ନୂଆଦିଲ୍ଲୀ : ସାରା ଦୁନିଆରେ ବଜାରରେ ସୁନା ଦାମ୍ ଆକାଶ ଛୁଆଁ ହୋଇଛି । ଭାରତରେ ଖୁବ୍ ଶୀଘ୍ର ପର୍ବପର୍ବାଣି ସହ ବିବାହ ଋତୁ ଆରମ୍ଭ ହେବ । ଏହା ପୂର୍ବରୁ ହିଁ ସୁନା ଦାମ୍ ବଢି ଚାଲିଛି । ଆନ୍ତର୍ଜାତୀୟ ବଜାର ସହ ଘରୋଇ ବଜାରରେ ମଧ୍ୟ ସୁନା ଦାମ୍ ରେକର୍ଡ ଭାଙ୍ଗୁଛି । ଗତ ସପ୍ତାହରେ ୨୬ ସେପ୍ଟେମ୍ବରରେ ଆନ୍ତର୍ଜାତୀୟ ବଜାରରେ ସୁନା ଦାମ୍ ୨୬୮୫.୪୨ ଡଲାର ପ୍ରତି ଆଉନ୍ସରେ ପହଞ୍ଚିଛି । ଘରୋଇ ବଜାରରେ ଏମସିଏକ୍ସରେ ସୁନା ଦାମ୍ ପ୍ରତି ୧୦ ଗ୍ରାମ୍ ୭୫,୭୫୦ ଟଙ୍କା ରହିଛି । ଆନ୍ତର୍ଜାତୀୟ ବଜାରରେ ସୁନା ଦାମ୍ରେ ଏଯାଏଁ ୩୦ ପ୍ରତିଶତ ବୃଦ୍ଧି ପାଇଥିବା ଦେଖାଯାଇଛି ।
ଲଗାତାର ସୁନା ଦାମ୍ ବୃଦ୍ଧି ପାଉଥିବା ହେତୁ ଆଗାମୀ ଦିନରେ ସୁନା ଦାମ୍ ଆହୁରି ବୃଦ୍ଧି ହୋଇପାରେ ବୋଲି ଆଶଙ୍କା କରାଯାଉଛି। ଗତ ଏକ ସପ୍ତାହରେ ସୁନା ଦାମ୍ ୧,୫୪୭ ଟଙ୍କା ବୃଦ୍ଧି ପାଇଛି । ରିପୋର୍ଟ ଅନୁଯାୟୀ, ୨୧ ସେପ୍ଟେମ୍ବରରେ ସୁନା ଦାମ୍ ୭୪,୦୯୩ ଟଙ୍କା ୧୦ ଗ୍ରାମ୍ ପ୍ରତି ଥିଲା । ଯାହା ୨୮ ସେପ୍ଟେମ୍ବରରେ ୭୫,୬୪୦ ଟଙ୍କା ୧୦ ଗ୍ରାମ୍ ପ୍ରତି ପହଞ୍ଚିଛି ।
ରିପୋର୍ଟ ଅନୁଯାୟୀ, ଚଳିତ ବର୍ଷ ଏଯାଏଁ ସୁନା ଦାମ୍ ପ୍ରାୟ ୧୨,୨୮୮ ଟଙ୍କା ମହଙ୍ଗା ହୋଇଛି । ୧ ଜାନୁଆରୀ ୨୦୨୪ରେ ସୁନା ୬୩,୩୫୨ ଟଙ୍କା ଥିବା ବେଳେ ବର୍ତ୍ତମାନ ଏହା ୭୫,୬୪୦ ଟଙ୍କା ୧୦ ଗ୍ରାମ ପ୍ରତି ପହଞ୍ଚିଛି ।
ମନ୍ଦିରରୁ ପୂଜାରୀଙ୍କୁ ନେଇଗଲା ବାଘ; ମଣିଷଖିଆ ବାଘ ୧୦ ଦିନରେ କଲାଣି ୬ ଶିକାର..
ସୁନା ଦାମ୍ରେ ଲଗାତାର ବୃଦ୍ଧିର କାରଣ ୟୁଏସ ଫେଡେରାଲ ରିର୍ଜଭ ଦ୍ୱାରା ସୁଧ ହାରରେ ହ୍ରାସ କରାଯାଉଛି । ଏହାଦ୍ୱାରା ଡଲାର ଦୁର୍ବଳ ହେଉଛି । ଏହାର ପ୍ରଭାବ ସୁନା ଦାମ୍ରେ ପଡୁଥିବା ଦେଖାଯାଉଛି । ଗତ କିଛି ମାସରେ ସାରା ଦୁନିଆର କେନ୍ଦ୍ରୀୟ ବ୍ୟାଙ୍କ ଦ୍ୱାରା ସୁନା ଲଗାତାର କିଣାଯାଉଛି । ଏହା ବ୍ୟତୀତ ଯୁଦ୍ଧର ପରିସ୍ଥିତି, ଇସ୍ରାଏଲ ଓ ଲେବାନନ ମଧ୍ୟରେ ବୃଦ୍ଧି ପାଉଥିବା ମତଭେଦ ଓ ଅସ୍ଥିରତା କାରଣରୁ ମଧ୍ୟ ସୁନା ଦାମ୍ ବୃଦ୍ଧି ପାଉଛି ।
ବିଶେଷଜ୍ଞଙ୍କ ମତାନୁସାରେ ଆଗାମୀ ଦିନରେ ଆହୁରି ସୁନା ଦର ବଢି ପାରେ । ଏହା ପ୍ରାୟ ୧୦ ଗ୍ରାମ ପ୍ରତି ୧ ଲକ୍ଷ ଟଙ୍କାରେ ପହଞ୍ଚିଯିବ ବୋଲି ଆକଳନ ହୋଇଛି । ଡଲାର ମୂଲ୍ୟରେ ବଡ ଧରଣର ପରିବର୍ତ୍ତନ ନଆସିବା କିମ୍ବା ଯୁଦ୍ଧ ରାଜନୀତି ନବଦଳିବା ଯାଏଁ ସୁନା ଦର ଖସିବାର ସମ୍ଭାବନା ନାହିଁ ବୋଲି ବିଶେଷଜ୍ଞ କହିଛନ୍ତି ।
ଦେଖନ୍ତୁ ଭିଡିଓ ; ହାତୀ ସାମ୍ନାରେ ଯାଉଥିଲେ, ଓଲଟିଗଲା ଅଟୋ, ଦୌଡିଲେ ଲୋକେ..
Comments are closed.