଭାତ ରଞ୍ଜନ ବିଶ୍ୱାଳଙ୍କ ପରିଚାଳନାରେ ଆୟୋଜିତ ଏହି କାର୍ଯ୍ୟକ୍ରମରେ ଗୃହ ଓ ନଗର ଉନ୍ନୟନ ମନ୍ତ୍ରୀ ତଥା ଦଳର କଟକ ଜିଲା ପର୍ଯ୍ୟବେକ୍ଷକ ଉଷା ଦେବୀ ଅତିଥି ଭାବେ ଯୋଗ ଦେଇଥିଲେ। ଚୌଦ୍ୱାର ଅଞ୍ଚଳର ବହୁ ସଂଖ୍ୟକ ଦଳୀୟ ନେତା, କର୍ମୀ, ଯୁବକ, ଛାତ୍ର, ମହିଳା ସଂଗଠନର ସଦସ୍ୟା ବୃନ୍ଦ ତଥା ସାଧାରଣ ଜନତା ମନ୍ତ୍ରୀଙ୍କୁ ବିରୂପା ନଦୀ ବ୍ୟାରେଜ ନିକଟରେ ବିପୁଳ ସମ୍ବର୍ଦ୍ଧନା ଜ୍ଞାପନ କରିବା ପରେ ଶୋଭାଯାତ୍ରାରେ ନେଇ ପୌର ପାଳିକାର ୧୯ଟି ଯାକ ୱାର୍ଡ଼ ପରିକ୍ରମା କରିଥିଲେ।ମନ୍ତ୍ରୀ ଉଷାଦେବୀ, ସ୍ଥାନୀୟ ବିଧାୟକ ସୌଭିକ୍ ବିଶ୍ୱାଳ, ପୌରାଧ୍ୟକ୍ଷା ମାନସୀ ସ୍ୱର୍ଣ୍ଣପ୍ରଭା ସାମଲ, ଉପାଧ୍ୟକ୍ଷ ଶୁଭେନ୍ଦୁ ସାମଲ, କଟକ ଜିଲା ଉପ ସଭାପତି ପ୍ରେମଚାନ୍ଦ ନାୟକ, ନଗର ସଭାପତି ବିଷ୍ଣୁ ଚରଣ ପରିଡ଼ା,ରାଜ୍ୟ ଯୁଗ୍ମ ସମ୍ପାଦକ ଅର୍ଜୁନ ପଣ୍ଡା,ନଗର ଯୁବ ସଭାପତି ଶାରଦା ରଞ୍ଜନ ପରିଜା, ଛାତ୍ର ସଭାପତି ଭରତ ଚନ୍ଦ୍ର ସାହୁ, ସମସ୍ତ ଦଳୀୟ କାଉନସିଲର ପଦଯାତ୍ରାରେ ୱାର୍ଡ଼ ପରିକ୍ରମା କରିବା ସମୟରେ ସ୍ଥାନୀୟ ଜନ ସାଧାରଣଙ୍କୁ ଭେଟି ରାଜ୍ୟ ସରକାରଙ୍କ ବିଭିନ୍ନ ଜନ କଲ୍ୟାଣ ଯୋଜନା ସମ୍ପର୍କରେ ଅବଗତ କରାଇବା ସହିତ ରାଜ୍ୟର ବିକାଶ ଧାରାରେ ସାମିଲ ହେବାକୁ ଅନୁରୋଧ କରିଥିଲେ। ପଦଯାତ୍ରା ବିରୂପା ବ୍ୟରେଜ ନିକଟରୁ ବାହାରି ଚୌଦ୍ୱାର ଗ୍ରାମ, ଓଟିଏମ୍ କଲୋନୀ, ହାଉସିଂ ବୋର୍ଡ଼, ଟେନାମେଣ୍ଟ, ବିରାଟ ବଜାର, କଳିଙ୍ଗ ଛକ, ଟିପିଏମ୍ ଆଦି ଅଞ୍ଚଳପରିକ୍ରମା କରି ଗୋଡ଼ି ପାଟଣା ନିକଟରେ ଉଦ୍ୟାପିତ ହୋଇଥିଲା। ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ଦ୍ୱାରା କାର୍ଯ୍ୟକାରୀ କରାଯାଉଥିବା ବିଭିନ୍ନ ଜନାଭିମୁଖି ଯୋଜନା ସମ୍ପର୍କରେ ଜନ ସାଧାରଣଙ୍କୁ ଅବଗତ କରାଇବା ଓ କଲ୍ୟାଣକାରୀ ଯୋଜନା ଲୋକ ମାନଙ୍କ ପାଖରେ ଠିକ୍ ଭାବରେ ପହଞ୍ଚୁଛି କି ନାହଁ ତାହା ଜାଣିବା ଏହି ଜନ ସମ୍ପର୍କ ଯାତ୍ରାର ଲକ୍ଷ ବୋଲି ମନ୍ତ୍ରୀ ଉଷାଦେବୀ ଓ ବିଧାୟକ ଶ୍ରୀ ବିଶ୍ୱାଳ ସୂଚନା ଦେଇଥିଲେ ।
Comments are closed.