ଖଡିଆଳ: ଓଡିଶା-ଛତିଶଗଡ ସୀମାନ୍ତ ନୂଆପଡ଼ା ଜିଲା ସିନାପାଲି ବ୍ଲକ ଅନ୍ତର୍ଗତ ନୂଆମାଲପଡା ଜମି ବିବାଦର ଅନ୍ତ ଘଟିଛି। ଓଡିଶା ସରକାରଙ୍କ ରାଜସ୍ୱ ଓ ବିପର୍ଯ୍ୟୟ ପରିଚାଳନା ବିଭାଗ ବିବାଦୀୟ ଜମିକୁ ନିଜ ଦଖଲକୁ ନେଇଛନ୍ତି। ଫଳକ ଲଗାଇ ଜମି ଭିତରକୁ ଅନୁପ୍ରବେଶ ଦଣ୍ଡନୀୟ ଅପରାଧ ବୋଲି ଚେତାବନୀ ଦେଇଛନ୍ତି। ଓଡିଶା ସରକାରଙ୍କ ଏଭଳି ପଦକ୍ଷେପକୁ ନୂଆମାଲପଡା ଗ୍ରାମବାସୀ ଖୁବ ପ୍ରଶଂସା କରିଛନ୍ତି। ଦୀର୍ଘ ୧୦ ମାସର ବିବାଦ ପରେ ଓଡିଶା ସରକାର ଛତିଶଗଡ ସରକାରକଙ୍କୁ ଜବାବ ଦେଇଛନ୍ତି। ନୂଆପଡା ଜିଲା ସିନାପାଲି ବ୍ଲକ ମାଓପ୍ରବଣ ଅଞ୍ଚଳରେ ଥିବା ସୀମାରେ ୩୦ ଏକରରୁ ଉର୍ଦ୍ଧ ଜମିକୁ କବଜା କରି ଛତିଶଗଡ ସରକାର ତାଙ୍କ ରାଜ୍ୟର ଗରିଆବନ୍ଧ ଜିଲା ବୁରଜାବାହାଲ ଗାଁର ୧୨ଜଣ ଚାଷୀଙ୍କୁ ବଣ୍ଟନ କରିଥିଲେ। ହେଲେ ସେହି ଚାଷ ଜମିକୁ ନୂଆମାଲପଡା ଗାଁର ଚାଷୀମାନେ ବର୍ଷାନୁକ୍ରମେ ପିଢି ପିଢି ଚାଷ କରି ଆସୁଥିଲେ। ଘଟଣା ପ୍ରଘଟ ହେବାପରେ ନୂଆମାଲପଡା ଗାଁର ଚାଷୀମାନେ ପ୍ରଥମେ ସିନାପାଲି ବ୍ଲକ ଅଧ୍ୟକ୍ଷା ତପସ୍ୱନୀ ମାଝୀ ଏବଂ ପରେ ସିନାପାଲି ତହସିଲଦାରଙ୍କ ଦ୍ୱାରସ୍ତ ହୋଇଥିଲେ। ସେତେବେଳେ ଘଟଣାଟି ବିବାଦୀୟ ମୋଡ ନେଇଥିଲା। ଉଭୟ ରାଜ୍ୟର ପ୍ରଶାସନିକ ଟିମ ଘଟଣାସ୍ଥଳରେ ପହଞ୍ଚି ତଦନ୍ତ କରି ମାପଚୁପ କରିଥିଲେ ବି କୌଣସି ସମାଧାନର ବାଟ ବାହାରି ନଥିଲା। ନୂଆପଡା ଜିଲାପାଳ ଡ.ପୋମା ଟୁଡୁ ଏବଂ ଦକ୍ଷିଣାଞ୍ଚଳ ଆରତିସି ଟିଆଙ୍ଗା ରାଓ ଏଥିରେ ହସ୍ତକ୍ଷେପ କରିଥିଲେ। ସୀମାକୁ ଯାଇ ଚାଷ କରୁଥିବା ଚାଷୀଙ୍କ ଉପସ୍ଥିତିରେ ସରଜମିନ ତଦନ୍ତ କରି ବିବାଦୀୟ ଚାଷଜମି ଓଡିଶା ସରକାରଙ୍କ ବୋଲି ସ୍ପଷ୍ଟ କରିଥିଲେ। ହେଲେ ଛତିଶଗଡ ସରକାର ଏହାକୁ ମାନିନଥିଲେ। ସେହି ଦିନଠାରୁ ପ୍ରାୟ ୧୦ ମାସ ହେବ ଉଭୟ ରାଜ୍ୟର ଚାଷୀଙ୍କ ମଧ୍ୟରେ ବିବାଦ ଲାଗି ରହିଥିଲା। ଏହି ବିବାଦୀୟ ଜମିକୁ ନିଜର କହି ଓଡିଶା ସରକାରଙ୍କ ରାଜସ୍ୱ ଓ ବିପର୍ଯ୍ୟୟ ପରିଚାଳନା ବିଭାଗ ଲୁହାରେ ନିର୍ମିତ ନାମ ଫଳକ ଲଗାଇ ଏହି ଜମି ଭିତରକୁ ଅନୁପ୍ରବେଶ କରିବା ଦଣ୍ଡନୀୟ ଅପରାଧ ବୋଲି ଚେତାବନୀ ଦେଇଛନ୍ତି। ତେବେ ଛତିଶଗଡ ସରକାର ଏହାପରେ କି ପଦକ୍ଷେପ ନେଉଛନ୍ତି ତାହା ଉପରେ ଦେଖିବାକୁ ବାକି ରହିଲା।
Popular Categories
Previous article
Next article