‘ଏକତାର ପ୍ରତିମୂର୍ତ୍ତି’କୁ ବିସ୍ଫୋରଣରେ ଉଡ଼ାଇବା ପାଇଁ ଆତଙ୍କବାଦୀ ଯୋଜନା, ସତର୍କ ସୂଚନା ଜାରି
ଅହମଦାବାଦ : ଗୁଜରାଟ ନିର୍ମଦା ନଦୀ କୂଳରେ ନିର୍ମିତ ଏକତାର ପ୍ରତିମୂର୍ତ୍ତି (ଷ୍ଟାଚ୍ୟୁ ଅଫ ୟୁନିଟି)କୁ ବୋମା ବିସ୍ଫୋରଣରେ ଉଡ଼ାଇ ଦେବା ପାଇଁ ଆତଙ୍କବାଦୀମାନେ ଯୋଜନା କରିଛନ୍ତି। ଏନେଇ ଗୁଇନ୍ଦା ବିଭାଗ ପକ୍ଷରୁ ସତର୍କ ସୂଚନା ଜାରି କରାଯାଇଛି। ଏହି ଯୋଜନାକୁ ସଫଳ କରିବା ପାଇଁ ଆତଙ୍କବାଦୀମାନେ ଦେଶର ବିଭିନ୍ନ କୋଣରେ ଅରାଜକତା ସୃଷ୍ଟି କରିବାକୁ ଚେଷ୍ଟା କରିବେ। ଅରାଜକତାର ସୁଯୋଗ ନେଇ ସେମାନେ ସର୍ଦାର ବଲ୍ଲଭ ଭାଇ ପଟେଲଙ୍କ ଏକତାର ପ୍ରତିମୂର୍ତ୍ତିକୁ ବିସ୍ଫୋରଣରେ ଉଡ଼ାଇବାକୁ ଯୋଜନା କରିଛନ୍ତି ବୋଲି ଗୁଇନ୍ଦା ବିଭାଗ ପକ୍ଷରୁ କୁହାଯାଇଛି। ସୂଚନା ମିଳିବା ପରେ ଗୁଜରାଟ ପୁୁଲିସ୍ ଏକତାର ପ୍ରତିମୂର୍ତ୍ତିର ସୁରକ୍ଷା ବ୍ୟବସ୍ଥାକୁ ବଢାଇ ଦେଇଛି। ସେହିପରି ପୁଲିସ୍ ପାଟ୍ରୋଲିଂ ମଧ୍ୟ ବୃଦ୍ଧି କରାଯାଇଛି। ପୁଲୱାମା ଆକ୍ରମଣ ଘଟଣାକୁ ଦୃଷ୍ଟିରେ ରଖି ଗୁଇନ୍ଦା ବିଭାଗର ସତର୍କ ସୂଚନାକୁ ଗୁରତ୍ୱର ଭାବେ ନିଆଯାଉଛି।
ପ୍ରକାଶଯୋଗ୍ୟ ଯେ ଗତ ବର୍ଷ ଅକ୍ଟୋବରରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଦେଶର ପ୍ରଥମ ଗୃହମନ୍ତ୍ରୀ ସର୍ଦାର ବଲ୍ଲଭ ଭାଇ ପଟେଲଙ୍କ ଜୟନ୍ତୀ ଅବସରରେ ୧୮୨ମିଟର ଉଚ୍ଚର ପ୍ରତିମୂର୍ତ୍ତିକୁ ଲୋକାର୍ପଣ କରିଥିଲେ। ନର୍ମଦା ନଦୀ ସାଧୁଭେଟ ଦୀପରେ ଏହି ପ୍ରତିମୂର୍ତ୍ତି ନିର୍ମିତ ହୋଇଛି। ଏହା ହେଉଛି ପୃଥିବୀର ସବୁଠୁ ଅଧିକ ଉଚ୍ଚତାର ପ୍ରତିମୂର୍ତ୍ତି। ଏହି ପ୍ରତିମୂର୍ତ୍ତିର ନିର୍ମାଣ ପାଇଁ ୨,୩୮୯ କୋଟି ଟଙ୍କା ଖର୍ଚ୍ଚ ହୋଇଛି।