ଶ୍ରୀନଗର: ଜାମ୍ମୁ-କାଶ୍ମୀରରେ ଶନିବାର ରାତିରେ ୨ଟି ସ୍ଥାନରେ ଆତଙ୍କବାଦୀ ଆକ୍ରମଣ ହୋଇଛି। ଗୋଟିଏ ଘଟଣରେ ଜଣେ ପୂର୍ବତନ ସରପଞ୍ଚଙ୍କ ମୃତ୍ୟୁ ଘଟିଥିବାବେବେଳ ଅନ୍ୟ ଏକ ଘଟଣାରେ ୨ ଜଣ ପର୍ଯ୍ୟଟକ ଗୁରୁତର ଆହତ ହୋଇଛନ୍ତି। ପର୍ଯ୍ୟଟକ ଦୁଇ ଜଣ ରାଜସ୍ଥାନର ଜୟପୁର ବାସିନ୍ଦା ବୋଲି ଜଣାପଡ଼ିଛି।
ଦକ୍ଷିଣ କାଶ୍ମୀରର ସୋପିଆନ୍ ଅଞ୍ଚଳରେ ବିଜେପି ନେତା ତଥା ପୂର୍ବତନ ସରପଞ୍ଚ ଐଜାଜ୍ ଅହମ୍ମଦଙ୍କୁ ଆତଙ୍କବାଦୀମାନେ ଗୁଳି କରି ହତ୍ୟା କରିଛନ୍ତି। ଆତଙ୍କୀଙ୍କ ଗୁଳିରେ ଐଜାଜ ଗୁରୁତର ଆହତ ହୋଇଥିଲେ ତାଙ୍କୁ ହସ୍ପିଟାଲ ନିଆଯାଇଥିଲା। ହେଲେ ଡାକ୍ତର ସେଠାରେ ତାଙ୍କୁ ମୃତ ଘୋଷଣା କରିଥିଲେ। ରାତି ପ୍ରାୟ ୧୦ଟାରେ ଏହି ଘଟଣା ଘଟିଛି। ଐଜାଜ୍ କାମ ସାରି ଘରକୁ ଫେରୁଥିବା ସମୟରେ ଆତଙ୍କୀମାନେ ତାଙ୍କୁ ଗୁଳି କରିଥିବା କୁହାଯାଉଛି।
ଅନ୍ୟପଟେ ଜୟପୁର ଅଞ୍ଚଳର ଦମ୍ପତି ତାବରେଜ୍ ଏବଂ ତାଙ୍କ ସ୍ତ୍ରୀ ଫରାହ ଜାମ୍ମୁ-କାଶ୍ମୀର ବୁଲିବାକୁ ଆସିଥିଲେ। ଅନନ୍ତନାଗ ଜିଲା ଅନ୍ତର୍ଗତ ପାହାଲଗାମ ଅଞ୍ଚଳରେ ଶନିବାର ରାତି ପ୍ରାୟ ୧୦ଟା ୧୫ରେ ଆତଙ୍କବାଦୀମାନେ ଉଭୟଙ୍କ ଉପରକୁ ଗୁଳି ଚଳାଇଥିଲେ। ଏଥିରେ ଉଭୟେ ଗୁରୁତର ଆହତ ହୋଇଛନ୍ତି। ନ୍ୟାଶନାଲ କନ୍ପରେନ୍ସର ଉପସଭାପତି ତଥା ବାରାମୂଳା ପ୍ରାର୍ଥୀ ଓମାର ଅବ୍ଦୁଲ୍ଲା ଏହି ଘଟଣାର ନିନ୍ଦା କରିଛନ୍ତି।
