ସମାଜ ଡିଜିଟାଲ ଡେସ୍କ: ବିହାରରେ ଭୋଟର ତାଲିକାର ସ୍ୱତନ୍ତ୍ର ପୁଙ୍ଖାନୁପୁଙ୍ଖ ସଂଶୋଧନକୁ ନେଇ ବିବାଦ ସମାପନ ହୋଇନଥିବା ବେଳେ ଏବେ ନିର୍ବାଚନ କମିଶନ ସାରା ଦେଶରରେ ଏସ୍ଆଇଆର୍ କରିବାକୁ ନିଷ୍ପତ୍ତି ନେଇଛନ୍ତି । ବିରୋଧୀ ଦଳ ଦୁଇ ଦିନ ଧରି ଏସ୍ଆଇଆର୍ ଉପରେ ସଂସଦରେ ହଙ୍ଗାମା କରୁଥିବା ବେଳେ ଏପରି ସ୍ଥିତିରେ ନିର୍ବାଚନ କମିଶନଙ୍କ ଏପରି ନିଷ୍ପତ୍ତି ଆଶ୍ଚର୍ଯ୍ୟଜନକ ହୋଇଛି । ତେବେ କମିଶନ କହିଛନ୍ତି ଯେ ଦେଶର ଅନ୍ୟ ଭାଗରେ ଏସ୍ଆଇଆର୍ ପାଇଁ କାର୍ଯ୍ୟଖସଡା ଯଥାଶୀଘ୍ର ପ୍ରକାଶ କରାଯିବ ।
ନିର୍ବାଚନ କମିଶନ କହିଛନ୍ତି ଯେ ଭୋଟର ପଞ୍ଜିକରଣ ନିୟମ ୧୯୬୦ ଅନୁଯାୟୀ ଭୋଟର ତାଲିକା ପ୍ରସ୍ତୁତ କରିବା ପାଇଁ ନିର୍ବାଚନ ଯନ୍ତ୍ରପାତି, ଯୋଗ୍ୟତା ସର୍ତ୍ତାବଳୀ, ପଦ୍ଧତି ଏବଂ ପ୍ରକ୍ରିୟା ବର୍ଣ୍ଣନା କରାଯାଇଛି । ସମ୍ବିଧାନର ଧାରା ୩୨୪ ଏବଂ ଜନପ୍ରତିନିଧି ଆଇନ ୧୯୫୦ ସଂସଦ ଏବଂ ରାଜ୍ୟ ବିଧାନସଭା ନିର୍ବାଚନ ପାଇଁ ଭୋଟର ତାଲିକା ପ୍ରସ୍ତୁତି ଏବଂ ପରିଚାଳନାର ତଦାରଖ, ନିର୍ଦ୍ଦେଶ ଏବଂ ନିୟନ୍ତ୍ରଣ ନିର୍ବାଚନ କମିଶନଙ୍କୁ ପ୍ରଦାନ କରେ । ଜନପ୍ରତିନିଧି ଆଇନ ୧୯୫୦ର ଧାରା ୨୧ ଅନୁଯାୟୀ କମିଶନଙ୍କ ଭୋଟର ତାଲିକାର ଏକ ସ୍ୱତନ୍ତ୍ର ପୁଙ୍ଖାନୁପୁଙ୍ଖ ସଂଶୋଧନକୁ ନିର୍ଦ୍ଦେଶ ଦେବାର ଅଧିକାର ରହିଛି । ଏଥିରେ କମିଶନ ଏକ ନୂତନ ଭୋଟର ତାଲିକା ପ୍ରସ୍ତୁତ କରିପାରିବେ । ଭୋଟର ତାଲିକାର ଶେଷ ସଂଶୋଧନ ୨୦୦୪ ମସିହାରେ କରାଯାଇଥିଲା । କମିଶନ କହିଛନ୍ତି ଯେ ପୂର୍ବରୁ ବିହାରରେ ୨୦୦୩ରେ ସଂଶୋଧନ ହୋଇଥିଲା ।
