କାଲିମେଳା : ମାଲକାନଗିରି ଜିଲ୍ଲା କାଲିମେଳା ବ୍ଲକ ମୋଟୁ ଥାନା ଅନ୍ତର୍ଗତ ଏମପିଭି-୫୫ ଗ୍ରାମରେ ଶୁକ୍ରବାର ସନ୍ଧ୍ୟା ସମୟରେ ଏକ ବିଭତ୍ସ ହତ୍ୟାକାଣ୍ଡ ଘଟିଛି।। ନିଜ ଜନ୍ମ କଲା ମା’ ଙ୍କୁ ତାର ପୁଅ ମାରି ରାଜରାସ୍ତା ଉପରେ ପୋଡି ଦେଇଛି। ଏହି ଲୋମଟାଙ୍କୁରା ଘଟଣା ସ୍ଥାନୀୟ ଅଂଚଳରେ ଚାଞ୍ଚଲ୍ୟ ସୃଷ୍ଟି କରିଛି। ହତ୍ୟାକାଣ୍ଡ ପରେ ଅଭିଯୁକ୍ତ ପୁଅ ଘଟଣା ସ୍ଥଳରୁ ଫେରାର ହୋଇଯାଇଥିବା ଜଣାପଡିଛି।
ସ୍ଥାନୀୟ ଅଂଚଳବାସୀଙ୍କ ଠାରୁ ମିଳିଥିବା ସୂଚନା ଅନୁଯାୟୀ ଉକ୍ତ ଗ୍ରାମରେ ରହୁଥିବା ତାରକ ମଣ୍ଡଳଙ୍କ ସ୍ତ୍ରୀ ଗୀତା ମଣ୍ଡଳ(୫୦)ଙ୍କୁ ତାଙ୍କ ପୁଅ ତାପସ ମଣ୍ଡଳ(୩୫) ହତ୍ୟା କରିଥିବା ଅଭିଯୋଗ ହୋଇଛି। ଏଥିରେ ମହିଳାଙ୍କ ୭୦ପ୍ରତିଶତ ଶରୀର ପୋଡିଯାଇଥିବା ସୂଚନା ମିଳିଛି। ରାତି ପର୍ଯ୍ୟନ୍ତ ଶବ ରାସ୍ତା ଉପରେ ପଡିଥିବା ଦେଖିବାକୁ ମିଳିଛି। ଏହି ହତ୍ୟାକାଣ୍ଡ ସମ୍ପର୍କରେ ଉକ୍ତ ଗ୍ରାମ ଦାୟିତ୍ୱରେ ଥିବା ଗ୍ରାମରଖୀ ଘଟଣା ସମ୍ପର୍କରେ ମୋଟୁ ଥାନାରେ ଏକ ଲିଖିତ ଅଭିଯୋଗ କରିଥିଲେ। ଖବର ପାଇ ମୋଟୁ ଥାନା ଅଧିକାରୀ ରଘୁନାଥ ମାଝିଙ୍କ ନେତୃତ୍ୱରେ ଏକ ଟିମ ଏମପିଭି-୫୫ ଗ୍ରାମରେ ପହଂଚି ରାସ୍ତା ଉପରେ ଅର୍ଦ୍ଧଦଗ୍ଧ ଅବସ୍ଥାରେ ପଡିଥିବା ଗୀତା ମଣ୍ଡଳଙ୍କ ମୃତ ଶରୀରକୁ ଜବତ କରିଥିଲା। ଏହାସହ ପୁଲିସ ଘଟଣାର ତଦନ୍ତ ଆରମ୍ଭ କରିଛି। ଏଥିସହିତ ହତ୍ୟାରେ ବ୍ୟବହୃତ ମାରଣାସ୍ତ୍ରକୁ ପୁଲିସ ଜବତ କରିଛି। ଗ୍ରାମବାସୀମାନଙ୍କ ପକ୍ଷରୁ ମିଳିଥିବା ସୂଚନା ଅନୁଯାୟୀ ମୃତ ଗୀତାଙ୍କ ସ୍ୱାମୀ ତାରକ ପ୍ରାୟ ୬ ମାସ ହେବ ଆନ୍ଧ୍ରପ୍ରଦେଶରେ ରହି କାର୍ଯ୍ୟ କରୁଛନ୍ତି। ମା’ ଗୀତା ଓ ଏକମାତ୍ର ପୁଅ ତାପସ ଗ୍ରାମ ଘରେ ଏକତ୍ରିତ ରହୁଥିଲେ। ପୂର୍ବରୁ ତାପସ ମା’ ସହିତ ଅନେକ ଥର ବିଭିନ୍ନ କଥାକୁ ନେଇ ପାଟିତୁଣ୍ଡ ଗଣ୍ଡଗୋଳ କରୁଥିବା ଜଣାପଡିଛିା ଶୁକ୍ରବାର ମଧ୍ୟ ମା’ ପୁଅ ମଧ୍ୟରେ ପାଟିତୁଣ୍ଡ ହୋଇଥିଲା। ଏଥିରେ ରାଗି ଯାଇ ତାପସ ନିଜ ମା’କୁ ବାଡେଇ ବାଡେଇ ହତ୍ୟା କରିଥିଲା। ହତ୍ୟା କରିବା ପରେ ମା’ର ଶବକୁ ଗାଁ ରାସ୍ତାକୁ ଆଣି ନିଆଁ ଲଗାଇ ପୋଡି ଦେଇଥିଲା। ଅଭିଯୁକ୍ତକୁ ଧରିବା ପାଇଁ ପୁଲିସ ବିଭିନ୍ନ ସ୍ଥାନରେ ତନାଘନା କରୁଛି।
