ଭୁବନେଶ୍ୱର: ବିଜେଡି ରାଜ୍ୟସଭା ସାଂସଦ ପଦରୁ ମମତା ମହାନ୍ତ ପଦ ସହ ଦଳରୁ ଇସ୍ତଫା ଦେଇ ବିଜେପିରେ ସାମିଲ ହୋଇଛନ୍ତି । ବିଜେଡି ଛାଡି ପଦ୍ମ ଧରିବା ପରେ ବିଜେପି ନେତା ଅରବିନ୍ଦ ଢାଲି ବଡ ବୟାନ ଦେଇଛନ୍ତି । ସେ କହିଛନ୍ତି ଭବିଷ୍ୟତରେ ବିଜେଡି ଆଉ ରହିବ ନାହିଁ । ବିଜେଡି ବସା ଖାଲି ହୋଇଯିବ । ବିଜେପି ହେଲା ଜାତୀୟ ଦଳ, ଜାତୀୟ ଦଳର କେବେ ବିଲୟ ହୁଏ ନାହିଁ । ଆଞ୍ଚଳିକ ଦଳର ବିଲୟ ହୋଇଥାଏ । ଗଣମାଧ୍ୟମରେ ଆଜି ଏଭଳି ପ୍ରତିକ୍ରିୟା ଦେଇଛନ୍ତି ପୂର୍ବତନ ବିଧାୟକ ଅରବିନ୍ଦ ଢାଲି । ମୁଖ୍ୟମନ୍ତ୍ରୀ ମୋହନ ମାଝୀ ଲୋକଙ୍କ ଅଭିଯୋଗ ଶୁଣିବା ସହ ୨୪ଘଣ୍ଟା କାମ କରୁଛନ୍ତି । ସବୁ କାମ ଦ୍ରୁତ ଗତିରେ ଚାଲିଛି । ବିଜେଡି ୨୫ବର୍ଷ ରହି କିଛି କରିପାରିଲା ନାହିଁ । ୫ ବର୍ଷ ଭିତରେ ସବୁ ପ୍ରତିଶ୍ରୁତି ଏ ସରକାର ପୂରଣ କରିବ ବୋଲି ଅରବିନ୍ଦ ଢାଲି କହିଛନ୍ତି । ସେପଟେ ଢାଲିଙ୍କ ମନ୍ତବ୍ୟ ପରେ ବିଜେଡି ନେତା ଅମର ଶତପଥୀ କହିଛନ୍ତି ଦଳର ଆମୂଳଚୁଳ ସଂଗଠନ ଠିକ୍ ନକଲେ ଆଗକୁ ଅନେକ ଅଘଟଣ ଘଟିବ । ଆମ ସମସ୍ତଙ୍କର ଏ ଦିଗରେ ଅନୁଭବ ରହିଛି । ସଂଗଠନ ଠିକ୍ କରିବାକୁ ପ୍ରଚେଷ୍ଟା ଆରମ୍ଭ ହୋଇଛି ଦେଖାଯାଉ ଆଗକୁ କଣ ହେଉଛି ।
Comments are closed.