ନୂଆଦିଲ୍ଲୀ : ଆସନ୍ତାବର୍ଷ ସାଧାରଣତନ୍ତ୍ର ଦିବସ ପରେଡରେ ୧୫ଟି ରାଜ୍ୟ ଓ କେନ୍ଦ୍ରଶାସିତ ଅଞ୍ଚଳର ପ୍ରଜ୍ଞାପନ ମେଢ ଭାଗ ନେବାକୁ ମନୋନୀତ ହୋଇଛନ୍ତି। ୨୦୨୫ ଜାନୁଆରୀ ୨୬ ସାଧାରଣତନ୍ତ୍ର ଦିବସ ପରେଡ ପାଇଁ ମନୋନୀତ ହୋଇଥିବା ରାଜ୍ୟ ଓ କେନ୍ଦ୍ରଶାସିତ ଅଞ୍ଚଳ ପ୍ରଜ୍ଞାପନ ମେଢଗୁଡିକ ହେଲା ବିହାର, ଚଣ୍ଡିଗଡ, ଆନ୍ଧ୍ରପ୍ରଦେଶ, ଗୋଆ, ଝାଡଖଣ୍ଡ, କର୍ଣ୍ଣାଟକ, ମଧ୍ୟପ୍ରଦେଶ, ପଞ୍ଜାବ, ଉତ୍ତରାଖଣ୍ଡ, ଗୁଜରାଟ, ତ୍ରିପୁରା, ଉତ୍ତରପ୍ରଦେଶ, ପଶ୍ଚିମବଙ୍ଗ, ହରିୟାଣା ଏବଂ ଦାଦ୍ରା, ନଗର ହାବେଳି ଓ ଡାମନ ଡିୟୁ। ଓଡ଼ିଶାର ପ୍ରଜ୍ଞାପନ ମେଢ ପରେଡରେ ସାମିଲ ହେବାକୁ ମନୋନୀତ ହୋଇପାରି ନାହିଁ। ଏପରିକି ଦିଲ୍ଲୀ ସରକାରଙ୍କ ପ୍ରଜ୍ଞାପନ ମେଢ ମଧ୍ୟ ଏହି ମନୋନୟନରୁ ବାଦ୍ ପଡିଛି। ସାଧାରଣତନ୍ତ୍ର ଦିବସ ପରେଡରୁ ପ୍ରଜ୍ଞାପନ ମେଢ ବାଦ୍ ପଡିବାକୁ ନେଇ ଅନେକ ସମୟରେ ବିଭିନ୍ନ ରାଜ୍ୟ ସରକାର ଅସନ୍ତୋଷ ବ୍ୟକ୍ତ କରିଆସୁଛନ୍ତି। ତେବେ ଏହି ମନୋନୟନ ପ୍ରକ୍ରିୟା ଅତ୍ୟନ୍ତ ସ୍ବଚ୍ଛ ଭାବେ କରାଯାଉଥିବା ଜଣେ ଅଧିକାରୀ କହିଛନ୍ତି। ୨୦୨୨ରେ ପଶ୍ଚିମବଙ୍ଗ ଓ ତାମିଲନାଡୁ ସରକାରଙ୍କ ପ୍ରଜ୍ଞାପନ ମେଢ ପରେଡରୁ ବାଦ୍ ପଡିବାକୁ ନେଇ ଦୁଇ ରାଜ୍ୟର ମୁଖ୍ୟମନ୍ତ୍ରୀ ଅସନ୍ତୋଷ ବ୍ୟକ୍ତ କରିବା ସହିତ ପ୍ରଧାନମନ୍ତ୍ରୀଙ୍କ ହସ୍ତକ୍ଷେପ ଲୋଡିଥିଲେ। ସାଧାରଣତନ୍ତ୍ର ଦିବସ ପରେଡ ପାଇଁ ପ୍ରସ୍ତାବ ଦିଆଯାଉଥିବା ବିଭିନ୍ନ ରାଜ୍ୟ ଓ କେନ୍ଦ୍ରଶାସିତ ଅଞ୍ଚଳର ପ୍ରଜ୍ଞାପନ ମେଢକୁ ବିଭିନ୍ନ ପର୍ଯ୍ୟାୟରେ ଯାଞ୍ଚ କରି ମୂଲ୍ୟାୟନ କରାଯାଇଥାଏ। ଏହି ମୂଲ୍ୟାୟନ ପାଇଁ ଏକ ବିଶେଷଜ୍ଞ କମିଟି ଗଠନ କରାଯାଇଥାଏ। ପ୍ରଜ୍ଞାପନ ମେଢରେ ବିଷୟବସ୍ତୁ, ଚିନ୍ତାଧାରା, ଡିଜାଇନ ଓ ଏହାର ଶୋଭାକୁ ବିଚାରକୁ ନିଆଯାଇଥାଏ। ଦିଲ୍ଲୀ ସରକାରଙ୍କ ପ୍ରଜ୍ଞାପନ ମେଢ କ୍ରମାଗତ ୪ବର୍ଷ ହେଲା ମନୋନୀତ ହୋଇପାରୁ ନାହିଁ। ପ୍ରଜ୍ଞାପନ ମେଢ ମୁଲ୍ୟାୟନ ସହ ଜଡିତ ଜଣେ ଅଧିକାରୀଙ୍କ କହିବା ଅନୁଯାୟୀ ଆବଶ୍ୟକ ମାନଦଣ୍ଡ ପୂରଣ କରୁଥିବା ସତ୍ତ୍ବେ କୌଣସି ରାଜ୍ୟର ମେଢକୁ ତିନିବର୍ଷରେ ଥରେ ଭାଗ ନେବାର ସୁଯୋଗ ମିଳିବ। ସାଧାରଣତନ୍ତ୍ର ଦିବସ ପରେଡ ଦେଶର ସବୁଠାରୁ ବଡ ସରକାରୀ ଉତ୍ସବ।
Comments are closed.