ଭୁବନେଶ୍ୱର- ରାଜଧାନୀର ବ୍ୟସ୍ତ ବହୁଳ ସହିଦ ନଗର ଅଞ୍ଚଳରେ ଦୁର୍ବୃତ୍ତଙ୍କ ଆତଙ୍କରାଜ । ଦିନ ଦ୍ୱିପହରରେ ଏକ ସ୍କୁଲ୍ ବସ୍କୁ ରୋକି ଭଙ୍ଗାରୁଜା କରିବା ସହ ଛାତ୍ରଛାତ୍ରୀଙ୍କୁ ଆକ୍ରମଣ ଅଭିଯୋଗ । ସହିଦ ନଗର ଖଣ୍ଡୁଆଳୀ ମନ୍ଦିର ନିକଟରେ ଥିବା ପାର୍କରେ କିଛି ଦୁର୍ବୃତ୍ତ ବସି ଦିନ ସମୟରେ ମଦ ପିଉଥିବା ସ୍ଥାନୀୟ ବାସିନ୍ଦା ଅଭିଯୋଗ କରିଛନ୍ତି ।
ସୋମବାରର ଦ୍ୱିପହର ସମୟରେ ଏକ ସ୍କୁଲ୍ ବସ୍ ସେହି ରାସ୍ତା ଦେଇ ଯାଉଥିବା ବେଳେ ବସ୍ରୁ କେହି କିଛି ତାଙ୍କୁ କହିଥିବା ଅଭିଯୋଗ କରି ମଦ୍ୟପ ଯୁବକମାନେ ତାହାକୁ ଅଟକାଇବା ସହ ବସ୍ ଭିତରେ ବସି ଛାତ୍ରଛାତ୍ରୀଙ୍କୁ ଆକ୍ରମଣ କରିଥିଲେ । ବସ୍ରେ ଭଙ୍ଗାରୁଜା ମଧ୍ୟ କରିଥିଲେ । ଏହାକୁ ସ୍ଥାନୀୟ ବାସିନ୍ଦା ବିରୋଧ କରିବାରୁ ସେମାନଙ୍କୁ ମଧ୍ୟ ଆକ୍ରମଣ କରିଥିଲେ । ପିସିଆର୍କୁ ଖବର ଦେବାରୁ ବହୁ ବିଳମ୍ବରେ ସେହି ସ୍ଥାନରେ ପହଞ୍ଚିଥିବା ଅଭିଯୋଗ ହୋଇଛି ।
ପୁଲିସ ଘଟଣାସ୍ଥଳରେ ପହଞ୍ଚି ଏହାର ତଦନ୍ତ କରିଛି । ସ୍ଥାନୀୟ ସହିଦ ନଗର ଏବଂ ଭିଏସ୍ଏସ୍ ନଗରରେ ଠିକ୍ ଭାବେ ପୋଲିସ୍ ପାଟ୍ରୋଲିଂ ହେଉନଥିବ ଅଭିଯୋଗ ହୋଇଛି । ଏହାର ସୁଯୋଗ ନେଇ ଦୁର୍ବୃତ୍ତମାନେ ରାସ୍ତା କଡରେ ମଦ୍ୟପାନ ସହ ବିଭିନ୍ନ ଅସାମାଜିକ କାର୍ଯ୍ୟକରୁଥିବା ସ୍ଥାନୀୟ ବାସିନ୍ଦା ପ୍ରକାଶ କରିଛନ୍ତି । ଆଇନ ପ୍ରତି ସେମାନଙ୍କ ଭୟ ନଥିବା ଏଥିରୁ ସ୍ପଷ୍ଟ ପ୍ରତୀୟମାନ ହେଉଛି । ପୋଲିସ୍ ପାଟ୍ରୋଲିଂକୁ କଡା କଡି କରିବା ସହ ଏହି ଅସାମାଜିକ ବ୍ୟକ୍ତିଙ୍କ ବିରୋଧରେ କଡା କାର୍ଯ୍ୟାନୁଷ୍ଠାନ ପାଇଁ ଦାବି ହୋଇଛି ।
