ୱାଶିଂଟନ : ଆମେରିକା ରାଜ ରାସ୍ତାରେ ହଜାର ହଜାର ଟ୍ରମ୍ପ ସମର୍ଥକ ନିର୍ବାଚନ ଫଳାଫଳ ଗ୍ରହଣ କରିବାକୁ ମନା କରିବା ସହ ପୁନଃ ମତଗଣନା ପାଇଁ ଦାବି କରି ବିକ୍ଷୋଭ ପ୍ରଦର୍ଶନ କରିଛନ୍ତି। ଟ୍ରମ୍ପଙ୍କ ସମର୍ଥକମାନେ ଅଭିଯୋଗ କରି କହିଛନ୍ତି ଯେ ପେନସିଲଭାନିଆ, ନେଭାଡା ଭଳି ସ୍ଥାନରେ ଭୋଟ ଗଣତିରେ ଅନିୟମିତତା ହୋଇଛି। ଶନିବାର ଦିନ ୱାଶିଂଟନରେ ହଜାର ହଜାର ଟ୍ରମ୍ପ ସମର୍ଥକ ରାସ୍ତାରେ ବିକ୍ଷୋଭ ପ୍ରଦର୍ଶନ କରିଥିଲେ। ସେମାନେ ଅଭିଯୋଗ କରିଛନ୍ତି ଯେ ନିର୍ବାଚନରେ ବହୁ ପରିମାଣରେ ଅନିୟମିତତା ହୋଇଛି ଏବଂ ଜନସାଧାରଣଙ୍କ ମତାମତକୁ ହଡପ କରି ନିଆଯାଇଛି।
ଆମେରିକାର ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ନିର୍ବାଚନ ଫଳାଫଳ ଗ୍ରହଣ କରିବାକୁ ପ୍ରସ୍ତୁତ ନୁହଁନ୍ତି । ତାଙ୍କର ହଜାର ହଜାର ସମର୍ଥକ ରାଜଧାନୀ ୱାଶିଂଟନ୍ ଡିସି ରାସ୍ତାକୁ ଓହ୍ଲାଇ ସ୍ଲୋଗାନ ଦେଉଛନ୍ତି। ଏହି ସମର୍ଥକଙ୍କ ସହ ପୁଲିସର ମଧ୍ୟ ସଂଘର୍ଷ ଘଟିଛି।
ସୂଚନାଯୋଗ୍ୟ, ଆମେରିକାରେ ରାଷ୍ଟ୍ରପତି ନିର୍ବାଚନର ଫଳାଫଳ ଘୋଷଣା ହେବା ଏକ ସପ୍ତାହରୁ ଅଧିକ ସମୟ ବିତିଗଲାଣି, କିନ୍ତୁ ଟ୍ରମ୍ପ ଏହି ଫଳାଫଳକୁ ଗ୍ରହଣ କରିବାକୁ ପ୍ରସ୍ତୁତ ନୁହଁନ୍ତି ଏବଂ ନିର୍ବାଚନରେ ଅନିୟମିତତା ହୋଇଥିବା ଅଭିଯୋଗ କରୁଛନ୍ତି।
ଟ୍ରମ୍ପଙ୍କ ସମର୍ଥକ ଏବଂ ବିରୋଧୀଙ୍କ ମଧ୍ୟରେ ୱାଶିଂଟନରେ ଅନେକ ସ୍ଥାନରେ ସଂଘର୍ଷ ଘଟିଛି। ବ୍ଲାକ୍ ଲାଇଭସ୍ ମ୍ୟାଟର୍ ଏବଂ ଆଣ୍ଟିଫା ପରି ସଂଗଠନ ସହିତ ଜଡିତ ଲୋକମାନେ ମଧ୍ୟ ହ୍ୱାଇଟ ହାଉସଠାରୁ କିଛି ଦୂରରେ ଏକାଠି ହୋଇଥିଲେ। ଟ୍ରମ୍ପଙ୍କ ସମର୍ଥକମାନେ ମଧ୍ୟ ସେମାନଙ୍କୁ ମାଡ଼ ମାରିଥିଲେ। ପରିସ୍ଥିତିକୁ ନିୟନ୍ତ୍ରଣ କରିବା ପାଇଁ ପୁଲିସ ମଧ୍ୟ ସେଠାରେ ଲଙ୍କାଗୁଣ୍ଡ ସ୍ପ୍ରେ କରିଛି।
ପରିସ୍ଥିତିକୁ ଦୃଷ୍ଟିରେ ରଖି ୱାଶିଂଟନ୍ ଡିସିରେ ବହୁ ସଂଖ୍ୟକ ପୁଲିସ ମୁତୟନ କରାଯାଇଛି। ହ୍ୱାଇଟ ହାଉସର ସୁରକ୍ଷା ବ୍ୟବସ୍ଥା ଅଧିକ କଡା କଡ଼ି କରାଯାଇଛି। ଟ୍ରମ୍ପଙ୍କ ବିଶ୍ୱସ୍ତ ମନ୍ତ୍ରୀ ମାଇକ ପୋମ୍ପିଓ କହିଛନ୍ତି ଯେ ରାଷ୍ଟ୍ରପତି ଟ୍ରମ୍ପ ତାଙ୍କ ପରବର୍ତ୍ତୀ କାର୍ୟ୍ୟକାଳ ପାଇଁ ପ୍ରସ୍ତୁତି ଚଳାଇଛନ୍ତି।
