ଆଠଗଡ: ଆଠଗଡ ସହରର ମାଛ ବଜାର ରାସ୍ତାଟି ଖାଲଖମାରେ ପରିପୂର୍ଣ୍ଣ ହୋଇ ଦୟନୀୟ ସ୍ଥିତିରେ ରହିଛି । ଗୋପବନ୍ଧୁ ଛକଠାରୁ ମାଛ ବଜାର, ଉପକାରାଗାର ଓ ବାଳିକା ହାଇସ୍କୁଲ ଦେଇ ନୃସିଂହ ମନ୍ଦିର ପର୍ଯ୍ୟନ୍ତ ପ୍ରାୟ ୫ଶହ ମିଟର ବିଶିଷ୍ଟ ଏହି ବ୍ୟସ୍ତବହୁଳ ରାସ୍ତାଟିଏ ଏପରି ଅବସ୍ଥା ପ୍ରତି ପୂର୍ତ୍ତ ବିଭାଗ କର୍ତ୍ତୃପକ୍ଷ ଉଦାସୀନ ରହିଛନ୍ତି। ଏହି ରାସ୍ତା ଦେଇ ପ୍ରତିଦିନ ବାଳିକା ହାଇସ୍କୁଲ, ବିଶ୍ଵନାଥ ବିଦ୍ୟାପୀଠ ଓ ବିଶ୍ଵନାଥ ଆଦର୍ଶ ପ୍ରାଥମିକ ବିଦ୍ୟାଳୟର ଶହ ଶହ ଛାତ୍ରଛାତ୍ରୀ ଯିବାଆସିବା କରିଥାଆନ୍ତି । ଆଠଗଡର ସମସ୍ତ ବଜାରଘାଟକୁ ଯିବାଆସିବା ଲାଗି ଅଞ୍ଚଳର ଅର୍ଦ୍ଧାଧିକ ଜନସାଧାରଣ ଏହି ରାସ୍ତା ଉପରେ ନିର୍ଭରଶୀଳ ଥିବା ବେଳେ ବହୁ ଯାନବାହାନ ଚଳାଚଳ କରିଥାଏ ।
କିନ୍ତୁ ରାସ୍ତାର ବିଭିନ୍ନ ସ୍ଥାନରେ ବିଶେଷକରି ମାଛ ବଜାର ନିକରରେ ବହୁ ଖାଲଖମା ଏବଂ ରାସ୍ତା ଦୁଇ ପାର୍ଶ୍ୱରେ ଅନେକ ଯାଗାରେ ପିଚୁ ଧୋଇଯାଇ ଗାତ ସୃଷ୍ଟି ହେଇଛି। ଫଳରେ ଉକ୍ତ ରାସ୍ତାରେ ଯାତାୟାତ କଷ୍ଟକର ଓ ବିପଦପୂର୍ଣ୍ଣ ହୋଇପଡୁଛି। ଅନେକ ସମୟରେ ମଧ୍ଯ ବାଇକ ଆରୋହୀ ଓ ପଥଚାରୀ ଦୁର୍ଘଟଣାର ସମ୍ମୁଖୀନ ହେଉଛନ୍ତି । ଗତ ଦଶହରା ପୂର୍ବରୁ ଉପଜିଲ୍ଲାପାଳ ସହରର ସମସ୍ତ ରାସ୍ତା ମରାମତି କରିବାକୁ ନିର୍ଦେଶ ଦେଇଥିଲେ ।
କେତେକ ରାସ୍ତା ପୂର୍ତ୍ତ ବିଭାଗ କର୍ତ୍ତୃପକ୍ଷ ମରାମତି କରିଥିଲେ ହେଁ ଏହି ବ୍ୟସ୍ତବହୁଳ ମାଛ ମାର୍କେଟ ରାସ୍ତାଟିକୁ ଅଣଦେଖା କରିଦେଇଥିଲେ । ସାଧାରଣରେ ଏଥିପାଇଁ ତୀବ୍ର ଅସନ୍ତୋଷ ସୃଷ୍ଟି ହୋଇଛି । କିଛିଦିନ ପୂର୍ବରୁ କେତେକ ଗଣମାଧ୍ୟମ ପ୍ରତିନିଧି ଏହି ରାସ୍ତା ସମ୍ପର୍କରେ ପୂର୍ତ୍ତ ବିଭାଗ ସହକାରୀ ନିର୍ବାହୀ ଯନ୍ତ୍ରୀଙ୍କ ଦୃଷ୍ଟି ଆକର୍ଷଣ କରିଥିଲେ । ଖୁବଶୀଘ୍ର ରାସ୍ତାର ମରାମତି ବା ନବୀକରଣ କରାଯିବ ବୋଲି ସହକାରୀ ନିର୍ବାହୀ ଯନ୍ତ୍ରୀ କହିଥିଲେ ମଧ୍ଯ ଏ ପର୍ଯ୍ୟନ୍ତ ଏ ଦିଗରେ କୌଣସି ପଦକ୍ଷେପ ଗ୍ରହଣ କରାଯାଇନାହିଁ । ଆଠଗଡ ସହର ମଧ୍ଯସ୍ଥ ଏହି ଜନଗହଳିପୁର୍ଣ୍ଣ ତଥା ବ୍ୟସ୍ତବହୁଳ ରାସ୍ତାଟିର ସମ୍ପୂର୍ଣ୍ଣ ନବୀକରଣ କରିବାକୁ ଦାବି ହେଉଛି ।
