ସୂଚନା ପ୍ରଯୁକ୍ତି କ୍ଷେତ୍ରରେ୨.୫ ଲକ୍ଷ ନୂତନ ନିଯୁକ୍ତି ସୁଯୋଗ ସୃଷ୍ଟି କରାଯିବ

ନୂଆଦିଲ୍ଲୀ : ସୂଚନା ପ୍ରଯୁକ୍ତି କ୍ଷେତ୍ରରେ ଦେଶରେ ୨ଲକ୍ଷ ୫୦ ହଜାର ନୂତନ ନିଯୁକ୍ତି ସୁଯୋଗ ସୃଷ୍ଟି କରାଯିବ । କୌଶଳ ବିକାଶ ଓ ଉଦ୍ୟମିତା ମନ୍ତ୍ରୀ ମହେନ୍ଦ୍ର ନାଥ ପାଣ୍ଡେ ଏହା କହିଛନ୍ତି । ଆଗାମୀ ଦିନରେ ଦକ୍ଷତା ବିକାଶ ଯୋଜନାକୁ ବ୍ୟାପକ କରାଯାଇ ଏହି ନୂତନ ନିଯୁକ୍ତି ସୃଷ୍ଟି କରାଯିବ । ନୂଆଦିଲ୍ଲୀଠାରେ ଏକ କାର୍ଯ୍ୟକ୍ରମରେ ଯୋଗଦେଇ ଶ୍ରୀ ପାଣ୍ଡେ କହିଛନ୍ତି ଯେ ବିଶ୍ୱର ବୃହତ୍ତମ ଯୁବଶକ୍ତିର ଦକ୍ଷତା ବିକାଶ କରିବା ଏନ୍‍ଡିଏ ସରକାରଙ୍କର ପ୍ରାଥମିକ ଲକ୍ଷ୍ୟ। ଡିଜିଟାଲ୍‍ କ୍ଷେତ୍ରରେ ଦେଶରେ ବ୍ୟାପକ ଯୋଜନା ହାତକୁ ନିଆଯାଇଥିବାରୁ ୨୦୧୮ ବର୍ଷରେ ଏହି କ୍ଷେତ୍ର ୨.୫ ବିଲିୟନ୍‍ ଡଲାରରୁ ୭.୨ ବିଲିୟନ୍‍ ଡଲାର ସ୍ତରରେ ପହଞ୍ଚି ପାରିଛି।

ଆଗାମୀ ବର୍ଷଗୁଡ଼ିକରେ ସୂଚନା ଓ ପ୍ରଯୁକ୍ତି କ୍ଷେତ୍ରରେ ବିଶ୍ୱର ଅଗ୍ରଣୀ ଦେଶଗୁଡ଼ିକ ସହ କାନ୍ଧକୁ କାନ୍ଧ ମିଶାଇ ଭାରତ କାର୍ଯ୍ୟ କରିବ ବୋଲି ସେ ଆଶା ବ୍ୟକ୍ତ କରିଛନ୍ତି। ଦେଶର ଯୁବକମାନେ ଆଧୁନିକ ଜ୍ଞାନ କୌଶଳକୁ ଉପଯୋଗ କରି ଚତୁର୍ଥ ଶିଳ୍ପ ବିପ୍ଳବକୁ ସଫଳ କରିବା ପାଇଁ ଆଗେଇ ଆସିବାକୁ ସେ ଆହ୍ୱାନ କରିଛନ୍ତି।