ପୁରୀ : ଶ୍ରୀମନ୍ଦିରରେ ସୋମବାର ରକ୍ଷାବନ୍ଧନ ଏବଂ ବଡ଼ ଠାକୁର ଶ୍ରୀ ବଳଭଦ୍ରଙ୍କ ଜନ୍ମ ଉତ୍ସବ ପାଳିତ ହୋଇଛି। ବାସୁଙ୍ଗା ପାଟରେ ପଟରା ବିଶୋଇ ସେବକ ପ୍ରସ୍ତୁତ କରିଥିବା ରାଖିଗୁଡିକୁ ଦାରୁବ୍ରହ୍ମ ଶ୍ରୀ ଜଗନ୍ନାଥ ଏବଂ ଶ୍ରୀ ବଳଭଦ୍ର ଶ୍ରୀଭୂଜରେ ପରିଧାନ କରିଛନ୍ତି। ଏହାଛଡା ପ୍ରଭୁଙ୍କୁ ଗୁଆର ମାଳ ଲାଗି କରାଯାଉଛି। ପରମ୍ପରା ଅନୁଯାୟୀ ଭଉଣୀ ସୁଭଦ୍ରା ଶ୍ରାବଣ ପୂର୍ଣ୍ଣିମା ତିଥିରେ ଦୁଇଭାଇ ଜଗା ବଳିଆଙ୍କ ହାତରେ ରାଖି ବାନ୍ଧିଛନ୍ତି। ଶ୍ରୀମନ୍ଦିର ରତ୍ନସିଂହାସନରେ ପାଳିତ ହୋଇଥିବା ପ୍ରଭୁଙ୍କ ଏହି ମାନବୀୟ ଲୀଳା ଦେଖିବାକୁ ଭକ୍ତଙ୍କ ମଧ୍ୟରେ ପ୍ରବଳ ଉତ୍କଣ୍ଠା ପରିଲକ୍ଷିତ ହୋଇଛି। ସେହିପରି ମାର୍କଣ୍ଡେୟ ତୀର୍ଥ ପୁଷ୍କରିଣୀରେ ପ୍ରଭୁ ଶ୍ରୀ ବଳଭଦ୍ରଙ୍କ ଜନ୍ମ ବିଧି ପାଳିତ ହୋଇଛି। ଶ୍ରୀ ଜଗନ୍ନାଥ ମନ୍ଦିରରେ ଠାକୁରଙ୍କ ମଧ୍ୟାହ୍ନ ଧୂପ ଶେଷ ହେବା ପରେ ଚକ୍ରରାଜ ଶ୍ରୀ ସୁଦର୍ଶନଙ୍କୁ ବିମାନବଡୁ ସେବକମାନେ ଚଉଦୋଳରେ ବିଜେ କରିଥିଲେ। ଶୋଭାଯାତ୍ରାରେ ସୁଦର୍ଶନଙ୍କୁ ମାର୍କଣ୍ଡେୟ ପୁଷ୍କରିଣୀକୁ ବିଜେ କରାଯାଇଥିଲା। ଶୁଦ୍ଧ ସୁଆର ସେବକଙ୍କ ଦ୍ବାରା ମାଟିରେ ପ୍ରଭୁ ଶ୍ରୀବଳଭଦ୍ରଙ୍କ ମୂର୍ତ୍ତି ପ୍ରସ୍ତୁତ କରାଯାଇଥିଲା। ପୂଜାପଣ୍ଡା ସେବକ ସେଥିରେ ଜୀବନ୍ୟାସ କରିଥିଲେ। ବୈଦିକ ରୀତିରେ ଜନ୍ମବିଧି ସମ୍ପନ୍ନ ହୋଇଥିଲା। ମୁଦିରସ୍ତ ପ୍ରସାଦ ଲାଗି କରିଥିଲେ। ପୂଜାପଣ୍ଡା ପଞ୍ଚ ଉପଚାରରେ ତାହାକୁ ଭୋଗ କରିଥିଲେ। ପ୍ରଭୁ ଶ୍ରୀ ବଳଭଦ୍ରଙ୍କୁ ବନ୍ଦାପନା କରାଯାଇଥିଲା। ଏହାପରେ ମାଟି ମୂର୍ତ୍ତି ପାଣିରେ ବିସର୍ଜନ କରାଯାଇଥିଲା। ଚକ୍ରରାଜ ଶ୍ରୀ ସୁଦର୍ଶନ ଚାରି ଆଶ୍ରମ ପରିକ୍ରମା ପରେ ଶ୍ରୀ ଜଗନ୍ନାଥ ମନ୍ଦିରକୁ ବାହୁଡା଼ ବିଜେ କରିଥିଲେ।
Popular Categories
Previous article
Next article