ଆଠଗଡ଼: ଆଠଗଡ଼ ବନଖଣ୍ଡ ଅନ୍ତର୍ଗତ ଆଠଗଡ଼ ବନାଞ୍ଚଳ ଅଧିନ ସୁକାସନ ସଂରକ୍ଷିତ ଜଙ୍ଗଲରେ ଏକ ୩୦ ବର୍ଷର ଅସୁସ୍ଥ ଦନ୍ତାହାତୀର ପ୍ରାଣୀ ଚିକିତ୍ସା ବିଶେଷଜ୍ଞଙ୍କ ଦ୍ୱାରା ଚିକିତ୍ସା କରାଯାଇଥିବା ଜଣାପଡିଛି। ଚନ୍ଦକା-ଡମପଡା ଅଭୟାରଣ୍ୟରୁ ଆସିଥିବା ୧୭ଟି ହାତୀ ଗତ କିଛିଦିନ ଧରି ଆଠଗଡ ବନଖଣ୍ଡକୁ ଚାଲି ଆସିଥିବା ବେଳେ ସେହି ହାତୀପଲଙ୍କ ମଧ୍ୟରୁ ଗୋଟିଏ ୩୦ ବର୍ଷର ଦନ୍ତାହାତୀ ଅସୁସ୍ଥ ଥିବା ହାତୀ ଜଗୁଆଳି ଓ ବନ କର୍ମଚାରୀଙ୍କଠାରୁ ରେଞ୍ଜର ଓ ଡିଏଫଓ ଜାଣିବାକୁ ପାଇଥିଲେ । ଛୋଟେଇ ଓ ଗୋଡ଼ ଘୋଷାରି ଚାଲୁଥିବା ଉକ୍ତ ହାତୀକୁ ଗତ ୫ ଦିନ ହେବ ବନବିଭାଗ ଦୃଷ୍ଟି ରଖିଥିଲା। ଏ ବିଷୟରେ ଆଠଗଡ଼ ବନଖଣ୍ଡ ଅଧିକାରୀ ଡାକ୍ତର ଜଜ୍ଞଦତ୍ତ ପତି ମୁଖ୍ୟ ବନ ସଂରକ୍ଷକ(ବନ୍ୟଜନ୍ତୁ)ଙ୍କୁ ଅବଗତ କରାଇ ହାତୀଟିର ଚିକିତ୍ସା ବ୍ୟବସ୍ଥା କରିବାକୁ ଅନୁରୋଧ କରିଥିଲେ । ପିସିସିଏଫ(ୱାଇଲ୍ଡ ଲାଇଫ୍)ଙ୍କ ନିର୍ଦ୍ଦେଶକ୍ରମେ ଭୁବନେଶ୍ବର ଓୟୁଏଟିର ବିଶେଷଜ୍ଞ ଡାକ୍ତର ଇନ୍ଦ୍ରମଣି ନାଥ, ନନ୍ଦନକାନନରୁ ମେଟାଲ ଡିଟେକଟର ଦୁଷ୍ମନ୍ତ ମାଝୀ, ଚନ୍ଦକା ଅଭୟାରଣ୍ୟରୁ ମାହୁନ୍ତ ରାଜୁ ମାଝୀ ପ୍ରମୁଖ ରବିବାର ସକାଳେ ସୁକାସନ ସଂରକ୍ଷିତ ଜଙ୍ଗଲରେ ପଶି ଅସୁସ୍ଥ ହାତୀକୁ ନିଶ୍ଚେତକ(ଟ୍ରାଙ୍କୁଲାଇଜର) ଦେବା ପରେ ତାର ଚିକିତ୍ସା କରୁଥିଲେ । ହାତୀଟିର ପଛ ଡାହାଣ ଗୋଡ ପାଦରେ ଏକ ଛୋଟ କ୍ଷତ ଥିବା ଦେଖିବା ପରେ ଡାକ୍ତର ନାଥ ଆବଶ୍ୟକୀୟ ଔଷଧ ଲଗାଇ ଚିକିତ୍ସା କରିଇବା ପରେ ତାକୁ ଖୋଲା ବିଚରଣ ପାଇଁ ଛାଡି ଦିଆଯାଇଥିଲା। ବନାଞ୍ଚଳର ଅଧିକାରୀ ରବିନ୍ଦ୍ର କୁମାର ନାୟକଙ୍କ ସମେତ ଅନ୍ୟାନ୍ୟ ବନକର୍ମଚାରୀମାନେ ହାତୀର ଚିକିତ୍ସା କରିବାରେ ସହଯୋଗ କରିଥିଲେ।
Popular Categories
Previous article
Next article