ନନ୍ଦନକାନନ : ନନ୍ଦନକାନନ ପ୍ରାଣୀଉଦ୍ୟାନ ଧଳାବାଘ ପାଇଁ ସ୍ବତନ୍ତ୍ର ପରିଚୟ ସୃଷ୍ଟି କରିଥିଲା। ନନ୍ଦନକାନନରେ ବାଘ ସଂଖ୍ୟା ବଢ଼ିବାକୁ ଯାଉଛି। ଧଳା ବାଘୁଣୀ ‘ମୌସୁମୀ’ ଏବେ ଗର୍ଭବତୀ। ଜନ୍ମ ଦେବାକୁ ଯାଉଛି ପ୍ରଥମ ଶାବକ। ଏନେଇ ପ୍ରାଣୀଉଦ୍ୟାନ କର୍ତ୍ତୃପକ୍ଷ ସଜାଗ ରହିଥିବାବେଳେ ଏପଟେ ନୂଆ ସଦସ୍ୟଙ୍କ ଆଗମନକୁ ସମସ୍ତେ ଅପେକ୍ଷା କରି ରହିଛନ୍ତି। ପ୍ରସବ ସମୟ ପାଖେଇ ଆସୁଥିବାରୁ ଜନ୍ତୁ କେୟାରଟେକର ଓ ବନରକ୍ଷୀ ମୌସୁମୀ ପ୍ରତି ସ୍ବତନ୍ତ୍ର ଦୃଷ୍ଟି ଦେଉଛନ୍ତି। ଅଗଷ୍ଟ ପ୍ରଥମ ସପ୍ତାହରେ ଶାବକ ଜନ୍ମ ଦେବ ବୋଲି ଏଠାକାର ଚିକିତ୍ସକମାନେ ପୂର୍ବାନୁମାନ କରିଛନ୍ତି। ଚଳିତ ମାସ ୧ରେ ନନ୍ଦନକାନନ ବରିଷ୍ଠ ବନ୍ୟପ୍ରାଣୀ ଚିକିତ୍ସକ ଡା. ଶରତ ଚନ୍ଦ୍ର ମିଶ୍ରଙ୍କ ତତ୍ତ୍ବାବଧାନରେ ଅଲଟ୍ରାସାଉଣ୍ଡ ମେସିନରେ ପରୀକ୍ଷା କରାଯିବା ପରେ ମୌସୁମୀ ଗର୍ଭବତୀ ଥିବା ଜଣାପଡ଼ିଥିଲା। ପୂର୍ବରୁ ୨୦୨୧, ୨୦୨୩ ଓ ୨୦୨୪ରେ ୪ଥର ସାଧାରଣ ବାଘ ସାହିଲ ସହିତ ମିଳନ କରାଯାଇଥିଲେ ମଧ୍ୟ ସୁଫଳ ମିଳିନଥିଲା। ଜନ୍ତୁ କ୍ୟୁରେଟର ଡ. ରଶ୍ମିରଞ୍ଜନ ସ୍ବାଇଁଙ୍କ ପରାମର୍ଶକ୍ରମେ ୨୮ନମ୍ବର ଖୁଆଡ ପଛପଟ ପୃଥକୀକରଣ ଖୁଆଡ଼ରେ ମୌସୁମୀକୁ ରଖାଯାଇଛି। ଗତ ୫ରୁ ୪ଟି ସିସି କ୍ୟାମେରା ଲଗାଯାଇ ମୌସୁମୀର ଗତିବିଧି ଉପରେ ନଜର ରଖିଛନ୍ତି ଉପନିର୍ଦେଶକ ସନଥ କୁମାର ନାରାୟଣ। ମୌସୁମୀକୁ ସାଧାରଣ ଖାଦ୍ୟ ସହ ଭିଟାମିନ, କ୍ୟାଲସିୟମ ଖାଇବାକୁ ଦିଆଯିବା ସହ ତା’ର ସ୍ବାସ୍ଥ୍ୟାବସ୍ଥା ଅନୁଧ୍ୟାନ କରାଯାଉଛି ବୋଲି କ୍ୟୁରେଟର ରଶ୍ମିରଞ୍ଜନ ସ୍ବାଇଁ କହିଛନ୍ତି। ୨୦୧୬ ଅଗଷ୍ଟ ୫ରେ ଧଳାବାଘୁଣୀ ମୌସୁମୀ ନନ୍ଦନକାନନର ସାଧାରଣ ବାଘ ମନୀଷ ଓ ଧଳାବାଘୁଣୀ ସ୍ନେହା ଔରଷରୁ ଜନ୍ମଗ୍ରହଣ କରିଥିଲା। ଏବେ ନନ୍ଦନକାନନରେ ୨୭ଟି ବାଘ ଅଛନ୍ତି।
Comments are closed.