ପାରାଦୀପ ବନ୍ଦରରେ ଟ୍ରମା ଆଣ୍ଡ ବର୍ଣ୍ଣ କେୟାର କେନ୍ଦ୍ର ଉଦ୍‌ଘାଟିତ

ସମାଜ ଡିଜିଟାଲ ଡେସ୍କ: ବନ୍ଦର, ଜାହାଜ ଚଳାଚଳ ଓ ଜଳପଥ ମନ୍ତ୍ରଣାଳୟର ସଚିବ ଟି.କେ. ରାମଚନ୍ଦ୍ରନ ପାରାଦୀପ ବନ୍ଦର କର୍ତ୍ତୃପକ୍ଷ(ପିପିଏ)କୁ ସୋମବାର ପ୍ରଥମ ଥର ପାଇଁ ଗସ୍ତ କରିଛନ୍ତି। ଏହି ଗସ୍ତ ସମୟରେ ସେ ୧୩ କୋଟିରୁ ଅଧିକ ଟଙ୍କା ମୂଲ୍ୟର ଅନେକ ଗୁରୁତ୍ୱପୂର୍ଣ୍ଣ ପ୍ରକଳ୍ପର ଉଦଘାଟନ ଓ ଶିଳାନ୍ୟାସ କରିଛନ୍ତି। ପାରାଦୀପ ବନ୍ଦର ହସ୍ପିଟାଲର ନବନିର୍ମିତ ଆନେକ୍ସ ବିଲ୍ଡିଂରେ ଟ୍ରମା ଆଣ୍ଡ ବର୍ଣ୍ଣ କେୟାର(ଟିବିସି) କେନ୍ଦ୍ରକୁ ସେ ଉଦ୍‌ଘାଟନ କରିଛନ୍ତି। ୨ କୋଟି ୯୦ ଲକ୍ଷ ଟଙ୍କା ବ୍ୟୟରେ ନିର୍ମିତ ଏହି କେନ୍ଦ୍ର ପାରାଦୀପ ଓ ଏହାର ଆଖପାଖ ଅଞ୍ଚଳରେ ଟ୍ରମା ଓ ପୋଡ଼ିଯାଇଥିବା ପୀଡ଼ିତଙ୍କ ପାଇଁ ସ୍ବାସ୍ଥ୍ୟ ସେବା ଯୋଗାଇଦେବ।

ସଚିବ ରାମଚନ୍ଦ୍ରନ ପିପିଏର ଜଳ ବିଶୋଧନ ପ୍ଲାଣ୍ଟର ଶିଳାନ୍ୟାସ କରିଛନ୍ତି। ୧୦.୫୦ କୋଟି ଟଙ୍କା ବ୍ୟୟରେ ନିର୍ମିତ ହେବାକୁ ଥିବା ଏହି ପ୍ରକଳ୍ପରେ ତାଳଦଣ୍ଡା କେନାଲ ଜରିଆରେ ଶୁଦ୍ଧ ପାଣି ମିଳିବ ଏବଂ ଦୈନିକ ୧୬ ନିୟୁତ ଲିଟର ପାଣି ଫିଲ୍ଟର କରିବାର କ୍ଷମତା ରହିବ। ପାରାଦୀପ ବନ୍ଦରର ଜଳ ଭିତ୍ତିଭୂମିରେ ଉନ୍ନତି ଆଣିବା ଏବଂ ପୋର୍ଟ ଟାଉନସିପ୍‌ର ନାଗରିକମାନଙ୍କୁ ଗୁଣାତ୍ମକ ପାନୀୟ ଜଳ ଯୋଗାଣ ପାଇଁ ୨୦୨୪ ଡିସେମ୍ବର ସୁଦ୍ଧା ଏହି କାରଖାନା ଶେଷ ହେବ ବୋଲି ଆଶା କରାଯାଉଛି।

