କାବୁଲ : ଆଫଗାନିସ୍ତାନର କାନ୍ଦାହାର ପ୍ରଦେଶରେ ମଙ୍ଗଳବାର ଏକ ଶକ୍ତିଶାଳୀ ବିସ୍ଫୋରଣ ଘଟି ୧୬ଜଣଙ୍କର ମୃତ୍ୟୁ ହେବା ସହ ୩୮ଜଣ ଆହତ ହୋଇଛନ୍ତି। ଆତଙ୍କବାଦୀମାନେ ଏକ କଣ୍ଟେନରରେ ବିସ୍ଫୋରକ ରଖି ବିସ୍ଫୋରଣ ଘଟାଇଛନ୍ତି। ପ୍ରାଦେଶିକ ଗଭର୍ଣ୍ଣରଙ୍କ ମୁଖପାତ୍ର କହିଛନ୍ତି ଯେ ଆତଙ୍କବାଦୀମାନେ ଦୁଇଟି କଣ୍ଟେନରରେ ବିସ୍ଫୋରକ ଆଣି ଥିବାବେଳେ ଗୋଟିଏ ବିସ୍ଫୋରଣ ହୋଇଛି। ଅନ୍ୟ କଣ୍ଟେନରରେ ଥିବା ବିସ୍ଫୋରକକୁ ସୁରକ୍ଷାକର୍ମୀମାନେ ନଷ୍ଟ କରିଛନ୍ତି। ଜାତୀୟ ସୁରକ୍ଷା ନିର୍ଦେଶାଳୟ ଓ ଗୁଇନ୍ଦା ଏଜେନ୍ସିର କହିବା ଅନୁଯାୟୀ କଣ୍ଟେନରରେ ବିସ୍ଫୋରକ ସହିତ ଅନ୍ୟାନ୍ୟ ଅସ୍ତ୍ରଶସ୍ତ୍ର ରହିଥିଲା। ମୁଖପାତ୍ରଙ୍କ କହିବା ଅନୁଯାୟୀ ଆହତଙ୍କ ମଧ୍ୟରୁ ଅଧିକାଂଶଙ୍କ ଅବସ୍ଥା ଗୁରୁତର ରହିଥିବାରୁ ମୃତ୍ୟୁସଂଖ୍ୟା ବୃଦ୍ଧି ପାଇବାର ଆଶଙ୍କା ରହିଛି। ରାଷ୍ଟ୍ରପତି ମହମ୍ମଦ ଅସ୍ରଫ ଘନି ଏହି ଘଟଣାକୁ ନିନ୍ଦା କରିଛନ୍ତି। ଏହି ବିସ୍ଫୋରଣ ପାଇଁ କୌଣସି ଆତଙ୍କବାଦୀ ସଂଗଠନ ନିଜକୁ ଦାୟୀ କରି ନାହାନ୍ତି। ଗତମାସରେ କାବୁଲରେ ହୋଇଥିବା ଏକ ବିସ୍ଫୋରଣରେ ୯ଜଣ ସାମ୍ବାଦିକଙ୍କ ସହିତ ୨୯ଜଣଙ୍କର ମୃତ୍ୟୁ ହୋଇଥିଲା।
