ବରୀ: ଅପହରଣ କରୁଥିବା କାର୍ ଦୁର୍ଘଟଣାଗ୍ରସ୍ତ ହେବା ପରେ ଚାଳକକୁ ଗିରଫ କରିଛି ପୁଲିସ। ଏପରି ଘଟଣା ଘଟିଛି ବରୀ ରାମଚନ୍ଦ୍ରପୁର ଥାନା ଅଞ୍ଚଳରେ। ଏହି ଥାନା ଅଧୀନ ଅନ୍ୟାସୀପୁର ଗ୍ରାମର ବିଚିତ୍ରାନନ୍ଦ ମଳିକଙ୍କୁ ଗତ ଶନିବାର ରାତିରେ ଅପହରଣ ଉଦ୍ୟମ କରାଯାଇଥିଲା। ତାଙ୍କୁ ଯେଉଁ କାର୍ରେ ଅପହରଣ କରି ଦ୍ରୁତ ଗତିରେ ନିଆଯାଉଥିଲା ସେଇ କାର୍ଟି ରାସ୍ତା କଡ଼ ଖାଲକୁ ଗଡ଼ିଯାଇ ଦୁର୍ଘଟଣା ଗ୍ରସ୍ତ ହୋଇଥିଲା। ଗାଡ଼ିରେ ଚାଳକଙ୍କୁ ଛାଡି ଅନ୍ୟ ତିନିଜଣ ଅପହର୍ତ୍ତା ଥିବାବେଳେ ସେମାନେ ଅନ୍ଧାରରେ ଦୌଡ଼ି ପଳାଇଥିଲେ।
ହୋ ହଲ୍ଲା ଶୁଣି ଗ୍ରାମବାସୀ ପହଞ୍ଚି ଗାଡ଼ି ଚାଳକଙ୍କୁ କାବୁ କରି ବରୀ ପୁଲିସକୁ ଖବର ଦେଇଥିଲେ। ପୁଲିସ ଗାଡ଼ିଟିକୁ ଜବତ କରିବା ସହିତ ଚାଳକ ବ୍ରାହ୍ମଣୀପାଳ ଥାନା ଅନ୍ତର୍ଗତ ସୁମିତ ସାହୁଙ୍କୁ ଗିରଫ କରି ଅଦାଲତ ପଠାଇଛି। ଏହି ଅପହରଣ ଘଟଣା ଏକ ମଇଁଶି କିଣାବିକାକୁ ନେଇ ହୋଇଥବାର ଜଣାପଡ଼ିଛି। ମଇଁଶି କିଣାବିକା ଘଟଣାରେ ବିଚିତ୍ରାନନ୍ଦ ମଧ୍ୟସ୍ଥି ଥିବାରୁ ତାଙ୍କୁ ଅପହରଣ କରି ନିଆଯାଉଥିଲା ବୋଲି ସ୍ଥାନୀୟ ଲୋକେ କହିଛନ୍ତି।
