ବିନିକା : ସୁବର୍ଣ୍ଣପୁର ଜିଲା ବିନିକା ସହର ଓ ଅଞ୍ଚଳରେ କିଛି ବର୍ଷ ଧରି ଖୁଚୁରା ପଇସା ଅଚଳ ଗୁଜବକୁ ନେଇ ସଚେତନ ନାଗରିକ ମହଲରେ ତୀବ୍ର ପ୍ରତିକ୍ରିୟା ପ୍ରକାଶ ପାଉଛି। କାରଣ ଦୋକାନ ବଜାର ଓ ବିଭିନ୍ନ ସ୍ଥାନରେ ଥିବା ସାପ୍ତାହିକ ବଜାର ଗୁଡିକରେ ସଚେତନତା ଅଭାବରୁ ବିଶେଷକରି ୧ ଓ ୨ ଟଙ୍କିକିଆ ଖୁଚୁରା ପଇସା ଅଚଳ ଗୁଜବ ସୃଷ୍ଟି ହେଉଥିବା ନେଇ ସାଧାରଣରେ ଅଭିଯୋଗ ହେବା ପରେ ଏନେଇ ସବୁଠି ଲୋକେ ହଇରାଣ ହେଉଥିବା ଅଭିଯୋଗ ହେଉଛି। ଦୋକାନ ଓ ବଜାର ଗୁଡ଼ିକୁ ଲୋକେ ସାମଗ୍ରୀ କିଣିବାକୁ ଯାଇ ସେଠାରେ ଏସବୁ ପ୍ରକାର ଖୁଚୁରା ପଇସା ଅଚଳ ଗୁଜବ ସୃଷ୍ଟି ହେଉଥିବାରୁ ସାଧାରଣ ଗ୍ରାହକ ବହୁ ଅସୁବିଧାର ସମ୍ମୁଖୀନ ହେଉଥିବା କୁହା ଯାଉଛି।
ତେବେ ସମସ୍ୟା ବର୍ଷବର୍ଷ ଧରି ସୃଷ୍ଟି ହୋଇଥିଲେ ମଧ୍ୟ ସମସ୍ୟାର ସମାଧାନ ନେଇ ଆଜି ପର୍ଯ୍ୟନ୍ତ କେହି କୌଣସି ପ୍ରକାର ଆବଶ୍ୟକ ପଦକ୍ଷେପ ଗ୍ରହଣ କରି ଖୁଚୁରା ପଇସା ସଚଳ ବୋଲି ସଚେତନତା କରାଉ ନଥିବାରୁ ଆଜିର ଦିନରେ ଅଞ୍ଚଳବାସୀ ଏଭଳି ପରିସ୍ଥିତି ଭୋଗୁଥିବା ଅଭିଯୋଗ ହେଉଛି। ଏନେଇ ଜନ ସାଧାରଣରେ ବାରମ୍ବାର ଅଭିଯୋଗ ସତ୍ତ୍ବେ ମଧ୍ୟ ପ୍ରଶାସନ କିମ୍ବା କୌଣସି ବ୍ୟାଙ୍କ ତରଫରୁ ଲୋକଙ୍କୁ ସଚେତନ କରୁ ନଥିବାରୁ ଲୋକେ ଅସୁବିଧାରେ ପଡ଼ୁଥିବା କୁହା ଯାଉଛି। ତେଣୁ ସମସ୍ୟା ସମ୍ପର୍କରେ ଜିଲା ପ୍ରଶାସନ ଏବଂ ରାଜ୍ୟ ସରକାର ଦୃଷ୍ଟିଦେଇ ତୁରନ୍ତ ଆବଶ୍ୟକ ପଦକ୍ଷେପ ଗ୍ରହଣ କରିବାକୁ ଜନ ସାଧାରଣରେ ଦାବି ହେଉଛି।
