ଆନନ୍ଦପୁର : ଘସିପୁରା ବ୍ଲକ ଅନ୍ତର୍ଗତ ବାତୋ ପଞ୍ଚାୟତ ଅନ୍ତର୍ଗତ ପରମାନନ୍ଦପୁର ସରକାରୀ ଉଚ୍ଚ ପ୍ରାଥମିକ ବିଦ୍ୟାଳୟର ପ୍ରଧାନ ଶିକ୍ଷକଙ୍କ ମନମୁଖୀ ଶାସନକୁ ବିରୋଧ କରିବା ସହ ତାଙ୍କୁ ବଦଳି ଦାବିରେ ସ୍କୁଲରେ ତାଲା ପକାଇ ଛାତ୍ରଛାତ୍ରୀ, ଅଭିଭାବକ ଓ ଗ୍ରାମବାସୀ ଧାରଣା ଦେଇଥିଲେ। ଅଭିଭାବକଙ୍କ ଅଭିଯୋଗ ଅନୁସାରେ ପ୍ରଧାନ ଶିକ୍ଷକ ମାନସ ରଂଜନ ଜେନା ଓ ସହକାରୀ ଶିକ୍ଷକ ସୁକଦେବ ଜେନା ବିଦ୍ୟାଳୟରେ ନିମ୍ନମାନର ମଧ୍ୟାହ୍ନ ଭୋଜନ ସହ ସରକାରଙ୍କ ତରଫରୁ ଛାତ୍ରଛାତ୍ରୀମାନଙ୍କ ପାଇଁ ଉଦ୍ଦିଷ୍ଟ ଅତ୍ୟାବଶ୍ୟକ ସାମଗ୍ରୀ ନ ଯୋଗେଇବା, ମିଛ ବିଲ୍ କରି ବିଦ୍ୟାଳୟ ଟଙ୍କା ହଡ଼ପ ଅଭିଯୋଗ , ଛାତ୍ରଛାତ୍ରୀଙ୍କୁ ବିଶୁଦ୍ଧ ପାନୀୟ ଜଳ ଯୋଗାଣ ବନ୍ଦ କରିବା , ଅଭିଭାବକ ସମ୍ମିଳନୀ ତଥା ବିଦ୍ୟାଳୟ ପରିଚାଳନା କମିଟିଙ୍କୁ ନ ଜଣାଇ ଏକତରଫା ଭାବେ କାର୍ଯ୍ୟ କରିବା , ବିଦ୍ୟାଳୟର ଆର୍ଥିକ କାରବାରର ହିସାବରେ ଦୁର୍ନିତୀ, ମଧ୍ୟାହ୍ନ ଭୋଜନ ରାନ୍ଧିବା ପାଇଁ ଗ୍ୟାସ ବଦଳରେ କାଠକୁ ଜାଳେଣି ରୁପେ ବ୍ୟବହାର କରି ଗ୍ୟାସ ସିଲିଣ୍ଡର ଟଙ୍କା ହଡ଼ପ , ଶୌଚାଳୟରେ ତାଲା ପକାଇବା କାରଣରୁ ଛାତ୍ରଛାତ୍ରୀ ଖୋଲାରେ ଶୌଚ ହେବାକୁ ବାଧ୍ୟ ହେଉଛନ୍ତି। ଛାତ୍ରଛାତ୍ରୀ ତାଙ୍କ ବିରୁଦ୍ଧରେ ସ୍ବର ଉତ୍ତୋଳନ କଲେ ବିଭିନ୍ନ ଧମକ ଦେଉଛନ୍ତି ବୋଲି ଅଭିଯୋଗ କରିଥିଲେ।
ଗ୍ରାମବାସୀମାନେ ଏହାର କିଛି ସମାଧାନ ନ ହେବାରୁ ଆଜି ବିଦ୍ୟାଳୟରେ ସମସ୍ତ ଛାତ୍ରଛାତ୍ରୀ ଅଭିଭାବକ ବିଦ୍ୟାଳୟରେ ତାଲା ପକାଇ ଧାରଣାରେ ବସିଥିଲେ। ଖବର ପାଇ ଘଟଣାସ୍ଥଳରେ ଘସିପୁରା ବିଡ଼ିଓ ସୁଶ୍ରୀ ବିନିତା ବିଜୟିନୀ ଓ ଘଷିପୁରା ଏବିଇଓ ହାଡିବନ୍ଧୁ ସାହୁ ପହଞ୍ଚି ଲୋକଙ୍କୁ ବୁଝାଇବା ସହ ପ୍ରଧାନ ଶିକ୍ଷକଙ୍କ ନାମରେ ଆସିଥିବା ଅଭିଯୋଗ ସଂପର୍କରେ ବିଦ୍ୟାଳୟର ଶିକ୍ଷକ କର୍ମଚାରୀ ଓ ପରିଚାଳନା କମିଟିର ସମସ୍ତ ସଦସ୍ୟଙ୍କ ମତାମତ ନେବାପରେ ଆସନ୍ତା ଶୁକ୍ରବାର ଏକ ବୈଠକରେ ପରିଚାଳନା କମିଟି ଓ ଗ୍ରାମବାସୀଙ୍କ ଉପସ୍ଥିତରେ ପ୍ରଧାନ ଶିକ୍ଷକଙ୍କ ସହ ଜରୁରୀ କାଳୀନ ବୈଠକରେ ମଧ୍ୟାହ୍ନ ଭୋଜନ, ଆର୍ଥିକ ଅନିୟମିତତା ସମ୍ପର୍କରେ ସମାଧାନ କରିବାକୁ କହିବା ପରେ ଧାରଣା ପ୍ରତ୍ୟାହୃତ ହୋଇଥିଲା।
