ସମାଜ ଡିଜିଟାଲ ଡେସ୍କ: ପୁଅକୁ ସ୍କୁଲରେ ଛାଡ଼ିବାକୁ ଯିବାବେଳେ ଚାପି ଦେଲା ଟ୍ରକ। ଘଟଣାସ୍ଥଳରେ ଚାଲିଗଲା ୩ ଜୀବନ। ଏଭଳି ଏକ ହୃଦୟବିଦାରକ ଦୁର୍ଘଟଣା ଘଟିଛି କେନ୍ଦୁଝର ଜିଲା ଯୋଡ଼ା ଥାନା ଅନ୍ତର୍ଗତ ଡିଏଭି ସ୍କୁଲ ନିକଟରେ। ଦୁର୍ଘଟଣାରେ ପ୍ରାଣ ହରାଇଛନ୍ତି ବାପା-ପୁଅ ସମେତ ପଡ଼ୋଶୀ ଘରର ଆଉ ଏକ ପିଲା। ଦୁର୍ଘଟଣା ପରେ ଘଟଣାସ୍ଥଳରେ ପ୍ରବଳ ଉତ୍ତେଜନା ପ୍ରକାଶ ପାଇଛି। ଖବର ପାଇ ପୁଲିସ ଘଟଣାସ୍ଥଳରେ ପହଞ୍ଚି ପରିସ୍ଥିତି ନିୟନ୍ତ୍ରଣ କରିବାକୁ ଉଦ୍ୟମ କରୁଛି।
ମିଳିଥିବା ସୂଚନା ଅନୁସାରେ, ସ୍ଥାନୀୟ ଆଜାଦ ବସ୍ତିର ଜଣେ ବ୍ୟକ୍ତି ତାଙ୍କ ପୁଅ ଏବଂ ନିଜ ପଡ଼ିଶାର ଅନ୍ୟ ଜଣେ ପିଲାଙ୍କୁ ବାଇକରେ ବସାଇ ସ୍କୁଲରେ ଛାଡ଼ିବାକୁ ଯାଉଥିଲେ। ସ୍କୁଲ ନିକଟ ରାସ୍ତାରେ ଏକ ଟ୍ରକ ସେମାନଙ୍କୁ ଧକ୍କା ଦେବା ସହିତ ୩ ଜଣଙ୍କ ଉପରେ ଚଢ଼ି ଯାଇଥିଲା। ଘଟଣାସ୍ଥଳରେ ହିଁ ୩ ଜଣଙ୍କ ମୃତ୍ୟୁ ଘଟିଥିଲା।
