ସମନ୍ୱିତ କମାଣ୍ଡ କଣ୍ଟ୍ରୋଲ କେନ୍ଦ୍ରର ଶୁଭାରମ୍ଭ କଲେ ପ୍ରଧାନମନ୍ତ୍ରୀ

ନୂଆଦିଲ୍ଲୀ: ସ୍ମାର୍ଟ ସହର ମିଶନ ମାଧ୍ୟମରେ ସହରଗୁଡିକର କ୍ଷମତା ଓ ଅଭାବ ଅସୁବିଧାର ଚିହ୍ନଟ ହୋଇପାରିଛି। ସିକିମ୍‍ର ଗ୍ୟାଙ୍ଗଟକ୍‍ ଓ ନାମଚି, ଅରୁଣାଚଳ ପ୍ରଦେଶ ପାଶିଘାଟ ଓ ଇଟାନଗର ଓ ତ୍ରିପୁରାର ଅଗରତାଲାଠାରେ ଭିଡିଓ କନ୍‍ଫରେନ୍ସିଂ ମାଧ୍ୟମରେ ସମନ୍ୱିତ କମାଣ୍ଡ କଣ୍ଟ୍ରୋଲ କେନ୍ଦ୍ରର ଶୁଭାରମ୍ଭ କରି ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ କହିଛନ୍ତି, ଏହି ମିଶନ ସର୍ବସାଧାରଣଙ୍କ ଅଂଶଗ୍ରହଣ ମାଧ୍ୟମରେ ଚ୍ୟାଲେଞ୍ଜ ଗୁଡିକର ସମାଧାନର ବାଟ ଦେଖାଇବାରେ ସାହାଯ୍ୟ କରୁଛି। ପ୍ରଧାନମନ୍ତ୍ରୀ କହିଛନ୍ତି, ସ୍ମାର୍ଟ ସହର କମାଣ୍ଡ ଓ କଣ୍ଟ୍ରୋଲ କେନ୍ଦ୍ର ଡିଜିଟାଲ ବୈଷୟିକ ଜ୍ଞାନର ବ୍ୟବହାର କରି ପୋଲିସ, ପରିବହନ, ଶକ୍ତି, ଜଳ, ପରିମଳ ଓ ସର୍ବସାଧାରଣ ସୁରକ୍ଷା କାର୍ଯ୍ୟରେ ବିଭିନ୍ନ ବିଭାଗ ମଧ୍ୟରେ ସମନ୍ୱୟ ରକ୍ଷା କରୁଛି। ସମଗ୍ର ଦେଶରେ ସମନ୍ୱିତ କମାଣ୍ଡ ଓ କଣ୍ଟ୍ରୋଲ କେନ୍ଦ୍ରର କାର୍ଯ୍ୟକାରିତା ଦ୍ରୁତ ଗତିରେ ଆଗେଇ ଚାଲିଛି ଏବଂ ମାର୍ଚ୍ଚ ପହିଲାରୁ ୧୫ଟି ସ୍ମାର୍ଟ ସହରରେ ଏହି କେନ୍ଦ୍ରଗୁଡିକ କାର୍ଯ୍ୟକ୍ଷମ ହୋଇଛି ବୋଲି ପ୍ରଧାନମନ୍ତ୍ରୀ କହିଛନ୍ତି।