ଡେସ୍କ: ଆତଙ୍କବାଦ ସର୍ବବୃହତ୍ ମାନବାଧିକାର ଲଙ୍ଘନ ବୋଲି ସ୍ୱରାଷ୍ଟ୍ର ମନ୍ତ୍ରୀ ଅମିତ୍ ଶାହା କହିଛନ୍ତି। ମାନବଜାତିର ସୁରକ୍ଷା ପାଇଁ ଏହାର ମୂଳୋତ୍ପାଟନ ନିହାତି ଜରୁରୀ ବୋଲି ସେ କହିଛନ୍ତି। ଆଜି ନୂଆଦିଲ୍ଲୀରେ ତ୍ରୟୋଦଶ ଜାତୀୟ ତଦନ୍ତକାରୀ ସଂସ୍ଥା (ଏନଆଇଏ) ଦିବସରେ ଶ୍ରୀ ଶାହା ଆତଙ୍କବାଦର ଲୋପ ପାଇଁ ପୂର୍ଣ୍ଣପ୍ରାଣରେ କାର୍ଯ୍ୟ କରିବାକୁ କହିଛନ୍ତି। ସେ କହିଛନ୍ତି, ନରେନ୍ଦ୍ର ମୋଦୀଙ୍କ ନେତୃତ୍ୱ ସରକାର ଆତଙ୍କବାଦର ମୂଳୋତ୍ପାଟନ କରିବାକୁ ସଙ୍କଳ୍ପବଦ୍ଧ ଓ ଏ ଦିଗରେ ସରକାର ଅହରହ କାର୍ଯ୍ୟ କରୁଛନ୍ତି।
ଦେଶରୁ ଆତଙ୍କବାଦ ଲୋପ କରିବା ପାଇଁ କେନ୍ଦ୍ର ସରକାର ଆଇନ ଓ ଅନୁଷ୍ଠାନଗୁଡ଼ିକୁ ଦୃଢ଼ କରୁଛନ୍ତି। ସେ କହିଛନ୍ତି, ଜାତୀୟ ତଦନ୍ତକାରୀ ସଂସ୍ଥାକୁ ମଜବୁତ୍ କରିବା ଓ ଆନ୍ତର୍ଜାତିକ ସ୍ତରରେ ଏହାକୁ ସ୍ୱୀକୃତି ପ୍ରଦାନ ପାଇଁ ସରକାର ସମସ୍ତ ସହାୟତା ଯୋଗାଇ ଦେବାକୁ ପ୍ରସ୍ତୁତ ଅଛନ୍ତି। ରାଜ୍ୟ ସରକାରଗୁଡ଼ିକର ବିଭିନ୍ନ ସଂସ୍ଥା ସହ ଯୋଗାଯୋଗ ରକ୍ଷା କରିବାକୁ ସେ ଜାତୀୟ ତଦନ୍ତକାରୀ ସଂସ୍ଥାକୁ ପରାମର୍ଶ ଦେଇଛନ୍ତି।
