ଲକ୍ଷ୍ମୀପୁର: କୋରାପୁଟ ଜିଲା କୋଡ଼ିଙ୍ଗାମାଳି ଖଣି ଅଞ୍ଚଳରୁ ଶ୍ରମିକମାନଙ୍କୁ ନେଇ ଫେରୁଥିବା ଏକ ଟ୍ରାକ୍ଟର ଓଲଟି ପଡ଼ିବା ଫଳରେ ୭ଜଣ ଶ୍ରମିକ ଗୁରୁତର ହୋଇଥିବାବେଳେ ୧୪ ଜଣ ଶ୍ରମିକ ଆହତ ହୋଇଛନ୍ତି। ଗୁରୁତରମାନଙ୍କୁ ରାୟଗଡ଼ା ଡ଼ାକ୍ତରଖାନାକୁ ସ୍ଥାନାନ୍ତର କରାଯାଇଛି। ସମସ୍ତ ଶ୍ରମିକ ରାୟଗଡ଼ ଜିଲା କାଶିପୁର ବ୍ଲକର ପାଇକ ସୁପୁଲୁ ଓ ତଳଝିରି ଗ୍ରାମର ହୋଇଥିବା ସୂଚନା ମିଳିଛି।
କୋରାପୁଟ ଜିଲାର କୋଡ଼ିଙ୍ଗାମାଳି ପାହାଡ଼ରେ ପ୍ରାୟ ୨ ବର୍ଷ ହେଲା ଖଣି ଖନନ ହେଉଛି। ତେବେ କିଛି ଦିନ ହେଲା ଖଣିନିଗମ ପକ୍ଷରୁ ପାହାଡ଼ ଚତୁଃପାର୍ଶ୍ବରେ ସୁରକ୍ଷା ବାଡ଼ ନିର୍ମାଣ ହେଉଛି। ଉକ୍ତ ନିର୍ମାଣ କାର୍ଯ୍ୟରେ ଉକ୍ତ ଶ୍ରମିକମାନେ ଏଲଜି କମ୍ପାନୀ ନାମକ ଠିକା ସଂସ୍ଥା ଅଧିନରେ କାମ କରୁଥିଲେ। କୋଡ଼ିଙ୍ଗାମାଳରୁ ଟ୍ରାକ୍ଟର ଟି ଗୁରୁବାର ସନ୍ଧ୍ୟାରେ ୩୦ରୁ ଊର୍ଦ୍ଧ୍ବ ଶ୍ରମିକମାନଙ୍କୁ ନେଇ ଲକ୍ଷ୍ମୀପୁର ଅଭିମ୍ମୁଖେ ଫେରୁଥିବା ବେଳେ ଭାରସାମ୍ୟ ହରାଇ ଓଲଟି ପଡ଼ିଥିଲା। ଫଳରେ ଦୁର୍ଘଟଣା ସ୍ଥଳରୁ ସମସ୍ତ ଆହତଙ୍କୁ ଉଧାର କରାଯାଇ ଲକ୍ଷ୍ମୀପୁର ଗୋଷ୍ଟୀ ସ୍ୱାସ୍ଥ୍ୟକେନ୍ଦ୍ରକୁ ଚିକିତ୍ସା ପାଇଁ ଅଣା ଯାଇଥିଲା। ସେମାନଙ୍କ ମଧ୍ୟରୁ ଗୁରୁତର ଥିବା ୭ ଜଣଙ୍କୁ ରାୟଗଡ଼ା ଜିଲା ଚିକିତ୍ସାଳୟକୁ ସ୍ଥାନାନ୍ତରିତ କରାଯାଇଛି। ଖବର ପାଇ ଥାନା ଅଧିକରୀ ଗୌରହରି ସାହୁ ସ୍ୱାସ୍ଥ୍ୟକେନ୍ଦ୍ରରେ ପହଞ୍ଚିି ଘଟଣା ସମ୍ପର୍କରେ ପଚାରି ବୁଝିଥିଲେ। ଏନେଇ ଏକ ମାମଲା ରୁଜୁ ହୋଇଛି। ତେବେ ଟ୍ରାକ୍ଟର ଚାଳକ ଫେରାର ଥିବା ଜଣାପଡ଼ିଛି।
Comments are closed.