ସମାଜ ଡିଜିଟାଲ ଡେସ୍କ: ବେଙ୍ଗାଲୁରୁରେ ଚାଲିଥିବା ପ୍ରଥମ ଟେଷ୍ଟ ମ୍ୟାଚରେ ଭାରତର ସଂଘର୍ଷ ଜାରି ରହିଛି। ପ୍ରଥମ ଇନିଂସରେ ଦଳ ସମ୍ପୂର୍ଣ୍ଣ ଭୁଶୁଡ଼ି ପଡ଼ିବା ପରେ ୨ୟ ଇନିଂସରେ ଭଲ ପ୍ରାରମ୍ଭ କରିଛି। ନ୍ୟୁଜିଲାଣ୍ଡର ୪୦୨ ରନ ଜବାବରେ ଘରୋଇ ଦଳ ୨ ଉଇକେଟ ବିନିମୟରେ ୧୮୦ ରନ୍ ସଂଗ୍ରହ କରି ବ୍ୟାଟିଂ ଜାରି ରଖିଛି। ବିରାଟ କୋହଲି ଏବଂ ସର୍ଫରାଜ ଖାନ ଦମଦାର ପ୍ରଦର୍ଶନ କରିଛନ୍ତି।
ବର୍ଷା ବାଧାପ୍ରାପ୍ତ ପ୍ରଥମ ଟେଷ୍ଟର ପ୍ରଥମ ଦିବସ ଖେଳ ହୋଇପାରି ନ ଥିଲା। ୨ୟ ଦିନରେ ଭାରତ ବ୍ୟାଟିଂ କରି ପ୍ରଥମ ଇନିଂସରେ ମାତ୍ର ୪୬ ରନରେ ଅଲଆଉଟ୍ ହୋଇଯାଇଥିଲା। ୫ ଜଣ ବ୍ୟାଟ୍ସମ୍ୟାନ ଖାତା ଖୋଲିପାରି ନ ଥିଲେ। ଜବାବରେ ନ୍ୟୁଜିଲାଣ୍ଡ ଲଢୁଆ ପ୍ରଦର୍ଶନ କରି ୪୦୨ ରନ ସଂଗ୍ରହ କରିବାରେ ସକ୍ଷମ ହୋଇଥିଲା। ଦଳ ପକ୍ଷରୁ ଡେଭନ କନଓ୍ବେ ୯୧, ଟିମ ସୌଥି ୬୫ ରନ କରିଥିବାବେଳେ ରଚିନ ରବୀନ୍ଦ୍ର ଶତକୀୟ ପାଳି (୧୩୪) ଖେଳିଥିଲେ।
୨ୟ ଇନିଂସରେ ଭାରତ ଭଲ ଆରମ୍ଭ କରିଥିଲା। ଅଧିନାୟକ ରୋହିତ ଶର୍ମା ୫୨ ରନ ଏବଂ ଯଶଶ୍ଵୀ ଜୟସଓ୍ବାଲ ୩୫ ରନ କରି ଆଉଟ ହେବା ପରେ ବିରାଟ କୋହଲି ଏବଂ ସର୍ଫରାଜ ଖାନ ସ୍ଥିତି ସମ୍ଭାଳିଥିଲେ। କୋହଲି ୪୩ ଏବଂ ସର୍ଫରାଜ ୫୧ ରନ କରି ଅପରାଜିତ ରହିଛନ୍ତି।
Comments are closed.