ଆରଡି : ପ୍ରସିଦ୍ଧ ଶୈବପୀଠ ଆରଡିଧାମର ବାବା ଆଖଣ୍ଡଳମଣିଙ୍କ ମନ୍ଦିର ବେଢା ପ୍ରାଙ୍ଗଣରେ ଥିବା ମା ଜୟଦୁର୍ଗାଙ୍କ ଷୋଳପୂଜା ଆସନ୍ତା ଅକ୍ଟୋବର ୨ ଅର୍ଥାତ ପବିତ୍ର ମୂଳାଷ୍ଟମୀ ଠାରୁ ଦଶହରା ପ୍ରର୍ଯ୍ୟନ୍ତ ଅନୁଷ୍ଠିତ ହେବ। ଏଥିପାଇଁ ଗତ ରବିବାର ଅର୍ଥାତ ଅନନ୍ତବ୍ରତ ଅବସରରେ ମନ୍ଦିର ପ୍ରାଙ୍ଗଣରେ ପ୍ରସ୍ତୁତି ବୈଠକ ଅନୁଷ୍ଠିତ ହୋଇଯାଇଛି । ଉକ୍ତ ବୈଠକରେ ଷୋଳପୂଜା ସେବାକାରୀ, ପାଳିଆ ସେବାୟତଙ୍କ ସହ ମନ୍ଦିରର ବହୁ ସେବାୟତ ଉପସ୍ଥିତ ରହି ମାଙ୍କ ନୀତିକାନ୍ତି ଓ ପୂଜାର୍ଚ୍ଚନା ଉପରେ ଆଲୋଚନା କରିଥିଲେ। ବିଶେଷକରି ମାଁଙ୍କର ମୂଳାଷ୍ଟମୀ ଠାରୁ ଦଶହରା ପର୍ଯ୍ୟନ୍ତ ବିଭିନ୍ନ ବେଶରେ ସଜ୍ଜିତ କରାଯିବା ସହ ଘଟ ଉତ୍ତୋଳନ, ଚଣ୍ଡୀପାଠ, ଷୋଡଶ ଉପଚାର ପୂଜା ଆଦି ନିର୍ଦ୍ଧାରିତ ସମୟରେ ଅନୁଷ୍ଠିତ କରାଯିବା ପାଇଁ ନିଷ୍ପତ୍ତି ନିଆଯାଇଥିଲା। ଏଥିପୂର୍ବରୁ ମାଁଙ୍କ ମନ୍ଦିରକୁ ସଫେଇ କରାଯିବା ସହ ରଙ୍ଗକାର ସେବାୟତଙ୍କ ପକ୍ଷରୁ ମନ୍ଦିର ମୁଖଚାଳି, ପୂଜାମଣ୍ଡପ, ସିଂହଦ୍ୱାର, ଗମ୍ଭୀରଘର ଆଦି ରଙ୍ଗ କରାଯିବ ବୋଲି ସ୍ଥିର କରାଯାଇଥିଲା। ତାହାସହ ପୂଜାମଣ୍ଡପକୁ ରଙ୍ଗିନ ତୋରଣ ଓ ଆଲୋକମାଳାରେ ସଜ୍ଜିତ କରାଯିବା ପାଇଁ ନିଷ୍ପତ୍ତି ନିଆଯାଇଥିଲା। ଏହି ପୂଜା ମନ୍ଦିର ପ୍ରଶାସନ ଓ ସେବାୟତଙ୍କ ପକ୍ଷରୁ ଅନୁଷ୍ଠିତ ହବାସହ ଭିଡକୁ ଦୃଷ୍ଟିରେ ରଖି ସ୍ଥାନୀୟ ପୁଲିସ ଓ ମନ୍ଦିର ପ୍ରଶାସନ ପକ୍ଷରୁ ମନ୍ଦିର ଭିତର ଓ ବାହର ବେଢାରେ କଡା ସୁରକ୍ଷା ବ୍ୟବସ୍ଥା ଗ୍ରହଣ କରାଯିବ ବୋଲି ମନ୍ଦିର ପ୍ରଶାସନ ପକ୍ଷରୁ ପ୍ରକାଶ ପାଇଛି।
