ପାଟନା : ପାଟନା ବିମାନ ବନ୍ଦରରେ ପୁଣି ଥରେ ବିମାନରେ ପକ୍ଷୀ ପିଟି ହେବା ଘଟଣା ପଦାକୁ ଆସିଛି। ଗୁରୁବାର ଅପରାହ୍ଣରେ ଏୟାର ଇଣ୍ଡିଆର ଏଆଇ୪୧୦ ବିମାନ ଉଡ଼ାଣ ଆରମ୍ଭ କରି ଆକାଶକୁ ଉଠିବା ପରେ ଏକ ପକ୍ଷୀ ବିମାନରେ ପିଟି ହୋଇଯାଇଥିଲା। ଏଥିରେ ବଡ଼ଧରଣ ଶବ୍ଦ ହୋଇଥିଲା। ଫଳରେ ବିମାନରେ ଥିବା କର୍ମଚାରୀ ଏବଂ ଯାତ୍ରୀ ଭୟଭୀତ ହୋଇପଡିଥିଲେ। ପାଇଲଟ ଏନେଇ ତୁରନ୍ତ ଏଟିସିକୁ ସୂଚନା ପ୍ରଦାନ କରିଥିଲେ ଓ ବିମାନକୁ ଜରୁରୀ ଅବତରଣ କରିବାକୁ ପଡ଼ିଥିଲା। ଆକାଶରେ ଗୋଟିଏ ଚକ୍କର କାଟି ବିମାନଟି ଜରୁରୀ ଅବତରଣ କରିଥିଲା। ଏଥିରେ ବିମାନର କିଛି ଅଂଶ କ୍ଷତିଗ୍ରସ୍ତ ହୋଇଥିବା ଜାଣିବାକୁ ମିଳିଛି। ଏହି ବିମାନରେ ୧୨୪ ଜଣ ଯାତ୍ରୀ ଥିଲେ। ଘଟଣାର ତଦନ୍ତ ଆରମ୍ଭ ହୋଇଛି।
