ଏହି କମ୍ପାନୀ ଭାଙ୍ଗିଲା ସବୁ ରେକର୍ଡ ! ୩ ଦିନରେ ବିକିଲା ୨୬ ହଜାର ଗାଡି

ନୂଆଦିଲ୍ଲୀ : ବଜାଜ ଅଟୋ ଏଥର ମାର୍ଚ୍ଚ ଶେଷରେ ବାଇକ୍ ବିକ୍ରିରେ ରେକର୍ଡ କରିଛି । କମ୍ପାନୀ ୨୮ରୁ ୩୦ ମାର୍ଚ୍ଚ ମଧ୍ୟରେ ସମୁଦାୟ ୨୬,୯୩୮ ଗାଡି ବିକ୍ରି କରିଛି ଯେଉଁଥିରେ ମୋଟରସାଇକେଲ ଓ ଇଲେକ୍ଟ୍ରିକ୍ ସ୍କୁଟର ଚେତକ ସାମିଲ । ବଜାଜ ସୂଚନା ଅନୁସାରେ ଚଳିତ ବର୍ଷ ବିକ୍ରି ଗତ ବର୍ଷ ତୁଳନାରେ ପ୍ରାୟ ଦୁଇଗୁଣା ହୋଇଛି । ପୁଣେ ସ୍ଥିତ ବଜାଜ ଅଟୋ ୧୯,୦୧୭ ମୋଟରସାଇକେଲ ବିକିଛି ଯେଉଁଥିରେ ୬୫୭୦ ଇଲେକ୍ଟ୍ରିକ୍ ଚେତକ ସ୍କୁଟର ଡେଲିଭରୀ କରାଯାଇଛି । ଏହା ବ୍ୟତୀତ ୬୫୮ କେଟିଏମ୍ ଓ ୬୯୩ ଟ୍ରାଏମ୍ପ୍ ପ୍ରିମିୟମ୍ ବାଇକ ମଧ୍ୟ ବିକ୍ରି ହୋଇଛି ।

ବଜାଜର ଏହି ସଫଳତା ପଛରେ ଏହାର ମଜଭୁତ ଡିଲରସିପ୍ ନେଟଓ୍ବର୍କ ରହିଛି । କମ୍ପାନୀ ପାଖରେ ସାରା ଦେଶରେ ୧୨୦୦ରୁ ଅଧିକ ଡିଲର ଅଛନ୍ତି ଯାହା ବିକ୍ରି ହାରକୁ ବୃଦ୍ଧି କରିବାରେ ସହାୟକ ହେଉଛନ୍ତି । ଭାରତୀୟ ବଜାରରେ ଇଲେକ୍ଟ୍ରିକ୍ ଦୁଇଚକିଆ ଯାନ ବିକ୍ରି ବଢିବାରେ ଲାଗିଛି । ଏହି ତାଲିକାରେ ବଜାଜ ଅଟୋ ସବୁଠାରୁ ଆଗରେ ରହିଛି ୩୦,୧୩୩ ୟୁନିଟ୍ସର ବିକ୍ରି କରି ୨୫.୮ ପ୍ରତିଶତ ବଜାର ଭାଗିଦାରୀରେ କବଜା କରିଛି । ଅନ୍ୟପଟେ ଇଲେକ୍ଟ୍ରିକ୍ ଦୁଇଚକିଆ ବିକ୍ରି ତାଲିକାରେ ଟିଭିଏସ୍ ଓ ଓଲା ପଛରେ ପଡିଯାଇଛନ୍ତି । ବଜାଜ ଏହି କ୍ଷେତ୍ରରେ ଆଗରେ ରହିଛି ।