ନୂଆଦିଲ୍ଲୀ : ଜଙ୍ଗଲ ରାସ୍ତାରେ ଯାନବାହନରେ ଯାଉଥିବା ସମୟରେ ଅଧିକ ଧ୍ୟାନ ଓ ସାବଧାନତା ଅବଲମ୍ବନ କରିବା ଉଚିତ୍ । କାରଣ ହଠାତ୍ ଜଙ୍ଗଲୀ ଜନ୍ତୁ ସାମ୍ନାକୁ ଆସି ଯିବାର ସମ୍ଭାବନା ଥାଏ । ବନ ବିଭାଗ ପକ୍ଷରୁ ମଧ୍ୟ ଏଥିପାଇଁ ଚେତାବନୀ ଦେବା ସହ ବୋର୍ଡ ଲଗାଇ ଥାଆନ୍ତି । ତେଣୁ ଜୀବଜନ୍ତୁଙ୍କୁ ଅଣଦେଖା କରିବା ସହ ଏଥିପ୍ରତି ଧ୍ୟାନ ନଦେଲେ ଜୀବନ ବିପଦରେ ପଡିଥାଏ । ନିକଟରେ ଏଭଳି ହିଁ ଏକ ଭିଡିଓ ଭାଇରାଲ ହେଉଛି । ଏହି ଭିଡିଓଟି ଏକ ଜଙ୍ଗଲ ରାସ୍ତାର ବୋଲି ଜଣାପଡୁଛି । ମାତ୍ର କେଉଁ ସ୍ଥାନର ତାହାର ସ୍ପଷ୍ଟତା ମିଳି ନାହିଁ।
ଭିଡିଓରେ ଦେଖିପାରିବେ, ରାସ୍ତାରେ ଜଣେ ଅଟୋ ଚାଳକ ଅଟୋ ନେଇ ଯାଉଛନ୍ତି । ଠିକ୍ ସେହି ସମୟରେ ଅଟୋର ସାମ୍ନାରେ ଗୋଟିଏ ହାତୀ ରାସ୍ତାରେ ଚାଲି କରି ଯାଉଛି । ଅଟୋ ଚାଳକ ହାତୀକୁ ଦେଖି ଅଟୋକୁ ରାସ୍ତା କଡରେ ରଖିଲେ ନାହିଁ କି ଅଟୋରୁ ବାହାରକୁ ଆସିଲେ ନାହିଁ । ଚାଳକ ଜଣକ ହାତୀର ଖୁବ୍ ନିକଟରୁ ହିଁ ଯାଉଛନ୍ତି।
ହାତୀର ଅତି ନିକଟରୁ ଯିବା ସମୟରେ ଚାଳକ ଅଟୋ ଉପରୁ ନିୟନ୍ତ୍ରଣ ହରାଉଛନ୍ତି । ହାତୀ ନିକଟରେ ହିଁ ଅଟୋଟି ଓଲଟି ଯାଉଛି । ଅଟୋ ଓଲଟିବାକୁ ଆରମ୍ଭ କରିବା ମାତ୍ରେ ଲୋକେ ଅଟୋରୁ ବାହାରି ଏଣେତେଣେ ଦୌଡୁଛନ୍ତି । ସୌଭାଗ୍ୟବଶତଃ କୌଣସି ଜୀବନହାନୀ ହୋଇ ନାହିଁ । ଭିଡିଓକୁ ଦେଖିବା ପରେ ଲୋକେ ନିଜର ଭିନ୍ନ ଭିନ୍ନ ମତ ଦେଇଛନ୍ତି ।