ରାମଚନ୍ଦ୍ରନ ପିପିଏ କାର୍ଯ୍ୟର ସମୀକ୍ଷା କରିବାସହ ବିଭାଗୀୟ ମୁଖ୍ୟ ଓ ଉପମୁଖ୍ୟଙ୍କ ସହ ଆଲୋଚନା କରିଛନ୍ତି। ସେ ଯାନ୍ତ୍ରିକ କୋଇଲା ପରିଚାଳନା ପ୍ଲାଣ୍ଟରେ ବନ୍ଦର ପରିଚାଳନା, ଯୋଜନା ଏବଂ ସମ୍ପ୍ରସାରଣ ଆଦିର ଯାଞ୍ଚ ଏବଂ ସମୀକ୍ଷା କରିଛନ୍ତି। ଉତ୍ପାଦକତା ବୃଦ୍ଧି ପାଇଁ ବ୍ୟବସ୍ଥାରେ ଉନ୍ନତି ଆଣିବା ପାଇଁ ସେ ପରାମର୍ଶ ଦେଇଛନ୍ତି।

ବନ୍ଦର କାର୍ଯ୍ୟର ସାମଗ୍ରିକ କାର୍ଯ୍ୟଦକ୍ଷତାରେ ଉନ୍ନତି ଆଣିବା ଉଦ୍ଦେଶ୍ୟରେ ସଚିବ ଅନେକ ପଦକ୍ଷେପ ନେବାକୁ ପରାମର୍ଶ ଦେଇଚନ୍ତି। ଏହି ସୁପାରିସଗୁଡ଼ିକ ପାରାଦୀପ ବନ୍ଦରର ଦୀର୍ଘମିଆଦୀ ଅଭିବୃଦ୍ଧି ଓ ସଫଳତାରେ ସହାୟକ ହେବା ସହ କାର୍ଯ୍ୟପ୍ରବାହକୁ ସୁବ୍ୟବସ୍ଥିତ କରିବ ବୋଲି ଆଶା କରାଯାଉଛି।

ସୂଚନାଯୋଗ୍ୟ, ଓଡ଼ିଶାର ପାରାଦୀପ ବନ୍ଦର ହେଉଛି ଦେଶର ସର୍ବୋଚ୍ଚ ମାଲ ପରିବହନ କରୁଥିବା ପ୍ରମୁଖ ବନ୍ଦର। ୨୦୨୩-୨୪ ଆର୍ଥିକ ବର୍ଷରେ ପିପିଏ ୧୪୫.୩୮ ନିୟୁତ ମେଟ୍ରିକ୍ ଟନ୍(ଏମଏମଟି) ମାଲ ପରିବହନ କରି ସର୍ବୋଚ୍ଚ କାର୍ଗୋ ହ୍ୟାଣ୍ଡଲିଂ ବନ୍ଦରରେ ପରିଣତ ହୋଇଛି। ଭିଜନ ୨୦୪୭ ଅଧୀନରେ ବନ୍ଦର ପରିଚାଳନା କ୍ଷମତାକୁ ୧୦, ୦୦୦ ଏମଟିପିଏକୁ ବୃଦ୍ଧି କରିବାକୁ ଲକ୍ଷ୍ୟ ରଖାଯାଇଛି। ଖୁବଶୀଘ୍ର ଏହି ଯୋଜନାର ରୂପରେଖ ଘୋଷଣା କରାଯିବ। ଘରୋଇ ଅଂଶଗ୍ରହଣ ପାଇଁ ରାସ୍ତା ରହିବ ଯାହା ଉପରେ କାମ କରାଯାଉଛି। ୨୦୪୭ ସୁଦ୍ଧା ବୃହତ୍‍ ବନ୍ଦରରେ ପରିଣତ ହେବା ପାଇଁ ସମସ୍ତ ବନ୍ଦର ମାଷ୍ଟର ପ୍ଲାନ ପ୍ରସ୍ତୁତ କରୁଛନ୍ତି। ବନ୍ଦର ଭିତ୍ତିଭୂମି ଓ ସୁବିଧାରେ ଉନ୍ନତି ଆଣିବା, କାର୍ଯ୍ୟ ସମୟ ହ୍ରାସ କରିବା ଏବଂ ପରିଚାଳନା କ୍ଷମତା ବୃଦ୍ଧି କରିବା ୨୦୪୭ ଲକ୍ଷ୍ୟର ମୂଳଦୁଆ ହେବ।