କଳାପଥର (ବାଙ୍କୀ): ଧଳାପଥର ରାଜସ୍ୱ ନିରୀକ୍ଷକଙ୍କ ଅଧୀନ ଧଳାପଥର, ଗୋପୀନାଥପୁର, ଶ୍ରୀରାମପୁର, ଠଣାପଲ୍ଲୀ ଆଦି ବିଭିନ୍ନ ମୌଜାରେ ସରକାରୀ ଜାଗା ଏବେ ଜବରଦଖଲରେ ରହିଛି। ସରକାରୀ କର୍ମଚାରୀଙ୍କୁ କରାୟତ୍ତ କରି ପ୍ରଭାବଶାଳୀ ବ୍ୟକ୍ତିମାନେ ସରକାରୀ ଜମିକୁ ଅକ୍ତିଆର କରି ସେଥିରେ ବୃହତ ଅଟ୍ଟାଳିକା ଓ ଦୋକାନ ଗୃହ ନିର୍ମାଣ କରିଛନ୍ତି। ଏପରିକି ଶ୍ମଶାନ ଜମି ଉପରେ ଅଟ୍ଟାଳିକା ନିର୍ମାଣ ହୋଇଥିବା ଦେଖିବାକୁ ମିଳିଛି। ସୂଚନା ଅନୁସାରେ ପାଟପୁର ଶାସନ ପଞ୍ଚାୟତ ଧଳାପଥର ରାଜସ୍ୱ ନିରୀକ୍ଷକଙ୍କ ଅଧୀନ ଶ୍ରୀରାମପୁର ମୌଜାର କୋଦୁଅବେରେଣ-ଭାପୁର ବାଇପାସ ପୂର୍ତ୍ତବିଭାଗ ରାସ୍ତା ପାଶ୍ୱର୍ରେ ସରକାର ଜମି ଜବରଦଖଲରେ ରହିଛି। ସେହିପରି ରାଜସ୍ୱ କାର୍ଯ୍ୟାଳୟ ବାଳିକା ଉଚ୍ଚ ବିଦ୍ୟାଳୟ, ବିଦ୍ୟୁତ କାର୍ଯ୍ୟାଳ. କଳାପଥର ଡାକ୍ତରଖାନା ଜମିକୁ ଜବରଦଖଲ କରି ଏହାକୁ ବିକ୍ରି କରାଯାଉଥିବା ଅଭିଯୋଗ ହୋଇଛି। ଶ୍ରୀରାମପୁର ଗ୍ରାମବାସୀଙ୍କ ଶ୍ମଶାନ ନଥିବାରୁ ଠଣାପଲ୍ଲୀ ଶ୍ମଶାନକୁ ଲୋକମାନେ ବ୍ୟବହାର କରୁଛନ୍ତି। ଆଗାମୀ ଦିନରେ ଯଦି କୌଣସି କାରଣରୁ ଠଣାପାଲ୍ଲୀ ଗ୍ରାମବାସୀ ଅନୁମତି ଦିଅନ୍ତି ନାହିଁ ତେବେ ଶ୍ରୀରାମପୁରବାସୀ ଶବଦାହ ପାଇଁ ଅନେକ ଅସୁବିଧାର ସମ୍ମୁଖୀନ ହୋଇପାରନ୍ତି।
ସୂଚନାଯୋଗ୍ୟ ୧୯୯୫ରେ ହୋଇଥିବା ସେଟଲମେଣ୍ଟରେ କିସମ ପରିବର୍ତ୍ତନ କରି ପ୍ରଭାବଶାଳୀ ଲୋକେ ଜମିକୁ ଜବରଦଖଲ କରିଥିବା ଅଭିଯୋଗ ହୋଇଛି। ଏସମ୍ପର୍କରେ ବୋଲଗଡ ତହସିଲଦାର ନିବେଦିତା ପରିଡାଙ୍କୁ ପଚାରିବାରୁ ସେ କହିଛନ୍ତି ଧଳାପଥର ରାଜସ୍ୱ ନିରୀକ୍ଷକ ଅଧୀନରେ ହୋଇଥିବା ଜବରଦଖଲ ସମ୍ପର୍କରେ ଅଭିଯୋଗ ଆସିଛି। ଅନ୍ୟପକ୍ଷରେ ଏସମ୍ପର୍କରେ ସମୁଦାୟ ୧୭ଜଣ ଜବରଦଖଲକାରୀଙ୍କୁ ପ୍ରଶାସନ ପକ୍ଷରୁ ନୋଟିସ ଜାରି କରାଯାଇଛି। ଆଗାମୀ ଦିନରେ ଅନ୍ୟମାନଙ୍କୁ ନୋଟିସ ଜାରି କରାଯିବ। ପରେ ନିୟମାନୁସାରେ ଉଚ୍ଛେଦ କାର୍ଯ୍ୟ କରାଯିବ ବୋଲି କୁହାଯାଇଛି।
Comments are closed.