ବୃଦ୍ଧଙ୍କ ଏଟିଏମ କାର୍ଡ ବଦଳ କରି ଟଙ୍କା ଲୁଟ୍‌

ଗୋପାଳପୁର: ଗୋଳନ୍ଥରା ଥାନା ଅନ୍ତର୍ଗତ କନିଷିଠାରେ ଥିବା ଏସବିଆଇ ଏଟିଏମ ପରିସରକୁ ଟଙ୍କା ଉଠାଣକୁ ଯାଇଥିବା ଜଣେ ବୃଦ୍ଧଙ୍କ ଏଟିଏମ କାର୍ଡକୁ ଚଞ୍ଚକତା କରି ବଦଳ କରିବା ସହ ଟଙ୍କା ଲୁଟ କରିଥିବା ନେଇ ଥାନାରେ ଲିଖିତ ଅଭିଯୋଗ କରାଯାଇଛି। ଅଭିଯୋଗ ଅନୁଯାୟୀ, କନିଷିରେ ରହୁଥିବା ହରିହର ମହାପାତ୍ର ଶନିବାର ଅପରାହ୍ନରେ ହାଟଠାରେ ଥିବା ଏଟିଏମକୁ ଟଙ୍କା ଉଠାଣ କରିବାକୁ ଯାଇଥିଲେ। ସେହି ସମୟରେ ଟଙ୍କା ଉଠାଣ ହୋଇ ନ ଥିଲା। ତାଙ୍କ ପଛରେ ଠିଆ ହୋଇଥିବା ଜଣେ ଯୁବକ ଚଞ୍ଚକତା କରି କଥାବାର୍ତ୍ତା ଆଳରେ ହରିହରଙ୍କ ଏଟିଏମ କାର୍ଡକୁ ବଦଳ କରି ଦେଇଥିଲେ। ଟଙ୍କା ଉଠାଣ ନ ହେବାରୁ ହରିହର ଘରକୁ ଚାଲି ଯାଇଥିଲେ। ଆଜି ସକାଳୁ ତାଙ୍କ ମୋବାଇଲକୁ ୨୯ ହଜାର ଟଙ୍କା ୩ଟି କିସ୍ତିରେ ଉଠାଣ ହୋଇଥିବା ମେସେଜ ଆସିଥିଲା। ତାଙ୍କର ସନ୍ଦେହ ହେବାରୁ ସେ ନିଜ ଏଟିଏମ କାର୍ଡକୁ ଦେଖିଥିଲେ। ଉକ୍ତ ଏଟିଏମ କାର୍ଡଟି ତାଙ୍କର ହୋଇ ନ ଥିବା ବେଳେ ସେଥିରେ ରବି. କେ ବୋଲି ଲେଖାଯାଇଥିବା ଦେଖିବାକୁ ପାଇଥିଲେ। ତେଣୁ ସେ ଠକାମିର ଶିକାର ହୋଇଥିବା ଜାଣି ଗୋଳନ୍ଥରା ଥାନାରେ ଲିଖିତ ଅଭିଯୋଗ କରିଛନ୍ତି। ଅଭିଯୋଗକୁ ଭିତ୍ତିକରି ପୁଲିସ ପକ୍ଷରୁ ୪୯୦/୨୪ରେ ଏକ ମାମଲା ରୁଜୁ କରି ଏଟିଏମ ପରିସରରେ ଲାଗିଥିବା ସିସିଟିଭି ଫୁଟେଜ ଯାଞ୍ଚ କରିଛି। ଏହା ସହିତ ହରିହରଙ୍କ ନିକଟରେ ଥିବା ଏଟିଏମ କାର୍ଡକୁ ନେଇ ପୁଲିସ ତଦନ୍ତ କରୁଛି।