ବିକେ ଷ୍ଟିଲ କାରଖାନାର ଫାଟକ ଖୋଲିବା ନିମନ୍ତେ ପ୍ରଶାସନ, କର୍ମଚାରୀ ଓ କାରଖାନା କର୍ତ୍ତୃପକ୍ଷଙ୍କ ଆଲୋଚନା

ଗୁରୁଡିଝାଟିଆ: ବିକେ ଷ୍ଟିଲ କାରଖାନା ଫାଟକ ଖୋଲିବା ନିମନ୍ତେ ମାହେଶ୍ୱରୀ ଇସ୍ପାତ ଶ୍ରମିକ କର୍ମଚାରୀ ସଂଘର କର୍ମକର୍ତ୍ତାମାନେ ଆଜି କାରଖାନା ସମ୍ମୁଖରେ ଏକଜୁଟ ହୋଇଥିଲେ। ଦୀର୍ଘଦିନ ଧରି କାରଖାନା ଫାଟକ ବନ୍ଦ ହେବା ଫଳରେ କାରଖାନାର ଅଶେଷ କ୍ଷତି ଘଟୁଛି। ଯାହାଫଳରେ କି କାରଖାନାରେ କାର୍ଯ୍ୟରତ ମାହେଶ୍ୱରୀ ଇସ୍ପାତ ଶ୍ରମିକ କର୍ମଚାରୀ ସଂଘର ସଦସ୍ୟଙ୍କ ପେଟପାଟଣା ପ୍ରତି ପ୍ରଶ୍ନବାଚୀ ସୃଷ୍ଟି ହେଉଛି। କାରଖାନା ଫାଟକ ଖୋଲିଲେ ଆମ୍ଭେ ବଂଚିବୁ। ସେଥିପାଇଁ ଆଜି ପୂର୍ବାହ୍ନରେ ତୁରନ୍ତ କାରଖାନା ଫାଟକ ଖୋଲିବାକୁ ଶତାଧିକ କର୍ମକର୍ତ୍ତା ଏକତ୍ରିତ ହୋଇଥିଲେ। ହେଲେ ଘଟଣାସ୍ଥଳରେ ଚୌଦ୍ୱାର ଏସଡିପିଓ ଉମାକାନ୍ତ ନାୟକ, ମାଜିଷ୍ଟ୍ରେଟ ସମରେନ୍ଦ୍ର ଭଟ୍ଟ, ଖୁଣ୍ଟୁଣୀ ଥାନା ଅଧିକାରୀ ଭବାନୀ ଶଙ୍କର ଖୁଣ୍ଟିଆ ଫୋର୍ସ ସହିତ ଘଟଣାସ୍ଥଳରେ ଉପସ୍ଥିତ ହୋଇଥିଲେ। ଫାଟକ ଖୋଲିବା ନିମନ୍ତେ ଜିଦ୍ ଧରିଥିବା ଶ୍ରମିକ କର୍ମଚାରୀ ସଂଘର ନେତୃତ୍ୱ ନେଉଥିବା ଗଗନ ବିହାରୀ ପରିଡା, ଉପେନ୍ଦ୍ର ନନ୍ଦ, ସୁବ୍ରତ ମହାପାତ୍ର, ସତ୍ୟାନନ୍ଦ ରାଉତ, ଜ୍ଞାନରଞ୍ଜନ ଜେନା ପ୍ରମୁଖଙ୍କ ସହିତ ପ୍ରଶାସନ ଆଲୋଚନା କରିଥିଲା। ଯେହେତୁ ନିଯୁକ୍ତି ଓ ବକେୟା ପ୍ରାପ୍ୟ ଓ ବିଭିନ୍ନ ଦାବି ନେଇ ଭାରତୀୟ ମଜଦୂର ସଂଘ ଅନୁମୋଦିତ ମାହେଶ୍ୱରୀ ଇସ୍ପାତ ଶ୍ରମିକ କର୍ମଚାରୀ ସଂଘର ସଦସ୍ୟମାନେ କାରଖାନା ସମ୍ମୁଖରେ ଧାରଣା ଦେଇଛନ୍ତି, ସେମାନଙ୍କ ଆଜି ସଂନ୍ଧ୍ୟାରେ ଶ୍ରମ ଆୟୁକ୍ତଙ୍କ ସହିତ ବିଶଦ ଆଲୋଚନା ରହିଅଛି। ଏହାପରେ କାରଖାନା ଫାଟକ ଖୋଲିବା ନିଷ୍ପତି ହୋଇପାରେ। ତେଣୁ କାରଖାନା ଫାଟକ ଖୋଲିବା ପାଇଁ ଆସିଥିବା ମାହେଶ୍ୱରୀ ଇସ୍ପାତ ଶ୍ରମିକ କର୍ମଚାରୀ ସଂଘର ନେତୃବର୍ଗଙ୍କୁ ପ୍ରଶାସନ ବୁଝାସୁଝା କରି ଘଟଣାସ୍ଥଳରୁ ଫେରାଇ ଦେଇଛି।