ସମ୍ବଲପୁର : ସମ୍ବଲପୁର ଜିଲାରୁ ନିୟମିତ ଅବୈଧ ଭାବରେ ଗୋ ଚାଲାଣ କରାଯାଉଥିବାର ବିଭିନ୍ନ ସମୟରେ ଅଭିଯୋଗ ହୋଇ ଆସୁଛି। ଏଭଳି ଏକ ଘଟଣାକ୍ରମରେ ସମ୍ବଲପୁରର ଅଇଁଠାପାଲି ଥାନା ଅର୍ନ୍ତଗତ ରେମେଡ ସ୍ଥିତ ଚେପଟି ପୁଲିଆ ତଳେ ପଶ୍ଚିମବଙ୍ଗରେ ପଞ୍ଜିକୃତ ଏକ କଣ୍ଟେନରକୁ ପୁଲିସ ଜବତ କରିଛି। ସୂଚନାନୁଯାୟୀ, ପୋଲ ତଳେ ମଙ୍ଗଳବାର ବିଳମ୍ବିତ ରାତ୍ରିରେ ଏକ କଣ୍ଟେନରରେ ଗୋରୁ ଗାଈ ଭର୍ତ୍ତି କରାଯାଉଥିବାର ଦେଖି କିଛି ସ୍ଥାନୀୟ ଲୋକ ଏହାକୁ ବିରୋଧ କରିବା ସହିତ ପୁଲିସକୁ ଖବର ଦେଇଥିଲେ। ତେବେ ପୁଲିସ ଆସିବାରେ ବିଳମ୍ବ ହେବାରୁ ସ୍ଥାନୀୟ ଲୋକଙ୍କ ବିରୋଧ ଯୋଗୁଁ ଗାଡିର ଚାଳକ ଓ ଗୋରୁ ଆଣିଥିବା ବ୍ୟକ୍ତି ସେଠାରୁ ଫେରାର ହୋଇଯାଇଥିଲେ। ଏହା ପରେ ପ୍ରାୟ ୫୦ରୁ ଉର୍ଦ୍ଧ ଗାଈଗୋରୁଙ୍କୁ ଲୋକେ ଉଦ୍ଧାର କରି ବାହାରେ ଛାଡି ଦେଇଥିଲେ। ଏ ସର୍ମ୍ପକରେ ଅଇଁଠାପାଲି ଥାନାଧିକାରୀ କହିଛନ୍ତି ଯେ, ଖବର ଆସିବା ପରେ ତୁରନ୍ତ ପିସିଆର ଘଟଣାସ୍ଥଳକୁ ଯାଇଥିଲା। ତେବେ ସେ ସମୟରେ କଣ୍ଟେନରଟି ଖାଲି ରହିଥିବା ବେଳେ ଏହାର ଚାଳକ କି ଅନ୍ୟ କେହି ବ୍ୟକ୍ତି ନ ଥିବାରୁ ତାକୁ ଜବତ କରି ଥାନାରେ ରଖାଯାଇଛି। ଏହା ସହିତ ଯାନର ମାଲିକ ସହିତ ଯୋଗାଯୋଗ କରାଯାଇ ଘଟଣାର ତଦନ୍ତ କରାଯାଉଛି ବୋଲି ଥାନାଧିକାରୀ କହିଛନ୍ତି। ଅପର ପକ୍ଷରେ ପୁଲିସର କାର୍ଯ୍ୟଶୈଳୀ ଓ ଏଭଳି ଘଟଣା ଅଞ୍ଚଳରେ ନିୟମିତ ଘଟୁଥିବାର ଅଞ୍ଚଳବାସୀ ଅଭିଯୋଗ କରୁଛନ୍ତି। ଏଣୁ ଏହାକୁ ନେଇ ସ୍ଥାନୀୟ ଅଞ୍ଚଳବାସୀଙ୍କ ମଧ୍ୟରେ ଅସନ୍ତୋଷ ପ୍ରକାଶ ପାଇଛି।
Popular Categories
Previous article
Next article