ଦେଓଗାଁ/ସଇଁତଲା : ରେଳ ବିଭାଗର ସତେ ଯେମିତି ଚାଲିଛି ଶନି ଦଶା। ବହାନଗା ଷ୍ଟେସନରେ ରେଳ ଦୁର୍ଘଟଣା ପରଠାରୁ ଗୋଟିଏ ପରେ ଗୋଟିଏ ଷ୍ଟେସନ ଅଞ୍ଚଳରେ ଟ୍ରେନଗୁଡ଼ିକରେ ଦେଖାଦେଉଛି ତ୍ରୁଟି। କେଉଁଠି ବଗିରେ ଧୁଆଁ ବାହାରୁଛି ତ ପୁଣି କେଉଁଠି ବଗିକୁ ଛାଡ଼ି ପଳାଉଛି ଇଞ୍ଜିନ। ରବିବାର ବଲାଙ୍ଗୀର ଜିଲ୍ଲାର ସଇଁତଲା ଷ୍ଟେସନଠାରେ ଇସ୍ପାତ ଏକ୍ସପ୍ରେସ ଇଞ୍ଜିନରେ ତ୍ରୁଟି ଦେଖାଦେବାରୁ ୨ଘଣ୍ଟା ଧରି ଟ୍ରେନଟି ସେଠାରେ ଅଟକି ରହିଥିଲା। ଫଳରେ ଟ୍ରେନ ଯାତ୍ରୀ ନାହିଁ ନ ଥିବାର ଅସୁବିଧାର ସମ୍ମୁଖୀନ ହୋଇଥିବା ଦେଖିବାକୁ ମିଳିଛି।
ପ୍ରକାଶ ଥାଉକି, ଟିଟିଲାଗଡ ପଟରୁ ହାୱଡ଼ା ଯାଉଥିବା ହାୱଡ଼ା ଇସ୍ପାତ ଏକ୍ସପ୍ରେସ ସଇଁତଳା ଷ୍ଟେସନକୁ ୫.୪୫ରେ ପହଞ୍ଚିବାକୁ ଥିବା ବେଳେ ରବିବାର ସକାଳ ୫.୫୦ରେ ପହଞ୍ଚିଥିଲା। ହେଲେ ଇଞ୍ଜିନରେ କୌଣସି ଯାନ୍ତ୍ରିକ ତ୍ରୁଟି ଥିବାରୁ ଏହି ଟ୍ରେନଟି ଦୀର୍ଘ ସମୟ ଧରି ଅଟକି ରହିଥିଲା। ସଇଁତଲା ଷ୍ଟେସନରେ ଅଟକି ରହିଥିବା ମାଲବାହୀ ଟ୍ରେନ ଇଞ୍ଜିନ ସହାୟତାରେ ଇସ୍ପାତ ଏକ୍ସପ୍ରେସ ୭.୫୫ରେ ସଇଁତଳା ଷ୍ଟେସନ ଛାଡିଥିବା ନେଇ ରେଳ ବିଭାଗ ପକ୍ଷରୁ ସୂଚନା ମିଳିଛି। ଯଦି ଟ୍ରେନ ଇଞ୍ଜିନରେ ତ୍ରୁଟି ଥିଲା, ତାହେଲେ ହଜାର ହଜାର ଲୋକଙ୍କୁ ନେଇ କାହିଁକି ଟ୍ରେନଟି ଗନ୍ତବ୍ୟ ସ୍ଥଳକୁ ଆଗଭର ହୋଇଥିଲା ବୋଲି ଯାତ୍ରୀମାନେ ପ୍ରଶ୍ନ କରିଛନ୍ତି। ଏଣୁ ଦୋଷୀ ବିରୁଦ୍ଧରେରେ କାର୍ଯ୍ୟାନୁଷ୍ଠାନ ପାଇଁ ସେମାନେ ଦାବୀ କରିଛନ୍ତି।
