ରେଙ୍ଗାଲିକ୍ୟାମ୍ପ: ବରଗଡ଼ ଜିଲ୍ଲା ଅତାବିରା ଏନଏସି ଅନ୍ତର୍ଗତ ରେଲୱେ ଷ୍ଟେସନ ନିକଟରେ ଥିବା କୋଟି କୋଟି ଟଙ୍କାର ସାଢେ଼ ଛଅ ହଜାର ମାଟ୍ରିକ ଟନର ପଣ୍ୟାଗାର(ୱେର ହାଉସ୍)ରେ ଦୀର୍ଘ ବର୍ଷେ ହେବ ତାଲା ଝୁଲୁଛି। ଓଡ଼ିଶା ସରକାରଙ୍କ ଦ୍ୱାରା ୧୯୮୩ ମସିହାରୁ ନିର୍ମାଣ ହୋଇଥିବା ଏହି ପଣ୍ୟାଗାରରେ ଶ୍ରମିକମାନେ କାର୍ଯ୍ୟରତ ରହି ପେଟ ପାଟଣା ଚଳାଇ ଆସୁଥିବାବେଳେ କେତେବେଳେ ଏଫସିଆଇ ତ ଆଉ କେତେବେଳେ ସିଭିଲ ସପ୍ଲାଇକୁ କାର୍ଯ୍ୟ ଦେଇ ଆଜି ପର୍ଯ୍ୟନ୍ତ ପାଖାପାଖି ଦୀର୍ଘ ବର୍ଷଟିଏ କାମ ବନ୍ଦ ହୋଇ ୱେର ହାଉସରେ ତାଲା ଝୁଲୁଛି। ଏପଟେ ଦିନ ମଜୁରିଆ ଏବେ ପରିବାରର ପେଟ ପାଟଣା ପାଇଁ ଦିନ ଗଣୁଛନ୍ତି। ଏହି ୱେର ହାଉସରେ ସମସ୍ତ ସୁବିଧା ଥାଇ ମଧ୍ୟ କିଭଳି ଭାବେ କାର୍ଯ୍ୟକୁ ବନ୍ଦ କରି ବେସରକାରୀ ଗୋଦାମଗୁଡ଼ିକୁ ପ୍ରାଧାନ୍ୟ ଦିଆଯାଉଛି ବୋଲି ଶ୍ରମିକମାନଙ୍କ ମନରେ ଅନେକ ପ୍ରଶ୍ନବାଚୀ ସୃଷ୍ଟି କରିଛି। ଏହା ସହ ଲାଦେର ପାଲି ଗୋଦାମ, ଗୋଡଭଗା ଲହଣ୍ଡା ରାସ୍ତାରେ ଥିବା ଗୋଦାମ ଘରଗୁଡ଼ିକରେ ବିଭିନ୍ନ ସମୟରେ ବହୁ ଗୁଡ଼ାଏ ସମସ୍ୟାକୁ ନେଇ ସ୍ଥାନୀୟ ଅଞ୍ଚଳରେ ଲୋକଙ୍କ ମଧ୍ୟରେ ଉତ୍ତେଜନା ବୃଦ୍ଧି ପାଇବା ସହ ବଡ ବଡ ପ୍ରଶାସନିକ ଅଧିକାରୀମାନଙ୍କ ଦୃଷ୍ଟି ଆଢ଼ୁଆଳରେ କାର୍ଯ୍ୟ ହେଉଛି। ହେଲେ ଯେଉଁଠି ସମସ୍ତ ସୁବିଧା ଅଛି ତାକୁ ଜାଣିଶୁଣି ଅଚଳ କରି ଶ୍ରମିକମାନଙ୍କ ଜୀବନ ସହ ଖେଳ ଖେଳୁଛନ୍ତି। ପାଖାପାଖି ୮୦ପରିବାରଙ୍କ ପେଟ ପାଟଣାକୁ ନେଇ ରାଜନୀତି କରୁଥିବା ଅଞ୍ଚଳର ସମ୍ପୃକ୍ତ ଅଧିକାରୀ ତଥା ପ୍ରଶାସନର ମଧୁ ଚନ୍ଦ୍ରିକାରେ ଦିନ ଗଣୁଛନ୍ତି ଦିନ ମଜୁରିଆ। ଏନେଇ ସଂପୃକ୍ତ ଅଧିକାରୀମାନଙ୍କୁ ଫୋନ୍ ମାଧ୍ୟମରେ ଯୋଗାଯୋଗ କରିଥିଲେ ମଧ୍ୟ କାହାରି ଦେଖା ନଥିଲା। ତେବେ ଏନେଇ ଧୀରେ ଧୀରେ ଦିନ ମଜୁରିଆମାନଙ୍କ ପେଟ ଚିନ୍ତା ବୃଦ୍ଧି ପାଇ ପରିବାର ଚଳାଇବା କଷ୍ଟକର ହୋଇପଡିଛି। ଏନେଇ ତୁରନ୍ତ ବିଭାଗୀୟ ଅଧିକାରୀ ତଥା ଜିଲ୍ଲା ପ୍ରଶାସନ ଦୃଢ଼ ପଦକ୍ଷେପ ଗ୍ରହଣ କରିବାକୁ ଦିନ ମଜୁରିଆଙ୍କ ଦାବୀ ରହିଛି। ନଚେତ୍ ଆଗାମୀ ଦିନରେ ଦିନ ମଜୁରିଆ ତଥା ପରିବାର ଲୋକେ ଆନ୍ଦୋଳନମୁହାଁ ହେବେ ବୋଲି ଚେତାବନୀ ଦେଇଛନ୍ତି।
Popular Categories
Previous article
Next article