କଟକ: ଘର ଦୁଆର ମୁହଁରେ ଗାଈ ଓ କୁକୁର ଶୋଇବା ସହିତ ମଳତ୍ୟାଗ କରୁଥିଲେ। ଯେଉଁଥିରେ ଉତ୍ତ୍ୟକ୍ତ ହୋଇ ଜଣେ ବ୍ୟକ୍ତି ଘର ଦୁଆର ମୁହଁରେ ତାର ବାଡ ଲଗାଇ ସେଥିରେ ବିଦ୍ୟୁତ୍ ସଂଯୋଗ କରିଥିଲେ। ଆଉ ଏହି ବିଜୁଳି ତାର ସଂସ୍ପର୍ଶରେ ଆସି ଦୁଇଟି କୁକୁରଙ୍କ ର ମୃତ୍ୟୁ ଘଟିବା ସହ ଗୋଟିଏ ଷଣ୍ଢ ଗୁରୁତର ହୋଇଥିବା ଜଣାପଡିଛି। ବିଜୁଳି ତାର ଲଗାଇ ନୀରିହ ପଶୁଙ୍କୁ ହତ୍ୟା କରିବା ଘଟଣା ଜଣାପଡିବା ପରେ ସମ୍ପୃକ୍ତ ଘରର ବିଜୁଳି ସଂଯୋଗ କାଟିଛି ବିଦ୍ୟୁତ୍ ବିପଣନକାରୀ ସଂସ୍ଥା ଟାଟା ପାଓ୍ବାର। ମଙ୍ଗଳବାର କଟକର ବାଦାମବାଡି ଥାନା ଅନ୍ତର୍ଗତ ଶଙ୍କରପୁର ପରିଡାସାହିରେ ଏଭଳି କିଛି ଘଟଣା ଦେଖିବାକୁ ମିଳିଛି। ଏ ନେଇ ବାଦାମବାଡି ଅଞ୍ଚଳର ଜଣେ ସଚେତନ ନାଗରିକ ଘଟଣା ସଂକ୍ରାନ୍ତରେ ଖବର ପାଇ କଟକ ଜିଲ୍ଲାପାଳ , ଡିସିପି, ଟାଟା ପାଓ୍ବାର ଏବଂ ପିପୁଲ୍ସ ଫର୍ ଆନିମଲ୍ ସଂସ୍ଥାକୁ ସାମାଜିକ ଗଣ ମାଧ୍ୟମ ଏକ୍ସରେ ସୂଚନା ଦେଇଥିଲେ। ଏହି ସୂଚନା ପାଇ ତୁରନ୍ତ ବାଦାମବାଡି ପୁଲିସ୍ ଉପସ୍ଥିତିରେ ଟାଟା ପାଓ୍ବାର କର୍ମଚାରୀ ସମ୍ପୃକ୍ତ ବ୍ୟକ୍ତିଙ୍କ ଘରକୁ ସଂଯୋଗ କରୁଥିବା ବିଦ୍ୟୁତ୍ ଲାଇନକୁ ବିଚ୍ଛିନ୍ନ କରିଦେଇଥିଲେ।
Comments are closed.