ଅଯୋଧ୍ୟା: ଅଯୋଧ୍ୟା ରାମ ମନ୍ଦିରରେ ଭକ୍ତମାନେ ରାମଲାଲାଙ୍କ ସହ ଏବେ ନିଆରା ସୁନାର ରାମାୟଣ ମଧ୍ୟ ଦର୍ଶନ କରିପାରିବେ। ଗର୍ଭ ଗୃହରେ ଏହି ରାମାୟଣକୁ ନୀତି ନିୟମ ମୁତାବକ ସ୍ଥାପନ କରାଯାଇଛି। ଏହି ଖାସ୍ ରାମାୟଣକୁ ମଧ୍ୟପ୍ରଦେଶ କ୍ୟାଡରର ପୂର୍ବତନ ଆଇଏଏସ୍ ସୁବ୍ରମଣ୍ୟମ୍ ଲକ୍ଷ୍ମୀନାରାୟଣନ୍ ଏବଂ ତାଙ୍କ ପତ୍ନୀ ସରସ୍ୱତୀ ରାମ ମନ୍ଦିର ଟ୍ରଷ୍ଟକୁ ପ୍ରଦାନ କରିଛନ୍ତି। ମଙ୍ଗଳବାର ନବରାତ୍ରୀର ପ୍ରଥମ ଦିନରେ ଏହି ରାମାୟଣ ସ୍ଥାପନ ସମୟରେ ଲକ୍ଷ୍ମୀ ନାରାୟଣନ୍ ତାଙ୍କ ପତ୍ନୀଙ୍କ ସହ ଉପସ୍ଥିତ ଥିଲେ। ଚେନ୍ନଇର ପ୍ରସିଦ୍ଧ ଭୁମ୍ମିଡି ବଙ୍ଗାରୁ ଜୁଏଲର୍ସ ଏହାକୁ ତିଆରି କରିଛି। ରାମାୟଣକୁ ଗର୍ଭଗୃହରେ ରାମଲାଲାଙ୍କ ମୂର୍ତ୍ତିଠାରୁ ମାତ୍ର ୧୫ ଫୁଟ୍ ଦୂରରେ ପଥରର ଏକ ଆସନରେ ରଖାଯାଇଛି। ଏହି ଅବସରରେ ରାମ ମନ୍ଦିର ନିର୍ମାଣ ଦାୟିତ୍ୱରେ ଥିବା ଗୋପାଳ ରାଓ, ପୂଜକ ପ୍ରେମଚନ୍ଦ ତ୍ରିପାଠୀ ଏବଂ ଅନ୍ୟମାନେ ଉପସ୍ଥିତ ଥିଲେ।
ଆୟର୍ଲାଣ୍ଡର ସର୍ବ କନିଷ୍ଠ ପ୍ରଧାନମନ୍ତ୍ରୀ ହେଲେ ଭାରତୀୟ ବଂଶୋଦ୍ଭବ ସାଇମନ୍ ହାରିସ୍, ଶୁଭେଚ୍ଛା ଜଣାଇଲେ ମୋଦୀ
ସୁନା ରାମାୟଣର ବିଶେଷତ୍ଵ:
ଏହି ବିଶେଷ ପ୍ରତିକୃତିର ପ୍ରତ୍ୟେକ ପୃଷ୍ଠା ତମ୍ବାରେ ନିର୍ମିତ ଏବଂ ୧୪/୧୨ ଇଞ୍ଚ ଆକାରର, ଯେଉଁଥିରେ ରାମ ଚରିତ ମାନସର ଶ୍ଳୋକଗୁଡ଼ିକ ଲେଖାହୋଇଛି। ୧୦,୯୦୨ ପଦ ଥିବା ଏହି ମହାକାବ୍ୟର ପ୍ରତ୍ୟେକ ପୃଷ୍ଠା ୨୪ କ୍ୟାରେଟ୍ ସୁନାରେ ଆବୃତ ହୋଇଛି। ସୁବର୍ଣ୍ଣ ପ୍ରତିକୃତିରେ ପ୍ରାୟ ୪୮୦-୫୦୦ ପୃଷ୍ଠା ରହିଛି ଏବଂ ଏହା ୧୫୧ କିଗ୍ରା ତମ୍ବା ଏବଂ ୩-୪ କିଲୋଗ୍ରାମ ସୁନାରେ ନିର୍ମିତ। ପ୍ରତ୍ୟେକ ପୃଷ୍ଠା ତିନି କିଲୋଗ୍ରାମ ତମ୍ବାରେ ନିର୍ମିତ। ଧାତୁ ନିର୍ମିତ ଏହି ରାମାୟଣର ଓଜନ ୧.୫ କ୍ୱିଣ୍ଟାଲରୁ ଅଧିକ।
