ନୂଆଦିଲ୍ଲୀ : ଜାମ୍ମୁ କାଶ୍ମୀରରୁ ଧାରା ୩୭୦ ଉଚ୍ଛେଦକୁ ନେଇ ମାଳଦ୍ୱୀପରେ ଦକ୍ଷିଣ ଏସିଆ ଦେଶ ସଂସଦ ଅଧ୍ୟକ୍ଷଙ୍କ ଶିଖର ସମ୍ମିଳନୀରେ ଭାରତ ଓ ପାକିସ୍ତାନ ମଧ୍ୟରେ ପ୍ରବଳ ଯୁକ୍ତିତର୍କ ହୋଇଥିଲା। ସମ୍ମିଳନୀରେ ପାକିସ୍ତାନ ପ୍ରତିନିଧି କାଶ୍ମୀର ପ୍ରସଙ୍ଗ ଉଠାଇଥିଲେ। ସେ କହିଥିଲେ ଯେ କାଶ୍ମୀରରେ ଯେଉଁ ସ୍ଥିତି ଅଛି, ତାକୁ ଅଣଦେଖା କରିହେବ ନାହିଁ। ସେଠାରେ ଲୋକଙ୍କ ଉପରେ ଅତ୍ୟାଚାର ହେଉଛି। ଏହାର ଜବାବରେ ଭାରତର ପ୍ରତିନିଧି ତଥା ରାଜ୍ୟସଭା ଅପାଧ୍ୟକ୍ଷ ହରିବଂଶ କହିଥିଲେ ଯେ ଯେଉଁ ଦେଶ ବ୍ୟାପକ ଭାବେ ନିଜ ଲୋକଙ୍କୁ ନରସଂହାର କରିଛି, ସେହି ଦେଶର କାଶ୍ମୀର ଉପରେ କହିବାର ନୈତିକ ଅଧିକାର ନାହିଁ।
ଏହାସହ ସେ ପାକିସ୍ତାନକୁ ସୀମାପାର ଆତଙ୍କବାଦ ବନ୍ଦ କରିବାକୁ ପରାମର୍ଶ ଦେଇଥିଲେ। ହରିବଂଶ କହିଥିଲେ ଯେ ଏହି ମଞ୍ଚରେ ଭାରତର ଆଭ୍ୟନ୍ତରୀଣ ମାମଲା ଉଠାଯାଇଥିବାରୁ ଏହାର ଘୋର ଆପତ୍ତି କରୁଛି। ସମ୍ମିଳନୀର ବିଷୟ ବାହାରେ ଅନ୍ୟ ପ୍ରସଙ୍ଗ ଉଠାଇ ଏହି ମଞ୍ଚର ରାଜନୈତିକ କରଣକୁ ନିନ୍ଦା କରୁଛୁ। ଏହାପରେ ବି ପାକିସ୍ତାନ ପ୍ରତିନିଧି ଟିପ୍ପଣୀ ଦେଇଚାଲିଥିଲେ। ଫଳରେ କାର୍ଯ୍ୟକ୍ରମ ସଂଚାଳନ କରୁଥିବା ମାଳଦ୍ୱୀପ ସଂସଦର ବାଚସ୍ପତି ମହମ୍ମନ ନଶିଦ କହିଥିଲେ ଯେ ଏହି ମଞ୍ଚରେ କେଉଁ ଦେଶର ଆଭ୍ୟନ୍ତରୀଣ ପ୍ରସଙ୍ଗ ଉଠାଯାଇପାରିବ ନାହିଁ। ଏହା ଶୁଣିବା ପରେ ପାକିସ୍ତାନ ପ୍ରତିନିଧିଙ୍କ ମୁହଁ ବନ୍ଦ ହୋଇଯାଇଥିଲା।
